JOB 41

1Eh je' wo' chik wili i xuq'or reh i Job: ¿Mi neenachop re' i qamaan k'ap ruuk' i chopb'al kar? ¿Mi nenab'ak' re' i ju' ruuk' k'ahaam? 2¿Mi neenab'ak i k'ahaam paruhopil ju'? ¿Mi neenahop i rukahkachi' ruuk' jino'q i loklok naah ch'ihch'? 3¿Mi rupahqaaj rukuyb'al aweh reh chi nee naketelaaj wach? ¿Mi neerupahqaaj otob'il aweh ruuk' i q'uun laj q'orik? 4¿Mi neerub'an re' chi nee ruyejaa' wach awuuk', reh chi neen kamanik awuuk' chi jumpech? 5¿Mi neerub'an re' chi neena a'n ak'oniik ruuk' chi je' jino'q k'isa tz'ikin? ¿Mi neerub'an re' chi neenab'ak', nee nayeew chi kik'onaal i kok' xq'un? 6¿Mi neerub'an re' chi neenkik'ayej i qamaan k'ap re' re' i k'ayen kar? ¿Mi neenkiyok' chi t'ohraal re' i rutib'kaal? 7¿Mi neenayok' i rutz'uhmal i riij re' ruuk' kuchilo? ¿Mi neenahop paam i naah re' ruuk' q'as ju' ch'ihch' chopb'al kar? 8Wila' re' hat xa tz'a'j i qamaam chikop re' re' nee rutoq'aa' peleto awuuk'. Re' hat ma' jaruuj chik naa atz'a'am ruum naa chik ayo'jiik ruum. 9Eh awach neenilwik wach i qamaan k'ap re' re' neenq'ehb'ik wach ak'al ruum ruyo'jiik 10Wila' awach xkaqrisanik i koq reh yohb'aal wach noq inchalik rujosq'iil, eh ma' awach taj i neeruko'leej riib' chuwach, je' wo' hin ma' awach ta wo' hoq i neeruko'leej riib' chi nuwach. 11¿Mi wilik ineenwech'inik weh i hin? Ma' awach taj ruum chu'nchel i wilik wach ak'al weh i hin. 12Re' hin ma' naa ta numayam ruq'orariik i qamaan k'ap re' re' ruum xiik' naah kowiil riib', je' wo' taqe i rooq xiik' naah kikowiil. 13¿Mi wilik jino'q ineenesanik iloq reh i piim laj riij? ¿Mi wilik neenhopwik reh i kowlaj riij? 14¿Mi wilik ineentehwik reh i chii'? Ruum re' reh xasaq k'arik chik taqe i reeh xatiyo'joq chik ruum. 15Re' i ru tahsaal i riij xiik' naah kowiil, je' kowiil pulato ch'ihch' ko'lemb'al iib'. 16Ruk'ulum kiib' chi korik i riij ni xata naq re' i teew inokik chupaam i riij. 17Kichopom kiib' chi korik, kik'ulum kiib' i riij, ma' awach ta neench'aqwik reh i riij. 18Eh noq inat'isrik i qamaan k'ap re' re' xa je' chik ruch'aab' i kahoq i ruxlaab'. Re' taqe inaq'wach xa je' chik rukab' i rusaqumaal inaq'wach i q'iij noq insaq'ik. 19Eh panchii' i nelik chaloq i xaq q'aaq', i nelik wo' chaloq i ruk'oxb' q'aaq'. 20Eh i nelik chaloq i sib' panju', xa je' chik rukab' i sib' i nelik chaloq pan xun noq k'ahchi' ruroqrotiik. 21Eh ruuk' i ruxlaab' i ruqop ruq'aq'al i naah wach q'aaq', eh i nelik chaloq i xaq q'aaq' panchii'. 22Yohb'aal wach i ransil i ralaq, chu'nchel kiyo'jik ruum. 23Eh chu'nchel i rutib'kaal xiik' naah kowiil, ma' awach ta neenhopwik reh, je' kowiil i ch'ihch' haab'isamaj. 24Re' i ránima xiik' naah kowiil je' kowiil ab'aj, je' kowiil i kaa' keeb'al. 25Eh chu'nchel i wilik kaansil kiyo'jik chuwach ruum xiik' naah kowiil riib'. Inkimol chi elik chuwach ruum kiyo'jiik. 26Eh ni xata q'aslaj ch'ihch', ni xata flecha, ni xata q'as ju' ch'ihch' neenhopwik reh i riij. 27Chi ree qamaan k'ap xama' xta nokik wii' i ch'ihch', xa je' rukab' i k'im chi reh, eh chi ree q'an ch'ihch' xa je' rukab' i q'aah laj chee'. 28Eh noq neenkutarik chi flecha xama' nee ta wo' inyo'jik, noq neenkutarik chi ab'aj, chi ree reh xa je' neenkutarik chi k'im. 29Chu'nchel ineenkutarik wii' xama' xta nokik wii' chi ree reh xa je' chiq sohk' chi reh. 30Eh re' wach paam xiik' naah q'asiil, i ruk'ot ak'al noq i rujukej riib' xa je' chik rukab' i rub'an i q'as reeh ch'ihch'. 31Eh i rutukej wach i ruchamiil i palaw xa je' chik rukab' noq inroqrotik i nimlaj xun noq inchaq' ink'ohnik laj iq'oom chupaam. 32Noq inik'ik paruchamiil i palaw xasaq chik wach i rupuuh i rukanaa', xan worwotik chik xa je' chik saq laj nahis. 33Re' qamaan k'ap ma' xta chik jino'q chikop chi je' rukab' i reh ma' inyo'jik ta k'isinoq xatiyo'joq chik ruum. 34Eh wilik rajaawriik chikiwach chu'nchel i chikop. Eh i ruk'uhtaaj kik'ixb'ilaal chu'nchel, ruum xa re' wo' reh kow riib', inki i Dios.

will be added

X\