JOB 13

1Chu'nchel i k'ahchi' taq aq'orom re' re' wilom ruuk' naq'nuwach. Eh b'iram ruuk' nuxikin. 2Aha' wilik taq aweht'al i hat weht'al wo' hin. Re' hin ma' qajinaq taj i wajaawriik chuwach taq awajaawriik i hat. 3Xa re' la' re' hin ruuk' i Dios nim rajaawriik inwaaj nuyejaam wach i wili. Ruuk' i reh naa nuq'oriik. 4Re' taq i hat inatz'ap taq naah i korik ruuk' i chukuj q'orik taq i na a'n, xa je' taq akab' i rukoj riib' chi aj iq'omaneel, xama' rub'an ta wo' hoq. 5Ma' xta naq reet chi ma' nee ta taq chik ti q'orik chi jumpech, reh nee naq inak'uhtaaj taq chi wilik ana'ojb'al. 6Cha a'n taq otob'il chab'iraj taq i naa nuq'orom. Eh ti chakoj taq rehtaal i naa nuq'orom chi ko'lb'al wiib'. 7¿Mi riko'ljiik riij i Dios k'ahchi' taq kaat ruuk' i chukuj q'orik taq i na a'n? ¿Mi re' reh inq'orik taq aweh re' i jot'ooj taq i na a'n? 8¿Mi nakapaaj taq re' chi ruuk' taq i na a'n re' re' ruto'ariik taq i Dios i na a'n? ¿Mi nakapaaj taq re' chi ruko'ljiik riij taq k'ahchi' kaat? 9Eh ¿neetarutz'ir riij i Dios taq ana'ojb'al chih naq taq i neena a'n? ¿Mi nee naq taq inachuk ree q'orik je' rukab' noq inchukarik i q'orik reh i xa winaq? 10Re' hin xti korik i nuq'or taq aweh chi kow taq netiruq'il wila' konasik' taq wach inatob'eej. 11Re' taq i hat ma' k'isiin taq neetiyo'jik wila' xakoj taq rehtaal chi wilik ruloq'il. 12Eh chu'nchel taq anajtir na'ojb'al xama' xta nokik wii', xa je' rukab' noq neenawaaj ako'leem awiib' chi riij i tz'aq ak'al. 13Chakanaa' taq i q'orik i hat re' chik i hin naa nuq'oriik, atoob' ta neenchalik i chib'ih jariik chi nunaah, ma' nee ta kinyo'jik. 14Wila' chib'ih i xnuk'ul ank'ul peet. Xa re' la' re' hin naa nuq'orom chib'ih inwaaj nuq'orom. 15Atoob' nee kirukansaj i Dios, xanaa wo' nuye'em nuk'ux ruuk'. Re' hin naa nuq'orom reh i ko'lemb'al wiib'. 16Ruq'iij ruuk' wo' naq i re' nee i nuko'leej wiib' chuwach. Eh jino'q i yiib' wach runa'ojb'al ma' nee ta inq'orik ruuk' i Dios. 17Re' taq i hat xti chab'iraj taq chib'ih i naa nuq'orom, eh chakoj taq rehtaal chi korik. 18Re' hin wilik i naa nuq'orom chi ko'lb'al wiib', ruum weht'al chi ma' xta numahk. 19Eh wila' wilik i xq'orarik reh chi korik chi wilik numahk, ma' xta chik i neenuq'or, i ruk'ul chi nee kinkimik. 20QaJaaw Dios re' hin kiib' wach otob'il i nupahqaaj aweh chi neena a'n cho wuuk' reh chi ma' nee ta nukanaa' aq'orob'jiik. 21Re' chi chawesaj i ti' k'axik chi nunaah, eh re' chi chawesaj i yo'jik chi nunaah. 22QaJaaw Dios kinaq'oreej hat chi peet, re' hin nee ti nuchaq'weej, oon re' hin nee ti nuq'oreej chi peet, re' hat nee kinaachaq'weej. 23Chaq'or weh, ¿Chib'ih i mahk xnub'an chawach? ¿Chib'ih i ma' holohik taj xnub'an chawach? Inwaaj chi nee nak'uhtaaj chi nuwach chib'ih ximahkunik wii' chawach. 24¿Chib'ih reet noq ma' kinawaaj chik kiin awilom? ¿Chib'ih reet noq je' inilarik i nixowanik awach i na a'n weh? 25¿Chib'ih reet noq i na a'n ti' k'axik weh? Re' hin, je' hin xaq chee' inkutarik reje wulu' ruum i teew, eh xa je' nukab' i chiq ch'ahn. 26¿Chib'ih reet noq i nayeew i ti' k'axik chi nunaah, inaq'or chi wilik numahk? ¿Mi kiina ye'em chutojariik re' numahk nub'anam cho pan wak'uniil? 27Je' cho b'ak'alkeeb' kab'chel i wooq ruuk' karena. Ma' xtaj i ruyeew riib' chi nub'an, ruum re' hat eliik k'ahchi' akojom rehtaal chib'ih i nub'an. 28Re' hin k'ahchi' rusahchiik wach i nuti'jolal, je' rukab' noq inq'ahik i xa chib'ih jariik. Je' rukab' itz'ihy noq ink'uxarik ruum ruchopkaal, inki Job.

will be added

X\