JOB 39

1Re' i Dios je' wo' chik wili i xuq'or reh i Job: ¿Mi aweht'al i hat chib'ih q'ijil ki-aasjik i kak'uun ixoq kaprax wilkeeb' panch'ahn? ¿Mi awilom junriim-oq noq inaasjik i kak'uun ixoq keej? 2¿Mi aweht'al jarub' poh inkihqaaj i kak'uun ixoq keej? ¿Mi aweht'al i hat chib'ih q'ijil ki-aasjik i kak'uun? 3¿Mi aweht'al re' i hat chi nkik'on kiib' noq inaasjik? ¿Eh q'e' ti' ki-ik'ik noq inaasjik i kak'uun? 4Noq kik'ihik kikoowjik noq inkik'ux i ch'ahn, eh kiooj ma' kisutinik ta chik cho ruuk' i kituut chi jumpech. 5¿Awach xye'wik reh chi b'ehik panch'ahn i b'uurux? ¿Awach xye'wik reh chi b'ehik chi ma' xta ilil reh? 6Re' hin xin ye'wik reh chupaam i ye'aab' chiq yuuq' chupaam i ye'aab' ma' xta tik i nelik chuwach. 7Re' b'uurux ma' raaj ta wihik ma' najt ta kuuk' i tinamit, ma' raaj ta chi neenkaajik. 8Eh i rusik' ruwa' wataq yuuq', i rusik' taqe i ch'ahn re' ruuk' i rax wach. 9¿Mi neerub'an re' aakamaj i nimaq imas wakax, wilik paraxchee'? ¿Mi nee raaj wihik chupaam re' aakoraal? 10¿Mi neerub'an re' chi neenab'ak' i perepik chee rij naah, eh nee nakoj chi b'anaj arado pana ye'aab' nee nak'am rub'eeh? 11¿Mi neenach'ik'aa' ak'ux chinaah re' xa ruum chi q'e' nim, eh wilik ransil? ¿Mi nee nayeew reh chi b'anarik aakamaj? 12¿Mi neerub'an re' chi nee rusik' i wach taqe atik amu'uun, eh chi nee rumol chupaam i ye'aab' inamol wii'? 13¿Mi re' hat xat ye'wik re' taqe i ruholohaq xiik' i pavoreal taqe i ruxiik' i nimaq chikop Avestruz rub'ihnaal? 14Re' Avestruz i rukanaa' taqe i rumiloj panak'al, reh chi re' ak'al inq'iximb'isanik keh 15Eh ma' rukapaaj taj chi wilik nenik'ik yeq'woq paam taqe i rumiloj, oon chi wilik jino'q i chikop neenik'ik yeq'woq paam taqe i rumiloj. 16Ma' ruk'ax ta taqe i rak'uun, je' cho ma' rak'uun i rub'an reh, ma' xta raaj reh atoob' ta ma' impoq' i rumiloj. 17Ma' rureq ta chi riij i rub'an, ruum re' hin i Dios ma' xnuyeew ta runa'ojb'al. 18Xa re' la' noq i nrupinik reje kow inooj xa rukaqse'laaj i kawáyu je' wo' hoq i iqlik chi riij ruum q'uun kib'ehik. 19¿Mi re' hat xat ye'wik ransil re' kawáyu? ¿Mi re' hat xat xoyinik reh re' ruuk' i chaamlaj rismaal wilik rij naah? 20¿Mi nee nayohb'isaj re' i kawáyu, reh chi neenpisk'anik chi je' jino'q nimlaj chili'l? Re' la' taqe i winaq kiyo'jik noq i ruk'er chii' i reh. 21¿Kow riib' i ruk'ot aak'al xa raj chik ojik chi q'aq'inik ruum q'e' suq ruk'ux chi riij i ransil? 22Re' kawáyu ma' reht'al ta wach yo'jik xata inyo'jik k'isinoq noq inooj chi q'aq'inik kuuk' i wilik kiq'aslaj ch'ihch'. 23Atoob' ta xan tzilininik chik i q'aslaj ch'ihch' chinaah, atoob' ta xa nelik chik ruq'aq'al i q'as ju' ch'ihch', xama' inyo'jik ta wo' hoq. 24Eh xa ruk'ot chik ak'al ruum i rujosq'iil xama' awach ta chik impab'anik reh. Ma' xta raaj reh atoob' ta neenxuuljik chee tuun. 25Noq inxuuljik chee tuun i ruk'er chii' i rik'raaj chi naa ruwihiik q'aq'inik. Atoob' ta majaa' nooj chi q'aq'inik rib'iraj chi k'ahchi' chik chi taaq'anik i kajaaw soldado. 26¿Mi ruum re' ana'ojb'al i hat Job inrupinik i k'uch? ¿Mi re' hat ti q'orik reh re' noq inooj reje pansak'aaj reh i rookb'aal i q'iij? 27¿Mi re' hat ti q'orik reh re' ixoq xihk noq i ruyejaa' i rusuuq chinaah taqe inajt kinaah ye'aab'? 28Re' i chikop re' re' ar impatinik chupaam i ruhopil i saq rehp, ar i ruko'leej riib' chupaam i ruhopil ab'aj. 29Eh ko ar taxaaj i rilow taqe chaloq i chikop noq i ruchop. 30Re' taqe i rak'uun re' rukik'eel taqe i chikop inkik'ux. Re' ixoq xihk re' re' aha' wilkeeb' i kamnaq ar wo' wilik, inki Dios.

will be added

X\