JOB 27

1Re' Job je' wo' chik wili i xuq'or: 2Re' Dios k'achlik i ma' re' ta parub'ehel k'ahchi' ruq'atam i q'orik chi nunaah. Re' i Dios i k'ahchi' rub'aniik ti' k'axik weh. 3Re' hin nik' pa' chik najtiil naa ruye'em cho nuk'achariik, nee ruyeew cho wuxlab'al i Dios. 4Re' hin ma' jaruuj naa nuchukum i q'orik, eh ma' nee ta wo' i nutz'aq wach i q'orik. 5Eh nik' chik najtiil i nuk'achariik, ma' jaruuj naa nuq'orom chi korik inkiq'or chi wiij, juneliik la' naa nuq'rom chi re' hin ma' xta numahk. 6Re' hin ma' jaruuj naa nukanaam ruq'orariik chi korik wach nuk'ux, ruum ma' xtaj i yiib' wach nub'anam chi nee ruk'uhtaaj nuk'ixb'ilaal. 7Neeta naq kiye'ariik chutojariik i kimahk i ki-ixowanik nuwach, je' rukab' noq kiye'ariik chutojariik i kimahk i yiib' wach kina'ojb'al. 8¿Mi wilik i ch'iklik reje wii' ruk'ux i yiib' wach runa'ojb'al? ¿Mi wilik neeruko'leej wii' riib' noq neenehteesjik i ruk'achariik ruum i Dios? 9Eh noq neen wihik panti' k'axik ¿Mi neenib'irjik chee rutiij ruum i Dios noq neerupahqaaj rutoob'jiik? 10¿Mi nee rureq rusuqkiil ruk'ux ruuk' i Dios nim rajaawriik? ¿Mi neerub'an chi eliik nee ruq'oreej i Dios parutiij? 11Re' hin naa taq nuk'uhtaam aweh taqe i ruyejaam wach i Dios nim rajaawriik, ma' nee ta taq i nupoy chawach chib'ih taqe rub'an. 12Eh wila' re' taq i hat awilom taq chik chib'ih taqe rub'an ¿Chib'ih reet noq inaq'or taq i q'orik xama' xta ruk'am chaloq? inki Job. 13Re' Zofar je' wili xuq'or: Re' QaJaaw Dios nim rajaawriik naa ruye'em taqe chutojariik i kimahk i yiib' wach kina'ojb'al, taqe i xama' awach ta imponik chikiwach. 14Atoob' ta yohb'aal wach k'ihaal i kak'uun naa rukuxiik kikimiik panq'aq'inik. Eh re' taqe i kok' kiha'lak'uun ma' naa ta kireqem kiwa'. 15Eh re' taqe i ma' naa ta kikimiik ruum taqe re' kaq yab'ilaal naa rukansaniik keh, eh ma' naa ta kooq'jiik kuum i kehk'een naa kikanaam. 16Atoob' ta yohb'aal wach i kitumiin neenkimol wach xa je' chik intuhb'ik pooq, atoob' ta yohb'aal wach i kiso' neenkimol wach. 17Re' i korik wach ruk'ux neemb'anik rusuqkiil i kitumiin. Re' jino'q i korik wach ruk'ux naa rukojwiik reh i kiso'. 18Re' yiib' wach runa'ojb'al ma' holohik taj rupaat xuyejaa', xa je' rukab' i perpat xaq chee' naah re' ruuk' inkamanik chi cha'jalb'al ab'iix. 19Re' b'ehoom naa ruponiik i q'iij chi suq ruk'ux noq naa ruwiriik qohoq, eh noq narik'raam riib' parusaq'iik ma' xta chik i wilik reh. 20Naa ruchaliik jinaj runimaal yo'jik chinaah pan q'iij runimaal kaq suut teew naa ruchaliik chinaah chaq'ab'. 21Eh jinaj i runimaal teew naa ruchaliik pareelb'aal q'iij, re' re' naa rik'iik esanoq reh paruye'aab'. 22Re' Dios naa ruye'em i runimaal teew chinaah i winaq re' re', eh noq naa naq chik ruko'leem riib' chuwach xama' naa ta wo' chik ruko'leem riib'. 23Eh noq naa rusahchiik wach, re' tinamit naakipoq'poteem paam i kiq'ab', eh chu'nchel naakixub'iniik reh, inki.

will be added

X\