1 Re' Job je' wili i xuq'or: Re' hin xnuq'or i xti korik chi ma' naa ta nuk'axam kiwach i kok' q'ahxoq. 2 Ruum wixnub'an i re', ¿Chib'ih otob'il neerub'an weh i Dios wilik cho pan taxaaj? ¿Chib'ih ta wo' inchel i nukooch nee ruyeew weh i Dios wilik cho pan taxaaj? 3 ¿Mi ma' re' naq re' i yiib' wach runa'ojb'al, i aj mahk naa ruk'ulwiik reh taqe i ti' k'axik wili? 4 ¿Mi ma' rilow cho re' i Dios chib'ih taqe i k'ahchi' nub'anam? ¿Mi ma' rukojom rehtaal re' chu'nchel i nub'an? 5 Re' hin xti korik i nuq'or chi ma' xnub'an taj i chukuj q'orik, eh ma' nik' ta wo' xnujot' jino'q i tokoom. 6 Neeta naq i rutz'ir riij i na'ojb'al i QaJaaw Dios nee naq i rukoj rehtaal chi korik wo' hoq chi ma' xta numahk. 7 Eh wila' xnukanaa' i korik laj b'eeh wila' xnuk'ax wach b'ehomal, wila' xwelq'aaj tokoom aj eh. 8 Neerub'an chi tokoom taqe neen k'uxwik reh i wach inutik, eh neenkichuq i nutik. 9 Wila' xnuyeew q'ab' chi xirujot' jino'q ixoq wila' xnuk'ax wach i rehk'een i nuka'jaah nuk'ula't. 10 Neerub'an chi re' wehk'een neenk'amarik pan ke'k ruum i tokoom winaq, neerub'an chi neen wirik ruuk' i winaq re' re'. 11 Eh wita xnub'an taqe mahk re' re' i ruk'ul naq chi nee kinkiyeew chi tojariik i numahk taqe i q'atal q'orik. 12 Je' naq rukab' i q'aaq' noq neenchalik chi nunaah chi sachb'al wach taqe i chib'ih jariik, nee naq i rusach wach chu'nchel i chib'ih weh. 13 Eh noq re' taqe i numoso winaq, i numoso ixoq inkipahqaaj weh chib'ih inkaaj xnuyeew keh. 14 Wita ma' je' re' ¿Chib'ih naq i nee nu ch'aqweej wii' i Dios noq neerupahqaaj? ¿Chib'ih naq i neenuko'leej wii' wiib' noq neeruq'at i q'orik chi nunaah? 15 ¿Mi ma' re' wo' re' Dios xtz'uhkrisanik cho weh re' hin? ¿Mi ma' re' wo' re' i Dios tz'uk'risanik cho kekeh? 16 Re' hin ma' nik' ta xnukanaa' kitoob'jiik taqe i neb'aa'. Eh ma' xnukanaa' ta wo' taqe i neb'aa' ixoq kamnaq kib'ahiil chi xkikuy kiwa' kihaa'. 17 Re' hin ma' nik' ta xnub'an nuwa' nuhaa' xa chi wib'il wiib' chi ma' ta xwunej taqe i ma' xta kituut kajaaw. 18 Xinwihik chi je' kajaaw taqe i ma' xta kituut kajaaw, ruum kopan nuk'isinal taqe xtohq'ik cho nutob'eem. Eh xnutob'eej taqe chaloq i neb'aa' ixoq kamnaq kib'ahiil. 19 Noq inwilow i hin jino'q i ma' xta ruso' i nuyeew reh, noq inwilow jino'q chi ma' xta b'urb'al riib' i nuyeew wo' reh. 20 Atoob' ta ma' xkit'iosej weh re' hin weht'al chi xnuyeew keh i rismaal kiij taqe i nutentzuun reh chi xkib'ur kiib' chi reh. 21 Re' hin ma' junriim xnub'an ti' k'axik keh i ma' xta kituut kajaaw, atoob' ta weht'al wo' naq chi neenuko'leej wiib' chikiwach i q'atal q'orik panookb'al. 22 Wila' ma' korik i k'ahchi' nuq'orom neerub'an chi nee kib'oq paruye'aab' i nutileb', eh neerub'an chi neentoq i nutz'ihk. 23 Re' hin ma' xnub'an ta taqe i yiib' wach na'ojb'al, ruum ma' xwaaj ta chi nee ruyeew chee rujosq'iil i Dios chi nunaah. 24 Re' hin ma' nik' ta nuyeew nuk'ux chinaah i tumiin, ma' nik' ta xnuch'ikaa' i nuk'ux chinaah i manlik oro. 25 Re' hin ma' nik' ta xsuuqb'ik nuk'ux chi riij i ma' k'isa b'ehomal, eh chi ma' k'isiin i chib'ih weh xwihik. 26 Re' hin i nukoj rehtaal i q'iij noq xan saqumanik chik i rub'an, eh inwilow i poh noq xasaqum chik wach. 27 Eh re' hin ni xata chi q'eeqmaal xnuloq'ej taqe. Eh ma' xnutz'ub' ta wo' johtoq i nuq'ab' chikiwach. 28 Wita xnub'an taqe i mahk re' re' i ruk'ul naq chi naa nuk'ulum i tojb'al numahk, ruum xnuq'eb' naq i rajaawriik i Dios wilik pan taxaaj. 29 Re' hin ma' junriim xsuuqb'ik nuk'ux noq xkik'ul i ti' k'axik i ki-ixowanik nuwach. Eh ma' xsuuqb'ik ta wo' nuk'ux noq xi wihik pan k'axkiil. 30 Ma' junriim xin mahkunik chi nupahqaaj i ma' holohik taj chikinaah. Eh ma' nik' ta xnupahqaaj kikimiik. 31 Re' taqe i aj b'iyajo chi korik chi juneliik naq i nuyeew kiwa' i kiponik panupaat. 32 Re' taqe i aj b'iyajo xnuyeew kipatal panupaat ma' nik' ta xnuwarsaj taqe pamb'eeh. 33 Je' re' noq re' hin ma' junriim nupoy naah i numahk je' rukab' inki a'n i junch'uq. Ma' nik' ta xnukanaa' pan wánima i numahk. 34 Re' hin ma' nik' ta xinyo'jikruum inkiq'or i tinamit. Eh ma' junriim xnutz'ap wiib' panupaat chi ma' ta chih i xnuq'or ruum tee nuyo'jiik chi xkixow nuwach taqe awach weh. 35 Wilik ta nenib'irinik weh, re' hin ch'iklik nuk'ux ruuk' i Dios nim rajaawriik chi re' reh nee nq'orik reh chi ma' xta numahk. Atoob' ta re' i ki-ixowanik nuwach neenkiq'or chi wilik numahk. 36 Wita korik inkiq'or chi wiij nee naq i nukuy chi neenkiq'or weh chi wilik numahk, nee naq i nuk'am chi je' nukorona wach nunaah. 37 Re' hin nee nuq'or ree Dios chu'nchel i xnub'an. Eh nee kinooj pa'lojoq chuwach chi ma' xta nuyo'jiik, eh chi ma' xta numahk. 38 Re' hin ma' awach taj inwelq'aaj kiye'aab' juneliik i nutoj taqe i kikamanik chupaam i nutik. 39 Eh ma' nik' ta xwelq'aaj i wach i rutik i tokoom, ma' nik' ta xnutib'isaj kik'ux i kamanoom. 40 Wita xnub'an i je' re' ma' xta reet chi k'iix i neenpoq' cho pan nuye'aab' chi jilow i trigo, eh chi kaq k'iix i neenpoq' cho chi jilow i sebada. Ruuk' taqe i q'orik wili xukohlaaj q'orik i Job.
