JOB 20

1Re' Zofar aj ar Naamat, je' wili ruchaq'weesjiik i Job xub'an: 2Re' hin kinqaaj kapeew ruuk' taqe inaq'or ruum aj re' naa nuchaq'weem aweh. 3Ruuk' taqe aq'oral xinab'aj noq xwik'raaj, xa re' la' re' hin weht'al nik' wach naa kaat nuchaq'weem wii'. 4¿Mi ma' aweht'al re' hat chi xa re' wo' rutz'uhkriik chee winaq ayu' wach ak'al? 5¿Chi re' i yiib' wach runa'ojb'al xama' najt ta wo' inwihik rusuqkiil ruk'ux xa junk'aam wo' tii? 6Atoob' ta xiik' naah nimaal i rajaawriik i rub'an riib'. Atoob' ta imponik pan taxaaj i runimaal wach i rub'an riib'. 7Xa je' insahchik wach i rusaa' i reh noq naa rusahchiik wach. Eh re' ineht'alinik wach je' wili i naa kiq'orom: ¿Aha' inche xooj sahchoq wach? inko'q taqe chi riij. 8Naa rusahchiik wach je' rukab' noq insahchik wach inilarik wach panwirik, xa je' rukab' noq insahchik wach inilarik wach pansaq wirik. 9Awach taqe i kieht'alinik wach ma' naa ta chik kilom wach, eh ma' naa ta wo' chik rusutiniik cho parupaat chi jumpech. 10Eh re' taqe i rak'uun rixq'uun naa kipahqaam kiwa' keh i neb'aa', naa wo' chik kisutem taqe i chib'ih jariik relq'aam chaloq i reh. 11Eh xti ko parusuqkiil i ruk'ijolal wilik noq naa rukimiik reje. 12Atoob' ta imponik chuwach rub'aan i yiib' wach na'ojb'al, xa je' chik i suq atoob' noq i rik'raaj. 13Je' naa ruyeew junk'aam-oq panchii' reh chi rik'raaj rusuqkiil. 14Xa re' la' noq imponik chupaam i xa je' chik rukab' i rukiih i aaq'. 15Yohb'aal wach i rub'ehomal xarelq'aaj ruuk' i tokoom. Xa re' la' naa rehtesjiik chuwach ruum i Dios. 16Eh xanaa rukansam riib' ruuk' i ruyiib' wach na'ojb'al, je' naa ruk'ej reh i rukiih i aaq'. 17Eh xama' naa ta wo' rub'anam rusuqkiil i suq atoob' i nelik chi yohb'aal wach chinaah i wach ak'al. 18Chu'nchel i rukamaj ma' naa ta rub'anam rusuqkiil, ruum chu'nchel relq'aam ruuk' tokoom, naa ruye'em jilow. 19Xukanaa' chi ma' xta wilik keh i neb'aa' xrelq'aaj i chib'ih keh. Eh xuchop kinaah i paat ma' re' tee reh xyej-anik reh. 20Ma' inmanlojik ta reh i chib'ih reh koyohb'aal wach, i ruman iraaj. 21Ma' awach taj i ruko'leej riib' chuwach ruum aj i re' xama' naj ta naa ruwihiik rub'ehomal. 22Eh noq ma' k'isiin chik i wilik reh, naa ruchaliik i ti' k'axik chinaah. Q'e' ti' i naa ruk'ulum pan kiq'ab' i yiib' wach kina'ojb'al. 23Noq yohb'aal chik wach i chib'ih reh wilik. Re' Dios naa ruye'em chee rujosq'iil chinaah, naa ruye'em chutojariik i ru mahk. 24Atoob' ta neeruko'leej riib' chuwach i ch'ihch' kantesb'al, re' chik i flecha re' ruuk' i q'an ch'ihch' naa rub'aniik reh. 25Je' naa flecha i naa rokiik paruti'jolal, je' naa rik'iik chi juntar, naa rik'iik reqaroq i ránima. Eh yohb'aal wach noq naa ruchaliik ruyo'jiik. 26Parunimaal q'equm naa ruwihiik, q'aaq' i naa ruye'ariik cho chinaah ruum i Dios. Junk'ahtiik naa rub'aan ruuk' chu'nchel i chib'ih reh parupaat. 27Re' taxaaj naa rureqwiik chi riij chi wilik ru mahk. Eh re' wach ak'al naa kiq'oriik chi korik chi wilik ru mahk. 28Eh chu'nchel i rub'ehomal naa rusahchiik wach noq naa ruye'em rujosq'iil i Dios chinaah. 29Re' Dios xuq'or chi je' re' i naa ruk'ulum i yiib' wach runa'ojb'al. Q'orooj chi je' re' i naa ruk'ulum noq naa rojiik kuxoq, inki Zofar.

will be added

X\