JOB 38

1Re' Dios xuq'il i Job je' wili i xuq'or cho reh chupaam i runimaal kaq suut teew: 2¿Chib'ih a'nam i hat chi nawech'uj riij taqe i nub'an? Re' hat ti q'orik chi je' re' ruum ma' xta ana'ojb'al. 3Yu'naak cha yejaa' awiib' chakuhtaaj aakowiil, neenachaq'weej weh i naa nupahqaam aweh. 4¿Mi wilkaat chik re' i hat noq xnuyejaa' paruye'aab' i wach ak'al? Wila' xti wilik ana'ojb'al, cha q'or weh. 5¿Mi aweht'al i hat awach xq'orik reh nik' nimaal i wach ak'al xb'aan? ¿Wila' aweht'al cha q'or weh awach i xpajwik reh? 6¿Chaq'or weh nik' wach noq ch'iklik paruye'aab' i wach ak'al? ¿Eh awach i xkojwik reh taqe i kowlaj ch'ikaab' reh? 7Noq kisihq'inik chaloq taqe i ch'umiil pan taxaaj kowahq'eq xasuq chik kik'ux chi loq'inik taqe i nuánjel. 8Eh noq x-aasjik chee palaw panak'al ¿Awach xkojwik q'atb'al reh, chi ma' xupuhkaaj ta reje riib'? 9Re' hin xinkojwik i suutz' chib'urb'al naah i palaw, reh chi xkahnik panq'equm. 10Eh re' hin xinq'orik reh i palaw aha' naa rik'iik xnukoj tz'apb'al reh xnukoj pan laweh. 11Eh je' wili xnuq'or reh xa ayu' naa aponiik, ma' naa ta chik awojiik reje chuwach, xa ayu' naakipahiik taqe aab'ohl, kinki reh. 12Raaj i hat Job, ¿Mi ataq'aam junriim-oq pan ak'achariik chi naa ruwihiik i wahq'eq? ¿Mi ataq'aam junriim-oq chi naa rusaquumb'iik i wach ak'al? 13¿Mi aye'em chi saqumb'ik junriim-oq i wach ak'al, reh chi re' taqe i yiib' wach kina'ojb'al nee kielik chaloq chupaam i ye'aab' muqulkeeb' wii'? 14Noq insaq'ik ink'utinik i ru holwochiil i wach ak'al, je' cho riq'omaaj wach i wach ak'al inkahnik chi xa je' chik inka'yik itz'ihy. 15Eh re' taqe i yiib' wach kina'ojb'al ma' imponik ta chik inki a'n i kiyiib' wach na'ojb'al inki a'n naq pan ke'lik. 16Raaj i hat Job, ¿Mi hat poninaq panke'lik ko' aha' inaasjik cho wii' i palaw? ¿Mi hat poninaq chupaam i ruchamiil? 17¿Mi hat poninaq chupaam i puerta kiokik wii' taqe i kamnaq? ¿Mi hat poninaq chupaam i kiye'aab'? 18¿Mi aweht'al i hat nik' nimaal chu'nchel i wach ak'al? Chaq'or weh wila' xti korik chi aweht'al. 19¿Mi aweht'al i hat aha' inchalik i saqum? ¿Mi aweht'al i hat aha' inchalik i q'equm? 20¿Mi aweht'al i hat ko aha' imponik i saqum noq ruk'ul riib' ruuk' i q'equm? ¿Mi neerub'an chi nee taqe nak'am reje pan kiye'aab'? 21Wila' aweht'al taqe re' iraaj ruq'orom chi hat chik aasjinaq i hat noq xnuyejaa' i wach ak'al. Iraaj ruq'orom chi xiik' chik naah k'ihaal ahab'ul. 22¿Mi hat poninaq chupaam i ye'aab' re' hat i numol wii' i saq suutz' i numol wii' taqe i saqb'och? 23Re' taqe re' numolom taqe, reh chi naa taqe nutaq'aam chaloq paruq'ijil i ti' k'axik, paruq'ijil i q'aq'inik. 24¿Mi aweht'al i hat aha' inchalik i saqum noq i rupuhkaaj riib' chinaah i wach ak'al? ¿Mi aweht'al i hat nik' wach noq i rupuhkaaj riib' i teew inchalik parelb'aal i q'iij? 25¿Awach intaaq'anik cho reh i kowlaj jab'? ¿Awach inq'orik reh i kahoq aha' naa rik'iik? 26¿Awach intaaq'anik cho reh i jab' aha' ma' xta wii' tinamit? ¿Awach intaaq'anik cho reh i jab' panchiq yuuq' ma' xta wilik chupaam? 27¿Awach int'aqsanik cho reh i ye'aab' chiq yuuq' reh chi nee nelik chee rax ch'ahn chuwach? 28¿Mi wilik rajaaw i jab'? ¿Mi wilik xyej-anik cho reh i musjab'? 29¿Mi wilik rutuut i jot'ik ha' i rutoy riib' ruch'ihil i jot'ik chaaj ink'atwik? 30¿Awach insutinik reh i ha' chi rutoy riib' inkahnik chi je' ab'aj? ¿Awach injoot'isanik reh i palaw? 31¿Mi re' hat ti ye'wik pan kiye'aab' re' i juntz'uhb' chi ch'umiil Pléyades kib'ihnaal? ¿Mi neena a'n keh teesjiik pan kiye'aab' re' i ch'umiil Orin i kib'ihnaal? 32¿Mi re' hat titaaq'anik kee chi b'ehik re' i ch'umiil ihqen q'iij? ¿Mi re' hat ti k'amwik kib'eeh re' i ch'umiil Osa kib'ihnaal, re' taqe nimaq, taqe kok' taq? 33¿Mi aweht'al re' hat i kik'uhb'aal i wilkeeb' pan taxaaj? ¿Mi hat xat kojwik re' i k'uhb'aal wilkeeb' wach ak'al? 34¿Mi neerub'an chi neenaq'or reh i suutz' chi nee ruyeew chee ma' k'isa jab' chinaah i wach ak'al? 35¿Mi wilik awajaawriik re' hat chi neenataq'aaj i kahoq? ¿Mi neenib'irinik chawach re'? 36¿Awach inye'wik kina'ojb'al i tinamit? ¿Awach inye'wik rukowiil kik'ux? 37¿Mi wilik jino'q i neerub'an kajaljiik taqe i suutz'? ¿Mi wilik jino'q i nee ruq'or reh i suutz' chi chuyeew chee jab', 38reh chi re' pooq nee wo' chik insutinik chi ch'uwa' chi nee wo' chik i rulatzej riib'? 39¿Mi re' hat tichopwik keh re' i chikop inkik'ux i kaq i b'ahlam? ¿Mi re' hat ti ye'wik k'uxumb'al keh re' i kok' kak'uun, 40re' noq inkiyok'aa' kiib' pan kijuul oon panch'ahn chi ruyub'jiik chi naa ruponiik i kitiib'? 41¿Mi re' hat ti ye'wik kiwa' i nimaq taq tz'ok? ¿Mi re' hat ti ye'wik kiwa' re' i kok' kak'uun noq inkik'er kichii' chupahqaljiik i kiwa' weh i hin? inki.

will be added

X\