JOB 36

1Re' Eliú je' wo' chik wilik i xuq'or reh i Job. 2Chawuy-eej pee k'isinoq ko wilik i naa nuch'ob'om rub'ehel aweh. Ko wilik i naa nuq'orom chi ko'lb'al riij i Dios. 3Ruuk' i runimaal wach nuna'ojb'al i nuq'or aweh chi re' nuDios tz'uhk'risanik cho weh wilik reet noq i ruyeew i ti' k'axik cha naah. 4Re' hin korik i nuq'or aweh, ma' re' ta chukuj q'orik. Re' hin wilik nuna'ojb'al ruum aj re' k'ahchi' taqe nuq'orom aweh i wili: 5Re' Dios xti nim rajaawriik, eh wilik runa'ojb'al, ma' ruq'eb' ta taqe i korik wach ruk'ux. 6Eh i rusach kiwach i yiib' wach kina'ojb'al. Eh parub'ehel i ruq'at i q'orik chikinaah i neb'aa'. 7Eh juneliik irutoob'eej taqe i korik wach kik'ux. Re' wo' reh inye'wik keh pan kiye'aab' i reey, i ruyeew q'ab' chi inye'arik kiloq'il. 8Xa re' la' noq wilik i ti' k'axik inkik'ul ruum i ma' holohik taj inki a'n 9Re' Dios ink'uhtanik keh chi ma' holohik ta i k'ahchi' keeb'. Eh ruk'uhtaaj wo' keh chi q'e' inkinimb'isaj kiwach. 10Eh i ruq'oreej taqe reh kiq'ilariik, reh chi neenkikanaa' rub'aan i yiib' wach na'ojb'al. 11Wila' xkinimaj inq'orarik keh, wixkik'am naah naa kianam rusuqkiil kik'achariik korehtaal chik i kikimiik. 12Eh wila' ma' xkinimaj i xq'orarik keh ruum i Dios naa kikanteesjiik reje ruuk' q'aslaj ch'ihch' chi ma' naa ta kireqem chi riij aha' wilik iraaj i Dios. 13Re' taqe i yiib' wach kina'ojb'al, inchalik kik'aah. Atoob' ta panti' k'axik wilkeeb' xama' inkipahqaaj ta wo' kitoob'jiik ree Dios. 14Re' taqe re' naa kikimiik reje pan kik'ijolaal, naakik'uhtaam kikixb'ilaal pan kik'achariik. 15Ruum i ti' k'axik inkik'ul, re' Dios i ruk'uhtaaj keh i chi ma' holohik taj i k'ahchi' keeb', xa reh naq chi neenkireq chi riij. 16Re' hat Job re' Dios nee wo' naq tiresaj chupaam i ti' k'axik. Nee naq tiruyeew chupaam i ye'aab' q'e' holohik. Ma' nee ta naq chik inak'ul i ti'. Eh nee wo' i ruyeew i chib'ih aweh chi xiik' naah k'ihaal. 17Re' hat k'ahchi' ak'ulum i tojb'al amahk, ma' ruk'ul taj chi ma' nee ta ruq'at i q'orik cha naah, eh chi ma' nee ta tiruyeew chutojariik amahk. 18Chawikraaj awiib' maa chih tiruchej ruum rujosq'iil, ni xata naq chik ruuk' ruk'ihaal tumiin neenako'leej awiib' chuwach. 19Re' ab'ehomal ma' jaruuj neetiresaj chupaam i ti' k'axik wilkaat wii', atoob' ta neenak'er aachii' atoob' ta wilik awajaawriik. 20Ma' k'ax wach i ruq'equmaal i mahk. Re' noq insahchik kiwach pan kiye'aab' i tinamit. 21Chawik'raaj awiib' maa a'n chik i yiib' wach na'ojb'al. Yu'naak k'ahchi' ak'ulum i ti' k'axik reh chi ma' nee ta chik ti mahkunik. 22Chakoj rehtaal chi re' Dios xiik' naah runimaal rajaawriik, ma' jino'q chik i aj tijoom chi je' rukab' i reh. 23Eh ma' kota awach inq'orik reh chib'ih taqe rub'an. Ma' awach ta wo' nee nq'orik reh chi ma' holohik taj i xub'an. 24Chu'nchel i kiye'wik ruloq'il taqe i rub'an. Je' wo' hat chayeew wo' ruloq'il taqe i rub'an. 25Eh chu'nchel i tinamit kikojwik rehtaal taqe i rub'an, atoob' ta xa chi najt inkilow chaloq. 26Re' Dios xiik' naah nimaal wach, re' hoj ma' inqareq ta chi riij taqe rub'an. Eh wilik chi juneliik ma' xta rutohq'iik chaloq, eh ma' xtarukuxiik wach. 27Re' Dios ruuk' i rajaawriik rumol wach i ha' pan jinaj ye'aab', chi riij i re' rusutej chi jab'. 28Re' reh i rusutej chi jab' i suutz'. Re' jab' i ruyeew cho chikinaah chu'nchel i k'achareel wilkeeb' wach ak'al. 29¿Mi wilik jino'q i naab'inik reh nik' wach noq imb'ehik i suutz'? ¿Mi wilik i naab'inik reh nik' wach noq inq'orik chee kahoq? 30Re' Dios i rusihq'eej cho paam i taxaaj ruuk' i ruch'aab' kahoq. Eh re' ruchamiil i palaw inkahnik panq'equm. 31Ruuk' taqe rub'an re' re' i ruyeew chib'ih keh i tinamit, eh i ruyeew wo' k'uxumb'al keh. 32Re' wo' reh intaaq'anik chinaah i kahoq, re' wo' reh inq'orik reh aha' naa rupoq'iik. 33Eh noq impoq' i kahoq ink'utinik chi ma' suq ta ruk'ux i Dios ruuk' chib'ih imb'aan. Noq i rutaq'aaj chee kowlaj teew jab' ar ink'utinik chi k'ahchi' rujosq'iil.

will be added

X\