JOB 14

1Re' Job je' wili xuq'or: Re' winaq inaasjik ruuk' i rituut xama' najt ta rooq i ruk'achariik, eh xiik' naah i ti' k'axik i rik'ul. 2Re' ruk'achariik, xa je' rukab' noq ink'er i uhtz'ub', eh jumehq'iil inchiqik. Jumehq'iil inooj sahchoq wach, xa je' inik'ik jino'q muuj. 3QaJaaw Dios, ¿Chib'ih reet noq xa re' hin kinayeew panti' k'axik, eh inaq'at i q'orik chi nunaah? 4¿Mi wilik insaqb'isanik wach i ch'uwa' wach? Ma' awach taj. 5Re' hat Xti korik noq aq'atam riij jarub' haab', jarub' poh ink'acharik i winaq ayu' wach ak'al xa ar wo' naa ruponiik. Eh ma' awach ta neenq'atwik wach. 6Wila' xakanaa' chi rutkeel nee nelik i ruk'achariik. Je' re' noq kinahi'lisaj k'isinoq reh chi konee nub'an rusuqkiil i nukamaj noq komajaa' kinkimik. 7Re' chee' reh noq inyok'arik ma' kimik ta rub'an chi jumpech, i nelik wo' chik chaloq rutoxl. 8Atoob' ta rijib' chik i raa', atoob' ta k'ahchi' chik ruq'ahiik i raa' i chee'. 9Noq inqajik chee jab' inraaxb'ik wach. Eh ink'ihaaxb'ik wo' chik i q'ab', kinkahnik chi je' rukab' i chee' kok'ihik i rub'an. 10Eh re' i winaq reh noq inkimik reje insahchik wach chi jumpech ¿Mi eht'alimaj aha' nooj noq inkimik? 11Re' ruha'iil i palaw i sahchik wach, eh re' i nim ha' insahchik wo' wach, inchiqik. 12Je' wo' re' winaq noq inkimik reje ma' naa ta ruwuktiik chaloq noq komajaa' insahchik wach i taxaaj. Ma' naa ta keliik chaloq chupaam i ye'aab' wilkeeb' wii'. 13Re' hin ma' xta naq reet chi nee nukeb'aa' wiib' pan i kiye'aab' kamnaq, korehtaal naq inik'ik aajosq'iil. Re' naq i hat nee ti q'orik jaruuj nee kink'ulik panak'ux. 14Eh re' winaq noq inkimik ¿Mi nee wo' chik ink'aach cho ruka'peech? Re' hin k'ahchi' wuy-eem nik' chik najtiil naa nuk'ulum i ti' k'axik wili, korehtaal kinko'ljik chupaam. 15Chi je' re' nee naq kinaq'oreej i hat, eh re' hin nee naq tib'iraj, eh nee naq insuuqb'ik ak'ux wuuk', ruum re' wo' hat xatz'uhkrisanik cho weh. 16Re' hat inakoj rehtaal chib'ih taqe i k'ahchi' kiin, ma' nakoj ta rehtaal i numahk. 17Eh nee ta naq insahchik panak'ux chu'nchel i numahk. Nee naq inawesaj chu'nchel i ma' holohik taj i xnub'an. 18Re' taqe i yuuq' insahchik kiwach noq kib'oqib'ik, eh re' taqe saqrehp ab'aj i kib'oqib'ik pan kiye'aab'. 19Re' taqe ab'aj kik'uhlik ruum i ha' i nik'ik chikinaah. Eh noq i rub'an i kowlaj jab' intz'ajib'ik wach ak'al. Je' wo' re' noq k'ahchi' asacham wach i winaq i hat i wilik naq ch'iklik reje wii' ruk'ux. 20Re' hat juneliik i nayeew i ti' k'axik chinaah korehtaal i nelik reje ayu' wach ak'al, noq inkimik reje tokoom chik inilwik. 21Eh ma' nee ta chik i runab'eej mi xye'arik kiloq'il i rak'uun rixq'uun. Eh wila' xehteesjik kajaawriik i rak'uun rixq'uun ma' naa ta chik runab'eem. 22Eh xa re' wo' hoq i ruti'kiil i ruti'jolal i reh naa rik'raam, ruch'ihil i ruti'kiil i ránima, inki Job.

will be added

X\