JOB 8

1Re' Bildad aj pan tinamit Sua, je' wili ruchaq'weesjiik i Job xub'an: 2¿Kojaruuj inakanaa' ruq'orariik taqe i k'ahchi' aq'orom? Re' taqe aq'oral inaq'or xa je' inik'ik kaq suut teew. 3¿Mi ma' parub'ehel inq'atwik q'orik re' i QaJaaw Dios nim rajaawriik? ¿Mi neerujal wach re' i korik i reh? 4Re' naa taqe awak'uun awixq'uun ximahkunik chuwach i QaJaaw Dios ruum aj re', re' reh xuyeew taqe chutojariik i kimahk. 5Eh re' hat cha sik' chu'nchel ak'ux i QaJaaw Dios nim rajaawriik, cha pahqaaj reh chi nee ruketelaaj awach. 6Wila' korik wach ak'ux, eh saq wach awánima re' reh nee tirib'iraj, eh nee wo' chik i ruyeew rusuqkiil ak'ux panapaat. 7Eh xiik' chik naah ab'ehomal naa ruye'em i QaJaaw Dios, ma' xata je' rukab' ab'ehomal xwihik cho pampeet. 8Yu'naak i hat cha pahqaaj chib'ih jariik i kianam chaloq taqe i aj najtir q'iij reh chi neenatijej aweh i kina'ojb'al i keh. 9Re' hoj koxoj aasjik wo' tii ma' xta qeht'al re' qak'achariik ayu' wach ak'al xama' najta wo' hoq xa je' rukab' noq inik'ik jino'q imuuj. 10Eh re' taqe i aj najtir q'iij keh wilik taqe i kianam, reh chi neenatijej aweh ma' k'isiin taqe i na'ojb'al neenkik'uhtaaj aweh. 11Chakoj taq rehtaal chi re' i kalaab' ma' ink'ihik taj aha' ma' xta ch'uwa'. Eh ma' k'ihik ta wo' hoq i kaxlan aaj aha' ma' xta wii' ha'. 12Atoob' ta xa rax rax wo' naq wach xa peet wo' inchiqik chikiwach chu'nchel i ch'ahn atoob' ta komajaa' wo' naq inyok'arik. 13Je' wo' re' inkik'ul i yiib' wach kina'ojb'al insahchik pankik'ux i Dios, xama' xta chik inkuy-eej. 14Eh ma' xta chik ch'iklik reje wii' kik'ux ma' xta chik inkiko'leej wii' kiib' xa je' naa ruuk' rukeem am inkichop wii' kiib'. 15Noq naa naq kaajwaam kichopom kiib' ruuk' i je' rukeem am ma' naa ta rukuyum ruum xama' kow ta wo' k'isinoq. 16Re' taqe yiib' wach kina'ojb'al je' kikab' i chee' rax rax wach i xaq i rukuy i rutz'a'iil i q'iij, i ruhel reje riib' chinaah i uhtz'ub'. 17Eh ink'ihik reje i raa' xilak taq ab'aj, eh inkib'ak'ej kiib' wataq saqrehp ab'aj. 18Eh wila' awach xchuqwik reh i raa' i chee' re' re' ma' awach ta chik naa runaab'iniik reh chi xwihik chupaam i ye'aab' re' re'. 19Je' re' noq naa rusachariik kiwach i yiib' wach kina'ojb'al, je' rukab' noq inchuqarik i ch'ahn, tokoom ch'ahn chik impoq' cho ar. 20Re' QaJaaw Dios ma' jaruuj nee rukanaa' i korik wach ruk'ux. Eh ma' jaruuj wo' neerutoob'eej i yiib' wach runa'ojb'al. 21Re' reh naa wo' chik ruye'em rusuqkiil ak'ux, naa wo' chik ak'erem aachii' chi se'eel ruum. 22Eh re' taqe i ki-ixowanik awach naa kik'uhtaam kik'ixb'ilaal. Eh re' taqe i yiib' wach kina'ojb'al naa rusahchiik wach chu'nchel awach keh, inki Bildad.

will be added

X\