JOB 17

1Eh je' wo' chik wili i xuq'or: Re' hin xa k'axik chik noq i nelik i wuxlaab', xakimik chik weh k'ahchi' chik kiin ruye-eem i nujuul. 2Re' taqe i wilkeeb' wuuk', xa re' i nukaqse'ljiik inki a'n xa re' i ti' k'axik inki a'n weh. 3QaJaaw Dios xa re' wo' hat nee ti q'orik chi ma' xta numahk ruum wii ma' xaq'or i hat ma' awach ta nee nq'orik reh. 4Re' hat xat b'anik keh chi ma' inkireq ta chi riij chib'ih i k'ahchi' nuk'ulum, ruum aj re' maayeew q'ab' chi neenkian weh. 5Awach i ruq'asaj i ramigo pan kiq'ab' inixowanik wach, ti' inakik'ulum taqe i rak'uun rixq'uun. 6Re' wo' hat xat b'anik reh chi chu'nchel i tinamit ma' holohik ta kiq'orik chi wiij, inkichuhb'aaj panaq' nuwach. 7Re' hin k'ahchi' rupohyiik paam i naq'nuwach ruum i ti' k'axik k'ahchi' nuk'ulum xan sutik chik inwilow. 8Re' i korik wach kik'ux insahchik kik'ux ruum i ti' k'ahchi' nuk'ulum. Eh re' i ma' xta ru mahk naa ruq'atam kiwach i yiib' wach kina'ojb'al. 9Re' korik wach ruk'ux naa rojiik chuwach ruuk' i rukorkiil wach ruk'ux chi ma' xta ru mahk, eh re' saq wach i ránima, naa ruwihiik rukowiil ruk'ux. 10Eh re' taq i hat i q'orik taq i na a'n wuuk' ti q'oroq wo' taq chik wila' wilik taq ana'ojb'al, xa re' la' re' hin i nuq'or taq aweh chi ma' jino'q taq aweh i wilik runa'ojb'al. 11Re' hin k'ahchi' rusahchiik wach i nuk'achariik, aha' naq wilik inuyejaa' wach, i nukapaaj rub'aan, ma' naa ta chik nub'anam. 12Re' taq i hat inaq'or taq chi naaweliik chupaam i ruq'equmaal i ti' k'axik wilkiin wii'. Xa re' la' re' hin weht'al chi ma' korik taj. 13Re' k'ahchi' wuy-eem i hin xa re' kimik reh chi naa wojiik hi'loq chupaam i q'equm paam ye'aab'. 14Re' hin i nuq'or chi re' i kiye'aab' kamnaq je' cho wajaaw noq wilik, eh re' taqe haah wilkeeb' ar i nuq'or chi je' cho nutuut, chi je' cho wanaab' taqe. 15¿Mi ko wilik ta wo' i naa nuch'ikaam reje wii' nuk'ux? ¿Mi konaa ta wo' ruwihiik rusuqkiil nuk'ux? 16¿Mi naa ta wo' nuk'amam chi wiij i ch'iklik wii' nuk'ux noq naa nukimiik reje? ¿Mi naa ta wo' rojiik chi wiij chi hi'lik chupaam ak'al?

will be added

X\