JOB 42

1Re' Job je' wili ruchaq'weesjiik i QaJaaw Dios xub'an: 2QaJaaw Dios, re' hin weht'al chi chu'nchel i na a'n rub'aan, eh ma' xtaj i kapeb'al ke'lik chawach. 3¿Mi wilik wajaawriik re' hin chi nuwech'uj riij taqe i na a'n? Re' hin xnuwech'uj riij ruum ma' xta nuna'ojb'al, kinq'orik naq chi riij taqe i ma' nureq ta chi riij. Xinq'orik chi riij i sachb'al k'uxliis i na a'n, re' i ma' inureq ta chi riij i hin. 4Re' hat xaq'or weh chi naab'iram i naa aq'orom weh. Eh chi naa nuchaq'weem aweh i naa apahqaam weh. 5Re' hin xanb'iraj naq rib'iral awajaawriik, eh yu'naak, je' naa xwilow awach i hat ruuk' naq'nuwach. 6Je' re' noq re' hin yu'naak i nuyot' i nuk'ux chi riij i xnuq'or, inutz'unaa' wiib' pan pooq, pan chaaj, inki Job. 7Noq re' i QaJaaw Dios xukohlaaj i q'orik ruuk' i Job, xuq'oreej i Elifaz aj ar Temán, je' wili xuq'or reh: Re' hin k'ahchi' i nujosq'iil cha naah i hat je' wo' chikinaah i kiib' chi awamigo, ruum ma' xaq'or ta taq i korik chi wiij je' rukab' i xuq'or chi wiij i Job, i waj kamanoom. 8Yu'naak taq i hat wuquub' chi kok' imas wakax, wuquub' imas tentzun, chak'am taq reje reh i Job neeruq'asaj chi k'atoj mayiij taq chawiij i neerub'an rutiij taq chawiij. Eh re' hin neenb'iraj i rutiij, eh ma' xta taq neetiwuchej. Atoob' ta ruk'ul wo' naq chi nee taq tinuyeew chi tojariik aamahk, ruum ma' xaq'or ta taq i korik chi wiij je' rukab' i xuq'or i Job waj kamanoom, inki. 9Eh re' i Elifaz aj ar Temán, i Bildad aj ar Sua, eh i Zofar ar Naamat, xponik wo' kian i xq'orarik keh ruum i QaJaaw. Re' QaJaaw xrib'iraj wo' hoq i rutiij i Job. 10Eh noq rub'anam chik rutiij i Job chikiij taqe ixib' chi ramigo. Re' QaJaaw xresaj i ti' k'axik chinaah i Job, eh nik' naq k'ihaal i chib'ih reh wilik pampeet, kiib' chik chi je' re' k'ihaal i xye'arik reh chi jilow ruum i Dios. 11Eh chu'nchel i ras ruchaaq' i Job chi winaq chi ixoq xi chalik chi rilariik, xi chalik taqe i ramigo xi wihik cho pampeet. Xkian kininq'iij, xkian kiwa' kihaa' parupaat i Job. Eh xkiyeew rukowiil ruk'ux ruum xik'ik panti' k'axik re' xye'arik chinaah ruum i QaJaaw Dios. Eh chi kiju'junaal i re' xkisiij rutumiin i Job, xkisiij ju'jun rulopq'aaq' re' ruuk' i oro. 12Re' i QaJaaw Dios ma' k'isiin ta xukuxisaj i Job, ruum xiik' chik naah k'ihaal i chib'ih reh xuyeew chuwach i pampeet. Xuyeew kab'laj miil i rutentzuun, waqiib' miil i rucameyo, jinaj miil k'uhl i rub'oyaax, jinaj miil i rub'uuruux. 13Eh xye'arik wuquub' i rak'uun, eh ixib' i rixq'uun. 14Re' i peet rixq'uun Jemima i rub'ihnaal xukoj, re' i rukab' Cesia i rub'ihnaal xukoj, re' roox Kere-ahapuc i rub'ihnaal xukoj. 15Re' taqe ixib' chi rixq'uun i Job xa re' wo' keh xiik' naah kiholwochiil chinaah chu'nchel i wach ak'al. Eh xsiijik chib'ih keh ruum i kajaaw ruch'ihil taqe i kas, i kichaaq' winaq. 16Eh chi riij taqe re', re' Job ko jinaj siento ruuk' ka'winaq haab' chik xk'acharik, koxrilow kiwach taqe i riih rumaam, je' wo' taqe i xikin riih. 17Re' Job xti mama' winaq chik, eh k'ih chik i ruhab'ul noq xkimik reje.

will be added

X\