JOSUE 16

1Noq sik'ooj chik chi riij re' wili i ye'aab' kehchaaj i riih rumaam i José: Ar xtohq'ik parelb'aal q'iij reh i nim ha' Jordán. Eh xponik chi chii' k'achlik ha' Jericó, xooj chupaam i ye'aab' chiq yuuq', xooj johtoq pantaq rax chee' wilik chuk'ulwaach i Jericó, xponik Bet-el. 2Eh xelik reje Bet-el, Luz wo' inkiq'or reh i xooj i k'oq ko chupaam i tinamit Atarot chupaam i kiye'aab' i aj arquita ko Astarot. 3Eh xooj i k'oq parookb'aal reje q'iij chupaam i kiye'aab' i aj Jafletira. Eh xponik kopan k'ula't reh i tinamit Bet-horón, xponik wo' ko chupaam ar Gezer, xooj k'oloq chi chii' i palaw Mediterráneo. 4Re' taqe i ye'aab' wili xkehchaaj i riih rumaam i Manasés, riih rumaam i Efraín, re' i kiib' chi rak'uun i José. 5Je' wili noq wilik i ruk'ula'tiil i kiye'aab' xkik'ul i riih rumaam i Efraín, re' q'oreel nik' kik'ihaal chi kiib', parookb'aal reje reh i q'iij, ar xtohq'ik chaloq i Atarot-adar, xponik ko Bet-horón re' tinamit wilik nah yuuq'. 6Eh re' kik'ula't pantz'eet reh i rookb'aal q'iij, ar xtohq'ik chaloq chi chii' i palaw Mediterráneo. Eh xponik ar Micmetat, eh ar xponik parelb'aal q'iij reje, xponik ar Jaanat. Eh i xik'ik reje ar Janoa. 7Eh xooj k'oloq ar Atarot, eh Naarat. Eh xponik ar Jericó. Eh xponik i wilik wii' i nim ha' Jordán. 8Eh ar xtohq'ik chaloq Tapúa xponik i wilik wii' i nim ha' Caná, xponik chi chii' i palaw Mediterráneo. Re' i wili xch'aqarik keh chu'nchel i riih rumaam i Efraín. 9Eh wilik wo' hoq kiib' ixib' i tinamit, haa' taqe i kok' ye'aab' wilkeeb' wii' patineel xkehchaaj i riih rumaam i Efraín, re' ruuk' i xkehchaaj i riih rumaam i Manasés. 10Eh re' taqe i riih rumaam i Efraín, ma' xkesaj ta taqe i cananeo wilkeeb' ar Gezer, xkikanaa' chi k'acharik chi kixilak xa re' la' xkiq'or reh i aj cananeo chi naa kianam i tooj, eh ar xi kahnik chi jumpech.

will be added

X\