JOB 29

1Re' Job je' wili i xuq'or: 2Q'e' naq chihooj chi nee ta wo' chik kinsutinik chupaam taqe i q'iij hin ik'inaq cho wii', noq re' Dios kohin cho rucha'jeem. 3Re' noq kok'ahchi' naq rusaquumb'isam paam i nukapeb'aal, eh kok'ahchi' naq rusaquumb'isam paam i nub'eeh, reh chi ma' nee ta chik kinb'ehiik panq'equm. 4Eh je' naq rukab' noq xnub'an cho rusuqkiil i nuk'ijolal. Noq re' naq i Dios incha'jinik keh i awach weh panupaat. 5Re' noq kok'ahchi' naq kiin rutob'eem i Dios nim rajaawriik, noq ko wilkeeb' naq wuuk' panupaat taqe i wak'uun wixq'uun. 6Re' noq ma' k'isiin naq i lecha inwesaj keh nu chikoop. Eh ma' k'isiin naq i aseite i ruyeew weh ab'aj inke'jik wii' i wach olivo. 7Eh noq kinooj naq pan tinamit i hin kinooj naq tz'uhnoq chi kixilak taqe i wuch k'amal rub'eeh tinamit. 8Re' taqe k'ijolaq kielik naq panub'eeh ye'b'al wajaawriik. Re' taqe i rijib' chik taqe inkipab'aa' naq kiib' noq kinkik'ul. 9Eh re' taqe i nimaq kiwach inkikanaa' naq i q'orik noq inkilow nuwach, inkitz'ap naq i kichii' ruuk' kiq'ab'. 10Re' taqe i k'amal b'eeh atoob' ta nimaq kajaawriik ma' kiq'orik ta chik noq kinokik i koq chi kixilak ye'b'al wajaawriik. 11Eh re' taqe i tinamit ki-ib'irinik naq reh i nuq'or je' wili inkiq'or: atoob' inche reh, inki taqe. Eh re' taqe i ki-ilwik naq reh taqe i nub'an holohik kiq'orik chi wiij. 12Ruum re' hin inutob'eej naq taqe i ma' xta kituut kajaaw, je' wo' taqe i neb'aa', ma' awach ta naq intoob'inik keh. 13Eh noq i nutob'eej naq taqe i ti' wilkeeb', re' holohik inkipahqaaj chi nunaah. Eh i nuyeew wo' naq rusuqkiil kik'ux i neb'aa' ixoq kamnaq kib'ahiil. 14Juneliik xnub'an chi korik wach nuk'ux, xnub'an i rub'ehel, xi kamanik weh chi xa je' chik rukab' i nuso' nukojom chi wiij eqal eqal. 15Re' hin juneliik naq i nutob'eej taqe i moywach je' wo' taqe i chelej riib' noq kib'ehik. 16Xa je' naq chik hin kajaaw taqe inkaaj toob'jik. Hin naq ko'len keh i tokoom tinamit. 17Re' hin inwesaj naq i kajaawriik i yiib' wach kina'ojb'al, je' naq i nupaxej i wach keh i nuq'uch naq pan kiq'ab' inki a'n ti' k'axik reh. 18Re' hin je' naq wili nuq'or panuk'ux: Re' hin yohb'aal wach najtiil naa nuk'achariik, eh noq hin chik rijib' panupaat naa nukimiik. 19Re' hin q'e' suq nuk'ux je' nukab' i juniwal chi chee' tikooj chii' rooq ha', xa eliik rax wach i xaq ruum i raab' suutz' inqajik chaq'ab'. 20Juneliik naakiye'em runimaal nuwach, juneliik naa ruwihiik nukowiil kinki panuk'ux. 21Eh chu'nchel naq ki-ib'irinik weh, xa nkiyeew naq chik i kixikin noq i nukoj kina'ojb'al. 22Noq i nukohlaaj q'orik ma' jino'q naq inq'orik i ma' holohik taj chi riij, xasuq chik inkib'iraj. 23Eh juneliik naq inkuy-eej i nuq'oral, je' rukab' noq inuyub'jik i jab' pan siq'jil. 24Eh noq ti' naq kik'ux re' naq i hin kinye'wik rusuqkiil kik'ux. Ruum i rusuqkiil kik'ux i nuyeew inkoowjik naq kik'ux. 25Eh re' naq i hin kinq'orik keh chib'ih i naa kianam. Re' naq i hin kik'amwik kib'eeh je' hin jinaj reey ink'amwik b'eeh chikiwach i ru soldado. Noq ti' kik'ux re' i hin kinye'wik rusuqkiil kik'ux, inki Job.

will be added

X\