JOB 12

1Re' i Job je' wili chaq'wik xub'an: 2Korik chi re' taq i hat pankib'ihnaal i tinamit taq ti q'orik, eh inakapaaj taq i hat, chi noq naa taq akimiik i ma' naa ta chik ruwihiik i na'ojb'al. 3Xa re' la' re' hin wilik wo' nuna'ojb'al. ¿Mi qajinaq re' i wajaawriik i hin chawach taq i hat? ¿Mi ma' awach chik jino'q re' ineenq'orik reh i xaq'or taq i hat? 4Noq xub'an chaloq noq i nub'an nutiij kirib'iraj naq i Qajaaw Dios. Atoob' ta korik wo' naq wach nuk'ux, re' taqe wamigo xa hin kikaqse'lb'aal. 5Awach i rik'raaj chi kow ruk'ux i rixowaaj wach i k'ahchi' ruk'ulum i ti' k'axik. Ma' xta raaj reh chi nee ruyeew ruman i ti' chinaah i k'ahchi' ruk'isimb'iik ruk'ux. 6Re' taqe aj i leq' juneliik suq kik'ux pankipaat. Re' taqe i ma' holohik ta kiq'orik chi riij i Dios ma' xtaj inkik'ul. Inkikapaaj naq chi chu'nchel wilik pan kiq'ab'. 7Re' hat neerub'an chi neenatijej awiib' kuuk' i chikop wilkeeb' pantaq ch'ahn, je' wo' kuuk' i chikop kirupinik pan taxaaj, wilik i neenkik'uhtaaj aweh. 8Chakoj rehtaal chu'nchel i wilkeeb' wach ak'al, je' wo' hoq i kar wilkeeb' pan palaw. Re' keh wilik i neenatijej kuuk'. 9¿Mi ko wilik ta wo' hoq i ma' keht'al taj chi re' Dios xye'wik kik'achariik chu'nchel i re'? 10Re' Dios pan q'ab' wilik i kik'achariik chu'nchel i k'achareel wach ak'al. 11Re' hoj pan qachii' inq'ikraaj rusuqkiil chib'ih i suq atoob' inqak'ux. Je' wo' re' i qaxikin i rub'an rib'irjiik i holohik. 12Re' taqe i mama' winaq wilik kina'ojb'al, ruum chi k'ih chik i kihab'ul wilik chik kina'ojb'al. 13Xa re' la' re' Dios reh xti xiik' wo' chik naah i runa'ojb'al i rajaawriik. Eh re' i ruyejaa' wach i rub'an wo' hoq. 14Eh re' i ruyoj wach i Dios ma' awach ta chik neenyej-anik reh. Eh noq iraaj rub'anam ti' k'axik reh i winaq, ma' awach ta chik neenko'linik reh pan q'ab'. 15Eh wila' ma' xuyeew chik chaloq i jab', chu'nchel neenchiqik. Eh noq i ruyeew wo' chik chaloq i jab', imb'oqib'ik i yuuq' k'ixkaab'. 16Re' Dios wilik rajaawriik, re' reh q'oreel chinaah chu'nchel. Eh pan q'ab' wilkeeb' i kijot'ariik, je' wo' hoq i kib'anik jot'ooj. 17Eh re' wo' reh ineesanik reh i kajaawriik i kikojwik na'ojb'al, eh i ruyoj wo' kina'ojb'al taqe i q'atal q'orik. 18Re' Dios i resaj wo' taqe pan kajaawriik i reey. Re' wo' reh intaaq'anik reje keh pan tokoom tinamit chi ma' xta wilik keh. 19Eh i resaj wo' pan kajaawriik taqe i k'amal kib'eeh aj tiij. Iresaj wo' pan kajaawriik taqe i ajaab'ees. 20Eh i ruq'uch i kiq'oral i kiq'orik reh i korik, eh ruyoj i kikapeb'aal mama' winaq i kikojwik na'ojb'al. 21Re' Dios i ruyeew wo' q'ab' chi ma' inye'arik ta chik kiloq'il i wilik kajaawriik, i resaj wo' kikowiil i q'e' kow inki a'n kiib'. 22Re' reh i ruyeew wo' chi naab'jik taqe i ma' eht'alimaj taj. Eh i resaj wach saqum i ke'lik cho panq'equm. 23Re' i Dios i ruk'ihaaxb'isaj i tinamit, eh i rusach wo' kiwach. Eh i rutukej kiwach, i rumol wo' chik kiwach. 24Eh i rusach kik'ux i k'amal kib'eeh i tinamit. Irusach i kina'ojb'al, je' naa pan jinaj chiq yuuq' i rub'esaj taqe, ruum ma' inkireq ta chik chi riij inki a'n 25Je' panq'equm kib'ehik, ma' inkireq ta chi riij aha' ojik inki a'n xa kitakaklanik chik xa je' chik taqe xohk'reel.

will be added

X\