JOB 22

1Re' Elifaz aj ar Temán je' wili ruchaq'weesjiik i Job xub'an: 2¿Mi neen kamanik reh i Dios i winaq? Ma' chih taj re' wilik runa'ojb'al xa reh wo' reh naa rukamaniik i runa'ojb'al chi rib'il riib'. 3¿Mi suuqb'ik ta wo' ruk'ux i Dios nim rajaawriik noq re' hat korik wach ak'ux? ¿Mi wilik i neeruk'ax i reh chi re' hat wilik ana'ojb'al? 4¿Mi ruum chi korik wach ak'ux re' i ruyeew cho cha naah i ti' k'axik wili eh i ruq'at i q'orik cha naah? 5¿Mi ma' ruum chi xiik' naah yib'kiil wach tib'anik re'? ¿Mi ma' ruum chixiik'naah amahk re'? 6Re' hat inapahqaaj keh aawas achaaq' chi naakikanaam i chib'ih keh noq inki a'n kikemeel awuuk', eh inaq'uch i kiso' taqe i neb'aa'. 7Re' hat ma' nayeew ta kihaa' i chiqiij kichii', ma' nayeew ta kiwa' i kinuhmik 8Re' hat xa a'n wo' naq rub'aan ruum wilik aloq'il, nim awajaawriik, eh wilik panaq'ab' i b'ehomal. 9Eh ma' xta xasiij keh i neb'aa' ixoq kamnaq kib'ahiil. Eh xa a'n ti' k'axik keh i ma' xta kituut kajaaw. 10Ruum aj re' k'ahchi' ak'ulum i ti' k'axik yu'naak, ma' k'isiin taj ayo'jiik inchalik ruum. 11Eh panq'equm wilkaat ruum i ti' k'axik. Xa je' chik k'achi' awojiik qohoq chupaam i ruchamiil ha' ruum i ti' k'axik. 12¿Mi ma' re', re' i Dios wilik cho kopan taxaaj xti nim rajaawriik? Re' taqe ch'umiil pan taxaaj wilkeeb', xa re' wo' reh nim rajaawriik chikiwach i re'. 13¿Chib'ih reet noq inaq'or i hat chi re' Dios ma' rilow taj chib'ih imb'aan? ¿Chib'ih reet noq inaq'or chi re' Dios ma' rilow taj imb'aan panke'lik? 14Re' hat inaq'or chi re' suutz' impoywik wach chuwach i Dios i mahk imb'aan. Xanaah re', re' Dios i rilow chu'nchel imb'aan. 15¿Mi konawaaj a'nam re' hat yiib' wach na'ojb'al je' rukab' i kianam chee yiib' wach kina'ojb'al? 16Re' keh xa chi jumehq'iil xikimik reje, je' naa kowlaj rooq ha' xk'amwik reje keh noq xsahchik kiwach. 17Eh je' wili i xkiq'or reh i Dios: ¿Chib'ih nee qoh atoob'eej wii' i hat? Re' hoj wilik chu'nchel i chib'ih qeh, inki taqe reh i Dios nim rajaawriik. 18¿Chib'ih reet noq inkiq'or chi je' re'? ¿Mi ma' re', re' i Dios inye'wik i chib'ih keh? Re' hin ma' nureq ta chi riij chib'ih reet noq inkiq'or chi je' re'. 19Eh noq inkik'ul i ti' k'axik taqe re', re' i korik wach kik'ux insuuqb'ik kik'ux. Eh re' taqe i ma' xta kimahk naakise'laniik je' wili i naa kiq'orom: 20Re' taqe i ki-ixowanik qawach, xsacharik kiwach. Xsahchik wach chu'nchel i chib'ih keh ruum q'aaq' inko'q taqe. 21Chak'am wo' chik awiib' panotob'il ruuk' i QaJaaw Dios. Chi je' re' nee wo' chik inwihik rusuqkiil ak'ux, eh nee ti elik korik. 22Chayeew q'ab' reh i Dios chi nee ruk'uhtaaj aweh i korik. Eh chamol panawánima i ruk'uhb'aal. 23Wila' re' hat xanimaj wo' chik i QaJaaw Dios nim rajaawriik. Wila' xaloch' awiib' chuwach, re' reh neetiresaj chupaam i ti' k'axik wilkaat wii'. 24Chakanaa' ruk'axariik wach i oro q'e' holohik, xa je' chik inilarik ak'al cha a'n, oon xa je' chik inilarik ab'aj wilik panim ha' cha a'n. 25Re' QaJaaw Dios neenko'linik aweh, re' chik i reh xiik' naah loq'il chawach. Eh re' chik i reh naa rukahniik chi jilow aa oro. 26Eh re' reh naa ruye'wiik rusuqkiil ak'ux, ruuk' chik i reh naa-ach'ikaam ak'ux 27Wila' xapahqaaj reh chib'ih inawaaj nee ruyeew aweh. Eh re' hat naa wo' aye'em reh i xaq'or reh chinaa-aye'em reh. 28Eh chib'ih jariik i naa ayejaam wach naa reliik korik chawach. Chu'nchel ina-a'nam naa aweliik korik ruuk'. 29Ruum re' i QaJaaw Dios i resaj i rajaawriik awach i q'e' nim wach i rub'an riib'. Eh i ruko'leej awach i xama' nim ta wach i rub'an riib'. 30Eh re' reh neenko'linik aweh i hat wila' saq wach awánima, wila' korik chi ma' xta amahk, inki Elifaz.

will be added

X\