1 Re' Job je' wili ruchaq'weesjiik xub'an: 2 Yu'naak i hin naa wo' chik wokiik chi q'orik chi xiik' naah ti'kiil nuk'ux. Ruum re' i QaJaaw Dios xiik' naah i ti' k'axik k'ahchi' ruye'em cho chinaah. 3 Ma' xta naq reet chi weht'al taj aha' wilik i Dios, nee naq inooj nuq'oreej chupaam i ruye'aab'. 4 Re' hin nee naq i nuq'or reh chi ma' xta numahk, ruuk' naq nuq'oral neenuko'leej wiib'. 5 Re' hin nee naq i nunab'eej chib'ih nee kiruchaq'weej wii', inwaaj naq nunab'eem chib'ih i nee ruq'or. 6 Re' reh nim rajaawriik, xa re' la' ma' ruum ta naq i re' ma' nee ta kirib'iraj. Nee la' naq i ruyeew weh chib'ih i neenupahqaaj reh. 7 Noq nee naq i nub'an nuk'utaaj ruuk' i reh nee naq i rureq chi riij chi ma' xta numahk. Eh nee naq kiresaj chupaam i ti' k'axik chi jumpech. 8 Xa re' la' re' hin inooj nusik' i Dios i nelik cho wii' i q'iij, ma' nureq taj. Eh inooj nusik' inokik wii' i q'iij ma' nureq ta wo' hoq. 9 Eh noq inooj nusik' pantz'eet reh i rookb'aal q'iij ma' nureq taj, eh noq inooj nusik' pansak'aaj reh i rookb'aal q'iij xama' nureq ta wo' hoq. 10 Re' reh noq neerutz'ir riij i nunimaniik, nee rukoj rehtaal, chi ma' xta numahk je' rukab' i oro ma' xta ruch'uwa'iil wach. 11 Re' hin juneliik i nub'an chib'ih jariik iraaj i reh, eh ma' nukanaam taj i rub'eeh. 12 Eh ma' nukanaam ta wo' rub'aan taqe i ruq'or i ruk'uhb'aal. Juneliik wo' naa nub'anam i kirutaq'aaj wii' i reh. 13 Eh noq i ruyejaa' wach chib'ih i naa rub'anam i rub'an wo' hoq, ma' awach ta nee nq'orik reh chi ma' nee ta rub'an. 14 Re' reh naa wo' rub'anam wuuk' i ruyejaam wach. Chib'ih pa' chik jariik taqe iraaj rub'anam wuuk' nee wo' rub'an. 15 Ruum aj re', re' hin kinyo'jik ruum, eh noq i nukapaaj riij chib'ih taqe rub'an yohb'aal wach noq inchalik nuyo'jiik. 16 Je' re' noq re' i QaJaaw Dios nim rajaawriik yohb'aal wach i nuyo'jiik k'ahchi' ruye'em. 17 ¿Chib'ih inchi reet noq ma' xiruyeew chi kimik i QaJaaw Dios? Wita xin kimik reje ma' k'ahchi' ta naq nuk'ulum i ti' k'axik wili, inki Job.
