JOB 2

1Exponic wo' chik i q'iij chi xooj kimol kiib' i ánjel chuwach i Dios, chi kixilak taqe re' xponik haa' i aj yahm. 2Re' QaJaaw Dios xupahqaaj reh i aj yahm chi je' wili: ¿Aha' chalik i na a'n i hat? inki reh. Eh re' aj yahm je' wili i chaq'wik xub'an: Re' hin chi junsuut i wach ak'al xin chalik, xnub'ehuj cho paam chu'nchel, inki. 3Re' i QaJaaw Dios xupahqaaj reh i aj yahm chi je' wili: ¿Mi xawil cho wach i waj kamanoom Job rub'ihnaal? Re' reh ma' awach ta chik jino'q i wilik wach ak'al chi je' rukab' i reh. Re' reh holohik i ruk'achariik, korik wach ruk'ux, ma' rub'an ta reh i yiib' wach na'ojb'al. Atoob' ta re' hat xaq'or weh chi naa nuye'em q'ab' chi naa ruk'ulum i ti' k'axik chi xama' xta rub'ehel. 4Re' aj yahm je' wili ruchaq'weesjiik i QaJaaw Dios xub'an: Noq komajaa' chib'ih i ti' ruk'ul i ruti'jolal i winaq xama' xta wo' nee ruq'or. Atoob' ta neeruq'eb' chu'nchel i chib'ih reh chi ko'lb'al riij i ruk'achariik. 5Yu'naak chayeew jino'q i yab'ilaal chinaah i ruti'jolal, konee aj inawil re' mi ma' neetub'aj panaq'awach, inki. 6Re' QaJaaw Dios je' wili ruchaq'weesjiik i aj yahm xub'an: Ma' xta reet cha a'n ruuk' chib'ih inawaaj ruuk' i ruti'jolal xa re' la' maa wesaj i ruk'achariik, inki. 7Chi riij i re' xelik chaloq i aj yahm chuwach i QaJaaw Dios. Xukoj i yiib' wach raxq'aah chi riij i Job, xelik cho koju' rooq, xponik koyejal naah. 8Re' Job xooj rutzunaa' riib' panchaaj, eh xuchop chaloq jinaj i ruxeer xoht ruuk' i re' i ruloch i riij. 9Eh re' Job je' wili i xq'orarik reh ruum i rehk'een: ¿Mi xakok'ahchi' wo' aye'em ak'ux chi nimanik re'? Chab'aj i Dios reh chi nee ti kimik, inki. 10Re' Job je' wili ruchaq'weesjiik i rehk'een xub'an: Re' hat xa je' ti q'orik jino'q ixoq ma' xta runa'ojb'al. Wila' qak'ul i holohik i ruyeew qeh i QaJaaw Dios. ¿Nik' wach noq ma' neenqak'ul i ti' nee ruyeew chi qanaah? inki. Ruuk' chu'nchel i xuk'ul i Job ma' xmahkunik ta ruuk' i ruq'oral. 11Re' Job ixib' i ramigo, re' jinaj Elifaz i rub'ihnaal, aj ar Temán, re' i jinaj Bildad i rub'ihnaal aj ar Sua, re' jinaj Zofar i rub'ihnaal aj ar Naamat. Re' taqe ixib' chi ramigo re' re' xkib'iraj chi re' Job k'ahchi' ruk'ulum i ti' k'axik, junojiik taqe chi rilariik reh chi xooj kiyeew rusuqkiil ruk'ux, eh chi naa kitob'eem. 12Eh noq xkilow reje wach chi najt i Job ma' xkinab'eej ta wach. Noq xkilow chi re' reh, xkik'er kichii' chi oq'ik. Eh xkixih i kiso' chikiij chi kiju'junaal, xkipukej i pooq pan taxaaj xkipukej wach kinaah ruum i ruti'kiil kik'ux. 13Eh xooj kitzunaa' kiib' wach ak'al chucheel i Job, wuquub' q'iij, wuquub' aq'ab' xkian ar, ma' jino'q chi q'orik xkiq'or reh ruum xkilow chi xiik' naah ti'kiil wilik.

will be added

X\