JOB 28

1Re' Job je' wili xuq'or: Wilik i ye'aab' inkan wii' i plata, wilik i ye'aab' i nelik wii' i ruch'uwa'iil i oro. 2Eh re' ch'ihch' panak'al inkan inkorjik wii'. Re' i q'an ch'ihch' ab'aj ink'atarik noq inkorjik. 3Re' taqe winaq ma' kiyo'jik taj chi qajik chupaam i ye'aab' q'equm paam chi rusik'ariik i k'ih taq tz'aaq ab'aj. Kiqajik paruchamiil chusik'ariik holohaq ab'aj inkiyeew kiib' pankimik. 4Eh panteew t'uyulkeeb' ruuk' laso noq kiqajik qohoq noq inkik'ot i chaam laj jul, chupaam taqe ye'aab' ma' awach taj i ki-ik'ik chupaam. Eh kutkeel inki a'n i kamanik ar najt ruuk' i tinamit. 5Chinaah ak'al i nelik i trigo, eh chi ri'sil ak'al inkan i holohaq ab'aj xan reprotik chik xa je' chik q'aaq'. 6Eh chi ri'sil ak'al inkan i holohaq ab'aj zafiro, eh ar wo' inkan i oro. 7Eh ni xata re' ooloch', ni xata re' k'uch i kiponik chupaam taqe i chaamlaj jul re' re'. 8Eh ma' ki-ik'ik ta wo' ar taqe i josq'laj chikop, ni xata re' i kaq b'ahlam ki-ik'ik ar. 9Re' taqe winaq inkipaxej i kowlaj ab'aj, eh inkik'ot i chaamlaj jul. 10Eh inkik'ot i jul chi ri'sil i yuuq' k'ixkaab', ar inkireq i xa chib'ih jariik k'ih taq tz'aaq. 11Eh inkisik' cho paraasb'al taqe i ha' i xa chib'ih jariik ma' nilarik ta naq kiwach. 12Xa re' la' ¿Awach aj uuk' inkireq i kina'ojb'al? ¿Awach inkireq chi riij rub'aan? 13Eh re' na'ojb'al re' re' ruuk' i Dios inchalik yohb'aal wach k'ihaal tz'aaq, ma' awach ta uuk' neenkan ayu' wach ak'al. 14Eh ma' nee ta inkan chupaam i chaam laj jul. Eh ma' nee ta wo' inkan chupaam i palaw. 15Eh ni xata neenloq'arik ruuk' oro, ni xata neenloq'arik ruuk' plata. 16Ma' nee ta wo' nloq'arik ruuk' i manlik oro inkan ar Ofir. Ni xata neenloq'arik ruuk' i holohaq ab'aj ónice, ruuk' i holohaq zafiro. 17Re' na'ojb'al re' re' ma' nee ta pajarik ruuk' oro ruuk' i holohaq ab'aj kireprotik. Eh ma' nee ta rub'an chi neenjal wach ruuk' i xa chib'ih jariik manlik oro. 18Re' nimaq wach na'ojb'al re' re' xiik' naah k'ihaal tz'aaq chuwach i holohaq ab'aj koral, chuwach i ab'aj xan reprotik chik, eh chuwach i taqe i holohaq ab'aj perla. 19Eh ma' nee ta impajarik ruuk' i holohaq ab'aj topacio inkan ar Etiopía. Ni xata neerub'an chi neenloq'arik ruuk' i manlik oro. 20Eh, ¿Awach aj uuk' inkireq i nimaq wach na'ojb'al re' re'? ¿Aha' inkireq chi riij rub'aan? 21Ruum re' taqe na'ojb'al re' re' ke'lik chikiwach i wilkeeb' chinaah i wach ak'al, ke'lik wo' chikiwach i chikop kirupinik pan taxaaj. 22Re' taqe ye'aab' kamnaq, taqe kamnaq xkib'iraj chi wilik taqe i na'ojb'al re' re' xa re' la' ma' xkinab'eej taj aha' inkan. 23Eh re' Dios reh reht'al chi xa ruuk' wo' reh inkan taqe na'ojb'al re' re', eh chi xa ruuk' wo' reh inkan i rukowiil kik'ux. 24Re' reh reht'al chu'nchel imb'aan chinaah i wach ak'al. Eh reht'al chu'nchel chib'ih i wilik wach ak'al. 25Eh re' reh impajwik i ransil i teew, re' wo' reh impajwik iransil i ha'. 26Re' wo' reh impab'anik reh i jab' q'iij, re' wo' reh inq'orik reh i ruch'aab' i kahoq aha' naa rik'iik. 27Re' Dios xukoj rehtaal chi re' nimaq wach na'ojb'al wilik ruloq'il, wilik kamaj. Eh re' reh xuq'or chi ma' xta reet, xuyeew rajaawriik. 28Eh je' wili i xuq'or keh i tinamit. Re' raa' ri'sil i holohik laj na'ojb'al re' i ruyohljiik nuwach i hin. Eh re' rureqariik chi riij rub'aan i holohik, re' i rukanab'jiik rub'aan i yiib' wach chi b'anarik, inki i Dios.

will be added

X\