JOB 35

1Re' Eliú je' wo' chik wili i xuq'or reh i Job: 2¿Mi nakapaaj re' hat chi holohik inaq'or chi naq'or chi ma' xta mahk chuwach i Dios? 3Re' hat je' wili i xaq'or reh i Dios: ¿Chib'ih inawaaj reh i hat i nub'an? ¿Mi wilik tiruchej re' hat i mahk i nub'an i hin? tiki. 4Re' hin naa kaat nuchaq'weem i hat, je' wo' taqe awamigo wilkeeb' awuuk'. 5Titz'ehtanoq johtoq pan taxaaj chakoj rehtaal chi re' suutz' yohb'aal wach najtiil wilik johtoq cha naah. 6Wila' xat mahkunik i hat, ¿Mi wilik neenawuchej i Dios? Atoob' ta yohb'aal wach i mahk neena a'n, ¿Mi wilik neenawuchej i Dios? 7Eh wi korik wach ak'ux, ¿Chib'ih i neeruk'ax i Dios? ¿Mi neerub'an chi nee nayeew k'isinoq chib'ih reh i Dios i hat? 8¿Mi re' re' i tokoom neenajot' ruuk' amahk? Eh wiholohik i na'ojb'al, ¿Mi tokoom re' i nee nayeew chi suq? 9Re' taqe re' k'erik kichii' ruum i ti' k'axik, eh k'ahchi' kisik'im awach naa ruko'liniik keh pan kiq'ab' i nimaq kajaawriik. 10Xa re' la' ma' inkisik' taj i Dios ixtz'uhkrisanik keh re' ineenye'wik rusuqkiil kik'ux chupaam i ti' k'axik. 11Ma' inkisik' taj i Dios inye'wik na'ojb'al. Re' intijinik qeh chi korik chikiwach taqe i chikop kib'ehik wach ak'al, je' wo' hoq i kirupinik pan taxaaj. 12Eh inkik'er wo' naq kichii' chupahqaljiik i rotob'il i Dios xama' kitoob'jiik ta wo' hoq, ruum yiib' wach i kina'ojb'al. 13Xti korik wo' hoq chi re' i Dios nim rajaawriik xama' rib'iraj ta wo' hoq inkipahqaaj ruum ma' chu'nchel ta kik'ux inkipahqaaj. 14¿Mi kore' chik re' hat Job neetirib'iraj chee Dios ruum k'ahchi' aq'orom chi ma' tirutob'eej taj? Chawuy-eej peet, re' reh reht'al chib'ih i k'ahchi' aq'orom. 15Re' hat inaq'or chi re' Dios ma' inchalik ta rujosq'iil, eh chi ma' ruyeew ta taqe chutojariik i kimahk taqe i aj mahk. 16Re' hat Job re' taqe naq'or xama' xta nokik wii'. Ma' xta ana'ojb'al ruum aj re' xayohb'aal wach inaq'or, chi xama' xta rub'ehel, inki.

will be added

X\