JOB 4

1Re' Elifaz aj pan tinamit Temán, je' wili xuq'or reh i Job: 2Wila' chib'ih i xqaq'or aweh ma' suq ta neerub'an aweh, xa re' la' ma' nee ta rub'an chi ma' nee ta nqaq'or aweh chib'ih inqakapaaj. 3Re' hat ma' k'isiin naq taqe i natijej ruuk' i rukorkiil, eh i nayeew naq rukowiil kik'ux i ma' kow ta kik'ux. 4Eh ruuk' aq'oral i nayeew naq rukowiil kik'ux i xa q'ehb'ik naq chik keh. Inakoj wo' naq kina'ojb'al taqe i k'isiin kik'ux. 5Eh noq wilkaat panti' k'axik ¿Chib'ih reet noq ma' nakowej ak'ux? ¿Chib'ih reet noq i rub'an kiib' ak'ux? 6¿Mi ma' korik wach ak'ux re' hat chuwach i Dios? ¿Mi ma' hat raj kamanoom re'? Eh ¿chib'ih reet noq ma' nach'ikaa' ak'ux ruuk' i reh? 7Chakapaaj riij, ¿Mi wilik jino'q i korik wach ruk'ux insacharik wach? ¿Mi sacharik wach i ma' xta ru mahk? 8Re' hin nukojom rehtaal, awach taqe i re' yiib' wach na'ojb'al inkitik, re' wo' chik i re' inkijach. 9Re' Dios i rub'an cho keh, eh ruuk' i rujosq'iil i rusach kiwach. 10Atoob' ta inkik'er kichii' ruum kijosq'iil je' rukab' i rub'an i kaq b'ahlam, re' Dios naa resaniik i kajaawriik, je' rukab' noq inehteesjik i wach keeh i kok' kaq b'ahlam. 11Eh naa kikimiik reje je' rukab' noq kikimik i kaq b'ahlam noq ma' xta chik kitiib', eh naa kitukem kiib' i kak'uun kixq'uun. 12Re' hin xk'ulik kiq'or weh jinaj i q'orik, xa q'uun xk'ulik kiq'or weh xa-xkijask'uuj weh. 13Eh chaq'ab' noq suq kiwiriik chu'nchel i tinamit, wilik i xuk'uhtaaj riib' weh panusaq wiriik, ma' k'isiin ta xinyo'jik ruum. 14Re' hin xchalik nu b'arb'otiik ruum nuyo'jiik, xakib'arb'otik chik chu'nchel i nuti'jolal. 15Eh noq xik'ik ruhupej i nuwach jinaj i teew xipa'lojik taqe i rismaal i wiij. 16Eh jinaj i xupab'aa' riib' chi nuwach, je' yohb'isaneel, xa re' la' ma' nunab'eej ta wach, eh jinaj i kowlaj q'orik xb'iraj, je' wili xuq'or: 17¿Mi neerub'an chi korik wach ruk'ux i winaq chuwach i Dios? ¿Mi neerub'an chi saq wach i ránima chuwach i Dios xtz'uhkrisanik cho reh? 18Ma' chih taj ruum re' Dios ni xata naq ruuk' taqe i ánjel i raj kamanoom i ruch'ikaa' ruk'ux, ruum wilik wo' kiq'ehb'ik wii' chuwach. 19Kore' naa chik re' ruuk' i winaq ma' xta rukowiil neeruch'ikaa' ruk'ux i Dios. Re' winaq xa je' rukab' i paat, ak'al korjinaq wii' xa nah pooq ch'iklik xa re' yu' insacharik wach ruum i mooh. 20Re' winaq wahq'eq ko wilik ruk'achariik, eh xq'eq insacharik wach, inkimik reje chi jumpech, ma' awach ta chik inq'orik rib'iral. 21Re' i ruholwochiil insahchik wach, eh inkimik reje chi jumpech, noq komajaa' i rureq runa'ojb'al inki.

will be added

X\