JOB 30

1Re' Job je' wili xuq'or: Xa re' la' yu'naak kinkikaqse'laaj taqe i ko k'ijolaq chi nuwach. Re' kajaaw i re' ni xata i ruk'ul chi xiye'arik chi kixilak i tz'i' kicha'jinik naq keh i nu chikoop. 2Eh, ¿Chib'ih naq xi kamanik wii' weh i re' kow ta kiib'? Re' taqe re' xama' kow ta wo' kiib'. 3Eh ruum i kine'b'ail, ruum chi ma' xta kiwa' kiooj chi b'ehik chi kutkeel. Kiooj chi wihik chupaam i ye'aab' chiq yuuq' aha' ma' xta wilik. 4Eh inkisik' i k'ahlaj ch'ahn pantaq ch'ahn, eh inkisik' i raa' i chee' enebro inkik'ux chi jilow kiwa'. 5Eh ma' ajwaal ta kiwach kuum i tinamit. K'erik kichii' chikiij noq kajimam, je' rukab' inki a'n reh i ajileq'. 6Re' taqe re' xiooj chi wihik chupaam taqe paat ab'aj, pantaq jul, pantaq hoop paam ak'al. 7Eh k'erik kichii' chi ri'sil taqe i chee' ruum kiwa' inkimol kiib' chi ri'sil taqe i k'iix. 8Re' keh ma' xta kiokik wii' je' cho ma' xta kituut kajaaw, ma' ruk'ul ta naq chi k'acharik inki a'n panqatinamiit. 9Xa re' la' yu'naak kinki kaqse'laaj, xa se'lb'al inkiq'or chi wiij. 10Ma' inkaaj ta kilom nuwach, ma' inkijil ta cho kiib' wuuk'. Eh inkichuhb'aaj pan naq'nuwach. 11Je' re' inki a'n weh ruum re' Dios xuyeew i rujosq'iil chi nunaah k'ahchi' nuk'ulum i ti' k'axik. Ma' kimponik ta pan naq' kiwach. 12Eh kichalik paruk'ihaal inkiq'or chi wilik numahk. Eh inkaaj kianam ti' k'axik weh, kinkaaj kikansam. 13Eh inkiq'at panub'eeh, xti xankaaj chik kianam weh noq xkilow chi ti' wilkiin. Ma' awach ta q'ilwik keh ruuk' inki a'n weh. 14Junchaliik taqe chi nunaah noq xchalik kian weh i ti' k'axik. 15Re' hin xinyo'jik, ma' xta chik nuloqiil xkahnik, je' naa xiik' ruk'am i kowlaj teew. Re' taqe i chib'ih weh xsahchik kiwach, xa je' inik'ik jinaj suutz'. 16Re' hin xama' nukuy ta chik i wihik wach ak'al. Re' ti' k'axik k'ahchi' rik'iik chi nunaah. 17Re' nuti'kiil imponik wach nub'aqil, ma' inhi'lik ta k'isinoq wach i nu ti'kiil pantaq chaq'ab'. 18Re' Dios je' naa kow k'ahchi' ruchopom chi walaq. Ruuk' i ti' wili je' naa k'ahchi' kiin rujihk'aam ruuk' i nuso'. 19Re' reh je' naa xirukut pan ch'uwa' xa je' chik nukab' i pooq, xa je' chik nukab' i chaaj. 20QaJaaw Dios re' hin nupahqaaj nutoob'jiik aweh, xama' kinab'iraj ta wo' hoq, i nupahqaaj nukuyb'al aweh xama' kinab'iraj ta wo' hoq. 21Re' hat k'ahchi' aye'em cha josq'iil chi nunaah. Ma' k'isiin ta noq k'ahchi' kiin awik'sam chi ti'. 22Naa rusacham nuwach i ti' k'axik k'ahchi' kiin rik'iik ruk'amam i teew, k'ahchi' kiin rik'iik ruk'amam i teew jab'. 23Re' hin weht'al noq k'ahchi' kiin ak'amam pankimik. Eh inawaaj chi naawojiik chupaam i ye'aab' kiooj wii' chu'nchel i kamnaq. 24¿Mi ma' nutob'eej taqe re' i neb'aa'? ¿Mi ma' wesaj taqe chupaam re' kiti'kiil noq inkipahqaaj otob'il weh? 25¿Mi ma' xinoq'ik chikiij re' i ti' wilkeeb', mi ma' xnuketelaaj kiwach re' i ma' xta wilik keh? 26Eh noq k'ahchi' naq wuy-eem i holohik, re' chik i ti' k'axik chalik chi nunaah. Noq k'ahchi' naq wuy-eem i saqum, re' chik i q'equm xchalik chi nunaah. 27Re' hin juneliik ti' nuk'ux, ruum xa re' i ti' k'axik inchalik chi nunaah. 28Re' hin juneliik ti' nuk'ux, ma' aha' ta nureq rusuqkiil nuk'ux. Eh i nupahqaaj nutoob'jiik keh i ruk'ihaal ma' awach taj intoob'inik weh. 29Xinkikanaa' chi wutkeel, xin kahnik chi je' nukab' taqe i xojb' je' nukab' taqe i nimaq chikop wilik kixiik' avestruz kib'ihnaal. 30Eh k'ahchi' kisalojiik iloq i nuti'jolal, xan q'aq'ik chik i wiij i nwik'raaj ruum i tz'a' chi wiij. 31Re' hin q'e' naq i rusuqb'isaj nuk'ux i q'ooj arpa, je' wo' i xuul q'ooj, eh yu'naak xsutinik chi ruti'kiil k'uxliis, inki i Job.

will be added

X\