JOB 21

1Re' Job je' wili ruchaq'weesjiik xub'an: 2Chab'iraj taq i naa nuq'orom, wila' xinab'iraj taq neench'iklojik nuk'ux. 3Chakuy taq rib'irjiik taqe i naa nuq'orom, chi riij i re' nee taq kinakaqse'laaj wila' xawaaj taq. 4Re' hin ma' re' ta ruuk' jino'q i winaq k'ahchi' kiin chi peleto, ruum aj re' rub'ehel chi ti' nuk'ux. 5Wila' xakoj taq rehtaal i naa nuq'orom nee taq ti kahnik meem ruum ayo'jiik. 6Eh noq intohq'ik nukapaam riij i hin i k'ahchi' nuk'ulum, yohb'aal wach inchalik nuyo'jiik, xa kinb'arb'otik chik ruum. 7¿Chib'ih reet noq re' taqe i yiib' wach kina'ojb'al najt kik'achariik, korehtaal kirijb'ik, eh yohb'aal wach kib'ehomal? 8Korehtaal inkilow noq ink'ihik i kiih kimaam, eh suq wilkeeb'. 9Eh ma' awach tamb'anik ti' k'axik keh i awach keh pankipaat. Ma' imb'aan ta wo' ti' k'axik keh ruum i Dios. 10Eh noq kik'onik i ki imas wakax xanoq wo' inwihik kak'uun ruuk' i ki ixoq wakax, eh ma' kikimik taj noq ki-aasjik. 11Re' taqe i kak'uun kixq'uun xakipisk'anik chik chik'onik, xa je' chik rukab' inki a'n i kok' rak'uun tentzun. 12Noq inkib'iraj i q'ooj arpa, i q'ooj tamb'oor, i q'ooj inhuupjik paam, xakipisk'anik chik pankooq ruum i rusuqkiil kik'ux. 13Noq kik'acharik ayu' wach ak'al, ma' k'isiin i chib'ih keh inwihik. Eh ma' xta ti' inkilow wach noq kikimik reje. 14Eh je' wili inkiq'or reh i Dios: Qoh akanaa' chi qutkeel, re' hoj ma' nqaaj ta b'ehik panab'eeh. 15¿Awach i Dios re' re' nim rajaawriik reh chi neenqakamaneej wach? ¿Chib'ih inenqak'ax ruuk' chi neenqa'an qatiij chuwach? inki taqe. 16Re' keh inkikapaaj chi pan kiq'ab' wilik chu'nchel i rusuqkiil kik'ux. Eh re' hin ma' jaruuj neenukapaaj chi je' rukab' inkikapaaj i keh. 17Re' taqe yiib' wach kina'ojb'al. ¿Mi esamaj junriim-oq chikiwach i kib'ehomal? ¿Mi kik'ulum junriim-oq i ti' k'axik? ¿Mi ruye'em junriim-oq i rujosq'iil i Dios chikinaah? 18¿Jank'al nilarik chi nkitukej kiib', je' rukab' noq ink'amarik reje i sohk' ruum i kaq suut teew? chi je' rukab' noq ink'amarik reje i rutuus ixiim ruum i kaq suut teew. 19¿Mi ma' inkiq'or re' chi re' taqe i aj mahk re' kak'uun kixq'uun intojwik wach inki a'n? Re' hin i nuq'or chi ma' chih taj, re' la' wo' taqe i aj mahk naakitojwiik wach, reh chi neenkitijeej. 20I ruk'ul wo' hoq chi re' keh naakitojwiik riij i kimahk. Eh i ruk'ul chi naa ruye'em chee rujosq'iil i Dios chikinaah. 21¿Chib'ih ta wo' chik inkaaj reh chib'ih i nee ruk'ul i kak'uun kixq'uun koq'uun noq kamnaq chik taqe reje i keh? 22¿Mi wilik jino'q re' i neerub'an chi nee rutaq'aaj i Dios ruuk' i chib'ih neerub'an? ¿Mi ma' re' re' i reh inq'atwik i q'orik chikinaah i wilik kajaawriik? 23Wilik taqe i suq suq kik'ux chi riij i chib'ih keh, suq wilkeeb', ma' xta ruti'kiil kik'ux noq kikimik reje. 24Eh yohb'aal wach i chib'ih keh, kow i kooq kiq'ab'. 25Xa re' la' wilik wo' taqe i xa eliik ti' kik'ux. Eh kikimik reje chi ma' inki a'n ta k'isinoq rusuqkiil i kik'achariik. 26Xa re' la' noq kamnaq chik taqe reje kiooj panjul, eliik wach inkik'ul, ink'uxarik i kiti'jolal kuum i haah. 27Eh re' hin weht'al chib'ih inakapaaj chi wiij taq i hat, weht'al chi wilik i yiib' wach na'ojb'al inakapaaj taq chi wiij. 28Re' hin weht'al chi napahqaaj taq chawach chi je' wili: ¿Chib'ih i ruk'ul i rupaat i winaq re' re'? ¿Chib'ih i xuk'ul i winaq re' re' yiib' wach i runa'ojb'al? tiki taq. 29¿Mi ma' napahqaaj taq keh re' taqe i ki-ik'ik pamb'eeh? ¿Mi ma' nab'iraj taq keh re' chib'ih inkiq'or? 30Noq inchalik i rujosq'iil i Dios i ruyeew chee ti' k'axik chikinaah tinamit. Eh re' yiib' wach kina'ojb'al keh ma' xta nkik'ul. 31¿Mi wilik ineenq'orik keh chi ma' holohik taj inki a'n? ¿Mi wilik ineenye'wik keh chutojariik i kimahk, je' rukab' i ruk'ul chi keh? 32Eh noq kikimik reje kicha'jaljiik, chi riij i re' kiooj muq'ub'joq. 33Noq kiooj muhqoq yohb'aal wach i tinamit inuhch'ihlinik keh wilik i peet chikiwach wilik i xam chikiij. Eh intz'aparik qohoq kinaah chi ma' kow ta laj ak'al. 34Re' hin i nuq'or chi ma' xta taq ana'ojb'al, ruum rusuqkiil nuk'ux inchalik taq nayeew noq inaq'or. Xanaah re' chu'nchel taq inaq'or xachukuj q'orik, inki.

will be added

X\