JOB 33

1Je' re' noq re' hat Job chab'iraj i naa nuq'orom xti chakoj rehtaal chib'ih i naa nuq'orom aweh. 2Re' hin naa wokiik chuq'orariik ruuk' ju' waaq' nik' nimaal i wilik panuk'ux. 3Eh chu'nchel i naa nuq'orom aweh re' i korik, eh naa nuq'orom chu'nchel nuk'ux. 4Re' i QaJaaw Dios xyej-anik weh, re' wo' reh xye'wik nuk'achariik. 5Re' hat kinachaq'weej wila' i ruyeew riib'. Eh cha kapaaj riij chi korik naa kiin achaq'weem wii'. 6Chi re' hin, chi re' hat xa eliik qawach chuwach i Dios ruum xa ch'uwa' ak'al wo' xoj korjik wii' i hat, eh je' wo' hin. 7Re' hat mat yo'jik chi nuwach, ruum re' hin ma' xta wajaawriik cha naah. 8Re' hin xb'iraj chi korik chib'ih i xaq'or xb'iraj noq xaq'or taqe i q'orik wili: 9Re' hin saq wach i wánima, ma' xta numahk, ma' xtaj i yiib' wach na'ojb'al i nub'an. 10Xa re' la' re' Dios i ruyeew chee ti' k'axik chi nunaah, xi rukoj chi je' hin ixowan wach. 11Je' naa xulutz' pan chee' kab'chel i wanuch'ehk noq xuyeew chee ti' k'axik chi nunaah, eh k'ahchi' rilom chu'nchel i nub'an, tiki. 12Re' hin i nuq'or aweh chi re' taqe xaq'or re' re' ma' holohik taj, ruum re' Dios xiik' naah nimaal wach chuwach i xa winaq. 13¿Chib'ih reet noq i nawech'uj i Dios? ¿Chib'ih reet noq inaq'or chi ma' ruyeew ta chaaweh inapahqaaj reh? 14Re' QaJaaw Dios xanik' wach ruq'orob'jiik i winaq i rub'an xa re' la' re' reh ma' rukoj ta rehtaal. 15Wilik noq re' Dios i ruq'oreej i winaq paruwiriik, parusaq wiriik, pantaq chaq'ab', noq suq kiwiriik. 16Eh i ruq'or reh chib'ih i naa rub'anam, eh i rukoj runa'ojb'al. 17Reh chi naa rukanaam i yiib' wach i rub'an, eh chi ma' nee ta runimb'isaj riib'. 18Ma' rukanaa' taj chi neensahchik wach, i ruko'leej la' chuwach i kimik. 19Wilik wo' pech noq re' Dios i rukoj runa'ojb'al ruuk' yab'ilaal, ruuk' i ruti'kiil chu'nchel i ruti'jolal. 20Eh i rukanaa' i wi'k ruum, atoob' ta xiik' naah suq kiil i k'uxumb'al reh. 21Inkahnik chi ma' xta chik rutib'kaal wach i ruti'jolal, ink'utinik chik i koq i rub'aqil. 22Xa ma' rukuy ta chik xakimik chik reh noq i rik'raaj. 23Xa re' la' wilik ta jino'q i raj taqareel i Dios reht'al k'utaaj nee naq i ruch'ob' rub'ehel reh chib'ih i naa rub'anam. 24Nee naq i ruq'or ree Dios chi chuketelaaj wach, reh chi ma' nee ta inkimik neeruko'leej. 25Re' winaq nee naq ink'aachjik ruuk' i ruyab'ilaal, nee naq inkahnik chi ma' xta reet je' rukab' i parak'uniil. 26Neerub'an rutiij chuwach i Dios nee wo' ye'arik reh chib'ih i neerupahqaaj. Eh suq suq ruk'ux noq nee rureq i rotob'il i Dios, naa wo' chik ruk'ulum i rotob'il i Dios i winaq. 27Eh nee ruq'or chi je' wili: Re' hin ximahkunik, xnub'an i ma' holohik taj, xa re' la' re' Dios ma' xiruyeew ta chi tojariik inumahk, je' naq rukab' i ruk'ul chi weh. 28Xiruko'leej la' chuwach i kimik, je' re' noq kok'achalkiin, inko'q. 29Je' taqe re' rub'an i Dios ruuk' i winaq k'ih pech i rub'an ruuk' chi ko'lb'al reh. 30Je' re' noq i ruko'leej chuwach i kimik i rukanaa' chi k'acharik ayu' wach ak'al. 31Re' hat Job cha kanaa' i q'orik chab'iraj chi korik k'ahchi' nuq'orom aweh. 32Wila' wilik i naa aq'orom k'uhtb'al reh chi ma' xta mahk cha q'or, re' hin neenukoj rehtaal mi korik chi ma' xta amahk. 33Eh wila' ma' chih i naa aq'orom, chab'iraj i naa nuq'orom aweh. Re' hin neenukoj ana'ojb'al, inki i Eliú.

will be added

X\