JOB 26

1Re' Job je' wili ruchaq'weesjiik xub'an: 2¿Mi je' wili rutoob'jiik xa a'n i xama' rukuy ta chik i ti' wilik wii'? ¿Mi je' wili rutoob'jiik xa a'n i xama' xta chik k'isinoq ransil? 3¿Mi nakapaaj re' hat chi tichol rukojariik runa'ojb'al, chi tichol rutijiik i ma' xta runa'ojb'al? 4¿Awach xtoob'inik aweh chuq'orariik taqe xaq'or? ¿Aha' wilik uxlab'al xq'orik panawánima chi xaq'or taqe q'orik re' re'? inki. 5Re' Bildad je' wili xuq'or: Re' taqe kamnaq xakib'arb'otik chik ruum kiyo'jiik chupaam i ye'aab' wilik chi ri'sil i ha', chi ri'sil i aak'al. 6Re' i kiye'aab' i kamnaq ma' panke'lik ta wilik chuwach i Dios, ruum chuwach i reh ma' xtaj i ke'lik. 7Re' i QaJaaw Dios xuyejaa' i taxaaj xa panteew wilik. Eh xuyejaa' i wach ak'al xa panteew wilik. 8Eh re' reh i rumol wach i ha' chinaah i suutz', re' suutz' ma' nk'er ta ruum i rahliil. 9Eh i ruq'equmrisaj wach i poh ruuk' i q'equm paam suutz'. 10Eh xuch'aq i ha' ruuk' ak'al, eh xuch'aq i saqum ruuk' i q'equm. 11Noq kow inq'orik i Dios re' taqe yuuq' ch'iklik wii' i taxaaj kik'uyu'jik pan kiye'aab' ruum i kiyo'jiik chuwach. 12Eh ruuk' i rajaawriik i ruq'il i palaw, noq yohb'aal wach i rujosq'iil i palaw i rupab'aa' wo' hoq. 13Xa ruuk' i rajaawiik xresaj taqe i suutz' pan taxaaj. Re' wo' reh xyej-anik reh i aaq' wilik runa'ojb'al chi jot'ooj. 14Re' Dios yohb'aal wach i rajaawriik, re' k'ahchi' nuq'orom wili, xa re' tik'isiin qeht'al. Koyohb'aal la' wach taqe i rub'anam komajaa' inqanab'eej, re' hoj xama' jaruuj ta wo' naqareqem chi riij i runimaal i rajaawriik i reh, inki.

will be added

X\