JOB 32

1Re' taqe ixib' chi winaq xkikanaa' kiwech'um i Job ruum xkilow chi kow ruk'ux chuq'orariik chi ma' xta ru mahk. 2Eh ar xwihik jinaj i winaq Eliú rub'ihnaal, rak'uun i Baracel aj ar Buz. Re' i Eliú ma' tokoom ta ruuk' i Ram q'e' xchalik ruk'aah chinaah i Job, ruum xrilow chi kow i ruq'or chi ma' xta ru mahk xukoj panaah i Dios i ti' k'axik k'ahchi' ruk'ulum. 3Re' Eliú xchalik wo' ruk'aah chikinaah ixib' chi ramigo i Job, ruum ma' xichol ta ruch'aweesjiik taqe i xuq'or i Job. Eh ma' xuk'ul ta ruk'ux chi re' Job xukoj panaah i Dios i ti' k'axik k'ahchi' ruk'ulum. 4Re' Eliú xruy-eej chi xkikohlaaj i q'orik ruuk' i Job taqe ixib' chi ramigo, ruum re' reh ko ak'un chikiwach i keh. 5Ruum chi xukoj rehtaal i Eliú chi ma' xkireq ta chik chi riij nik' wach ruchaq'weesjiik xkian i Job taqe ixib' chi winaq ma' k'isiin ta xchalik i ruk'aah. 6Je' wili i xuq'or keh: Re' hin, kohin taq k'isiin chawach ruum aj re' xinyo'jik chi q'orariik ixwaaj naq nuq'orom. Panuk'ux i hin naa taq acholiik ruchaq'weesjiik i Job, ruum hat taq chik rijib' chi nuwach. 7Re' hin je' wili xnuq'or: Kiq'oroq peet ruum re' re' mama' winaq chik taqe chi nuwach, eh wilik kina'ojb'al, kinki. 8Korik wo' hoq chi chu'nchel i winaq wilik kina'ojb'al, ruum re' Dios nim rajaawriik xye'wik keh i kuxlab'al. 9Xa re' la' ma' xata wo' re' taqe i k'ihkihab'ul wilik runa'ojb'al, ma' ruum ta chi rijib' chik taqe nee rureq chi riij taqe i korik. 10Je' aj re' noq re' hin naa nuq'oriik, eh chab'iraj taq i naa nuq'orom ruum re' hin wilik wo' nuna'ojb'al. 11Re' hin xwuy-eej chib'ih taq i xaq'or, eh i wech'inik taq xa a'n ruuk' i Job xwuy-eej chi xasik' naq taq i chihooj laj q'orik reh i ruchaq'weesjiik. 12Xa re' la' xnukoj rehtaal chi ma' jino'q taq aweh i hat xub'an ruchaq'weesjiik chi korik i Job. 13Re' taq i hat ma' ruk'ul ta chi nee taq inaq'or chi wilik ana'ojb'al. Ruum ma' xat chol ta taq ruch'aqweesjiik i Job, xa re' wo' Dios inchol ruchaq'weesjiik. 14Re' Job ma' re' ta wuuk' i hin k'ahchi' chi k'utaaj. Eh ma' nee ta wo' nuq'or i hin chi nee nuchaq'weej chib'ih i ruq'or, je' rukab' i xa a'n taq i hat. 15Re' i hat Job re' taqe ixib' chi awamigo wili xiyo'jik ruum ma' xichol ta ruch'aqweesjiik chib'ih i xaq'or. 16Re' hin xwuy-eej naq chi naa kiq'oriik xa re' la' xama' xiq'orik ta wo' hoq. 17Ruum aj re', re' hin naa nuq'oriik naa nuq'orom chib'ih inwaaj nuq'orom. 18Ruum re' hin nujinaq panwánima i q'orik xanwaaj chik ruq'orariik. 19Je' inche xanaa chik nuk'eriik noq inwik'raaj ruum xanwotow chik ruq'orariik, xa je' chik rukab' noq ink'er i ak'tz'uhuum inye'arik wii' i ak' riis uuva. 20Ruum aj re' naa nuq'orom nik' nimaal i wilik panwánima. Eh ruk'ul chi naa kaat nuchaq'weem. 21Ma' awach taj i tokoom rilariik naa nub'anam ma' awach taj i naa nuye'em runimaal wach. 22Korik chi ma' awach taj i tokoom rilariik xnub'an, ruum wixnub'an i je' re', re' Dios chi jumehq'iil neekiruyeew chutojariik i numahk.

will be added

X\