JOB 37

1Eh ruum i re' q'e' kinyo'jik, xan k'uyu'jik chik i wánima, je' inche xanaa chik reliik paruye'aab' noq inwik'raaj. 2Chab'iraj taq, re' Dios naa ruq'oriik, xa je' chik kahoq noq naa ruk'erem chii' chi q'orik. 3Re' reh ruyeew i ruch'aab' kahoq chupaam chu'nchel i taxaaj, korehtaal imponik chi junsuut i wach ak'al. 4Eh noq inq'orik i Dios ruuk' i runimaal i rajaawriik je' rukab' noq impoq i kahoq. Eh ma' rumay taj i ruch'aab' noq k'ahchi' chi teleninik. 5Re' Dios ruuk' i ruq'oral i rub'an taqe i sahchb'al k'uxliis. Re' taqe nimaq wach sahchb'al k'uxliis i rub'an ma' awach ta inreqwik chi riij. 6Re' reh intaaq'anik cho reh suutz' chinaah i wach ak'al. Re' re' intaaq'anik cho reh i musjab', i runimaal jab' chinaah i wach ak'al, 7reh chi re' taqe i tinamit ma' kielik ta chik reje riij kipaat, reh chi nkikoj rehtaal chi re' Dios wilik rajaawriik chub'aan taqe re'. 8Eh re' taqe chikop kiokik pan kijuul ar inkikeb'aa' kiib'. 9Eh pansak'aaj reje ree i rookb'aal i q'iij inchalik i kowlaj teew, eh pantz'eet reh i rookb'aal q'iij inchalik i k'uxik. 10Re' wo' Dios intaaq'anik reh noq i rutoy riib' i ha', eh kijoot'ik chu'nchel i runimaal ha'. 11Re' wo' reh inyej-anik reh i suutz'. Eh ruuk' i ruch'aab' i kahoq i rukaaj reje i suutz'. 12Eh re' Dios intaaq'anik keh i suutz' noq ki-ik'ik chupaam i taxaaj k'ul kiooj chinaah i wach ak'al, inki a'n wo' taqe i rutaq'aaj wii'. 13Wilik noq re' Dios i rutaq'aaj chee jab', i rutaq'aaj chee teew, b'amb'al otob'il keh i wilkeeb' wach ak'al, i rutaq'aaj taqe chaloq i re' q'ilb'al keh i tinamit. 14Chab'iraj i hat Job, xti chakoj rehtaal taqe i sahchb'al k'uxliis i rub'an i Dios. 15¿Mi aweht'al i hat nik' wach noq i rub'an taqe re'? ¿Mi aweht'al i hat nik' wach noq i ruyeew chee ruch'aab' i kahoq pan suutz'? 16¿Mi aweht'al i hat nik' wach noq i ruyeew chi b'ehik i suutz'? ¿Mi aweht'al re' hat nik' wach noq i rub'an taqe i runimaal wach sahchb'al k'uxliis? 17¿Mi aweht'al i hat chib'ih reet noq tz'a' i nawik'raaj noq re' Dios i rutaq'aaj chaloq i teew inchalik pansak'aaj reje reh i rookb'aal q'iij? 18¿Mi xatow re' Dios i hat chi ruyejeb'jiik i taxaaj? ¿Mi xatow re' chi rutinamiit reh chi xkahnik chi je' jino'q ch'ihch' inreprotik? 19Wila' re' hat aweht'al, cha q'or qeh chib'ih i naa qa q'orom reh i Dios, ruum re' hoj ma' inqareq ta chi riij, q'equm chi qawach. 20Re' hin ma' jaruuj inwaaj nub'anam nuk'utaaj ruuk' i Dios chi hoj k'ulwach ruuk'. Ruum wixnub'an nee naq i rusach nuwach. 21Noq inik'ik i teew i resaj i suutz' chuwach i q'iij, ma' awach taj ineerukuy rilariik inaq'wach i q'iij. 22Noq i nelik chaloq i q'iij, re' taxaaj pantz'eet reje reh i rookb'aal q'iij, xa je' chik holwochiil i xti manlik oro. Ar inqakoj rehtaal i runimaal i ruloq'il i Dios. 23Re' hoj ma' inqareq ta chi riij taqe i rub'an i Dios nim rajaawriik. Re' reh kow riib', eh korik wach ruk'ux. Ruum chi korik wach ruk'ux ma' awach taj i rub'an ti' k'axik reh. 24Ruum aj re', re' taqe i tinamit inkiyohleej wach. Chuwach i reh ma' xta kiokik wii' i wilik kina'ojb'al, inki i Eliú.

will be added

X\