JOB 11

1Re' Zofar aj ar Naamat je' wili ruchaq'weesjiik i Job xub'an: 2¿Mi ma' neerub'an re' chi neen chaq'weesjik i ma' k'isaq'orik xaq'or? ¿Mi neetikahnik chi ma' xta mahk re' ruum xaq'or ruuk' aachii' chi ma' xta aamahk? 3¿Mi nakapaaj re' hat chi ruuk' i ma' k'isa q'orik i na a'n, neenatz'ap i qachii'? ¿Mi ma' neenak'uhtaaj ak'ixb'ilaal re' wila' xqach'aqweej taqe aweh i xaq'or? 4Re' hat inaq'or chi korik wach ak'ux chi nimanik, eh chi saq wach awánima chuwach i Dios. 5Ma' xta naq reet chi re' i QaJaaw Dios neenchaq'wisanik aweh taqe inaq'or. 6Re' reh nee naq i ruk'uhtaaj aweh i na'ojb'al k'axik chi reqarik chi riij. Ar naq nee nakoj rehtaal chi ma' yohb'aal ta wach i ti' k'axik xuyeew cha naah, je' naq rukab' i ruk'ul cha weh, chi tojb'al riij amahk. 7¿Mi nakapaaj re' hat chi neenareq chi riij i wilik cho paruk'ux i Dios? ¿Mi nakapaaj re' chi nee nareq i rukorkiil wach ruk'ux i QaJaaw Dios nim rajaawriik? 8¿Nik' wach areqem chi riij i runa'ojb'al i Dios ruum ma' xata je' najtiil paam i taxaaj? ¿Nik' wach areqem i rukorkiil wach ruk'ux i Dios? ruum ma' xata je' chamiil paam i kiye'aab' kamnaq. 9Ruum xiik' naah nimaal wach chuwach i runimaal i taxaaj, eh chuwach i runimaal i palaw. 10Wila' re' Dios xraaj ruq'atam i q'orik cha naah ¿Mi wilik jino'q nee nq'orik reh chi ma' nee ta rub'an? 11Re' i QaJaaw Dios reht'al wach taqe i ma' korik ta wach kik'ux. Eh reht'al awach taqe i yiib' wach kina'ojb'al. ¿Oon inakapaaj i hat chi ma' reht'al taj? 12Re' meem laj winaq xama' naa ta wo' rureqem runa'ojb'al chi jumpech, je' rukab' i k'isa b'uurux noq inaasjik ma' tijimaj taj. 13Re' hat chayeew ak'ux chub'anariik i korik, cha pahqaaj reh i Dios chi nee tirutob'eej. 14Wila' wilik i mahk k'ahchi' kaat cha kanaa' rub'aan. Mayeew q'ab' reh i mahk chi neen wihik panapaat. 15Wila' xa a'n chi je' re' ma' xta neetik'ixik wii' nee ti k'acharik chi suq ak'ux chi ma' xta nee tiyo'jik wii'. 16Re' hat sahchoq panak'ux i ti' k'axik k'ahchi' ak'ulum, chi je' re' neenik'ik i ruti'kiil ak'ux, je' rukab' noq inik'ik i ha'. 17Re' aak'achariik neenkahnik chi xa je' chik saqumaal wach i q'iij noq imponik kab'lajora. Eh re' ruq'equmaal paam i ti' k'axik, neenkahnik chi xa je' chik rukab' i saqum noq insaq'ik. 18Re' hat naa ruch'iklojiik ak'ux panak'achariik ruum wilik i k'ahchi' awuy-eem. Eh re' QaJaaw Dios naa rucha'jiniik aweh noq naa awiriik. 19Eh noq naa ahi'liik ma' xta naa ruyohb'isaniik aweh. Eh ma' k'isiin naa kik'uliik sik'woq aweh reh chi naa a'nam otob'il keh. 20Eh re' taqe i yiib' wach kina'ojb'al keh, naa rusahchiik kiwach ma' ha' ta naakiko'leem kiib', xa re' i kimik naakuy-eem, inki i Zofar.

will be added

X\