JOB 9

1Re' Job je' wili ruchaq'weesjiik xub'an: 2Re' hin weht'al chi re' re' korik. ¿Mi neerub'an chi re' winaq nee ruq'or reh i Dios chi ma' xta numahk? 3Eh awach neraaj ruwech'um i Dios, nee ta inpahqaljik reh jino'q miil i xa chib'ih jariik, ma' jino'q naq i neeruchaq'weej. 4Re' QaJaaw Dios nim rajaawriik kow riib', eh aj na'ojb'al. Eh ma' jino'q neenq'atwik wach. 5Eh noq k'ahchi' i rujosq'iil i Dios i resaj paruye'aab' taqe i yuuq', eh ma' awach ta naab'inik reh nik' wach noq i rub'an. 6Re' reh i ruk'uyu'saj i wach ak'al, eh i rukuyu'saj wo' hoq i ch'iklik wii' i wach ak'al. 7Re' reh inq'orik ree q'iij noq ma' nelik ta chaloq. Re' reh inq'orik keh i ch'umiil chi ma' kisihq'inik taj. 8Eh ma' jino'q ixtowik reh noq xuyejaa' i taxaaj. Re' reh wilik rajaawriik chinaah taqe i palaw. 9Re' reh xyej-anik i juntzuhb' chi ch'umiil Osa, Orión, Pléyades kib'ihnaal. Eh re' reh xyej-anik keh i ch'umiil wilkeeb' pansak'aaj reh i rookb'aal q'iij. 10Re' reh i rub'an taqe i ma' k'isa sachb'al k'uxliis. Ma' awach ta neemb'anik reh i rub'an. 11Re' QaJaaw Dios neenik'ik chi nuwach, eh ma' nee ta wilow. Eh neenik'ik ma' najt ta wuuk', eh ma' nee ta nukoj rehtaal. 12Eh re' Dios wila' xresaj chi qawach i chib'ih qeh ¿Mi neerub'an chi neenqaq'or reh chi ma' chih taj? ¿Mi neenqaq'or reh chi maa rub'an? 13Eh re' Dios ma' jumehq'iil ta nik'ik rujosq'iil. Korehtaal inkiloch' kiib' chuwach i inkiq'et wachej kiib' chuwach. 14¿Eh aha' neenuk'am chee q'orik i hin reh chi neenuwech'uj i Dios? 15Atoob' ta naq ma' chih numahk, xama' nee ta wo' naq i nu ch'aqweej. Xa re' naq neenupahqaaj reh chi chuketelaaj nuwach, ruum re' reh q'atal q'orik. 16Atoob' ta re' Dios neerib'iraj chib'ih i neenupahqaaj reh, majaa' neenunimaj i hin chi xrib'iraj i nutiij. 17Ruum re' reh yohb'aal wach i ti' k'axik i ruyeew chi nunaah, xa je' chik inchalik teew jab', xutiq naah i nuti'kiil chi xama' xta wo' numahk. 18Juneliik ti' k'axik i ruyeew chi nunaah ma' kiruhi'lisaj ta k'isinoq. 19Wila' inqaaj q'orik chi riij jino'q i xiik' naah i rajaawriik. ¿Mi wilik jino'q neenq'atwik i q'orik chinaah? 20Atoob' ta naq neenuq'or i hin chi ma' xta numahk, eh chi korik wach nuk'ux, re' reh nee naq i ruq'or weh chi wilik numahk, eh chi ma' holohik taj i nuna'ojb'al. 21Re' hin weht'al chi ma' xta numahk, xa re' la' ma' xta nwaaj reh, xinq'uhtik chik chi k'acharik ayu' wach ak'al. 22Chuwach i Dios xa jinaj wach chu'nchel, ruum re' reh nik' wach noq i rusach wach i wilik ru mahk, je' wo' re' noq i rusach wach i ma' xta ru mahk. 23Wila' re' i ma' xta ru mahk inkimik reje ruum i ti' k'axik, noq i nuq'or i hin chi re' Dios inse'lanik, noq i rilow chib'ih i ruk'ul. 24Eh re' wo' re' inq'asanik ak'al pan kiq'ab' i yiib' wach kina'ojb'al. Re' wo' reh intz'apwik inaq'kiwach q'atal q'orik. ¿Eh wila' ma' re' reh imb'anik awach chik? 25Re' nuk'achariik xa chi jumehq'iil k'ahchi' rusahchiik wach, eh ma' xwihik ta rusuqkiil nuk'ux. 26K'ahchi' rojiik i nuk'achariik je' rukab' noq kiooj taqe i barco. Eh je' rukab' noq inrupinik reje i k'uch chinaah i rutiib'. 27Eh re' hin noq inwaaj naq nusacham panuk'ux i ti' k'axik k'ahchi' nuk'ulum xasuq naq nuk'ux i nub'an wiib'. 28Xa re' la' chu'nchel inuti'kiil inchalik wo' chik nuyo'jiik ruum. Ruum i re' i nukoj rehtaal chi re' Dios ma' runimaj taj chi ma' xta numahk. 29Wila' re' reh ruq'or chi wilik numahk, xama' xta chik inki chi re' hin neenuq'or chi ma' xta numahk. 30Atoob' ta neenutz'a'j wiib' ruuk' xab'oon, oon ruuk' jino'q i xa chib'ih chik jariik ineesanik ch'uwa' xama' nee ta wo' runimaj i Dios chi ma' xta numahk. 31Je' naa neekirukut chupaam i jul ch'uwa' paam, eh re' i nuso' nee naq i ruyib'uj ruum i ruch'uwa'iil wach. 32Re' QaJaaw Dios ma' re' ta jino'q xa winaq je' rukab' i hin chi neenuwech'uj, eh chi neenuk'am reje pan q'atb'al q'orik. 33Ma' xta naq reet chi wilik ta chik jino'q i xti wilik rajaawriik chi nee ruq'at i q'orik chi qanaah qakab'cheel. 34Reh naq chi neeruq'or reh i Dios chi nee rumay ruye'ariik i ti' k'axik chi nunaah, eh chi neeresaj inuyo'jiik. 35Re' hin nee naq kinq'orik chi ma' xta nuyo'jiik, nee naq i nuq'or chi ma' xta numahk.

will be added

X\