1 Re' hin xinq'uhtik chik chi k'acharik ayu', naawokiik chi tiij chuwach i Dios naa nuq'orom reh chu'nchel i ruti'kiil nuk'ux. 2 QaJaaw Dios ma' kinayeew chutojariik inumahk chi xa je' wili, cha q'or weh chib'ih ximahkunik wii' chawach. 3 ¿Mi ruk'ul cha weh re' chi k'ahchi' kiin awik'sam chi ti', ruum hat wo' xatz'uhkrisanik cho weh? ¿Chib'ih reet noq re' chik imponik chawach inki a'n i yiib' wach kina'ojb'al? 4 ¿Mi xa je' rukapeew winaq re' akapeew i hat? ¿Mi xa re' wo' naa wilow re' hat aha' wilik i rilow i winaq? 5 ¿Mi naa akimiik reje re' hat chi je' rukab' noq inkimik reje i xa winaq? ¿Mi xama' najt rooq re' aak'achariik i hat? 6 Wila' ma' je' akab' winaq ¿Chib'ih reet noq nakoj numahk? ¿Chib'ih reet noq inasik' i ma' holohik taj chi wiij? 7 Re' hat aweht'al chi ma' xta numahk, eh chi ma' awach ta neenko'linik weh panaq'ab'. 8 Eh re' wo' hat xat yej-anik weh ruuk' aq'ab', eh yu'naak ¿Chib'ih reet noq inawaaj asacham nuwach? 9 K'oloq panak'ux chi ruuk' ak'al xinayejaa' ¿Chib'ih reet noq kinawaaj wo' chik asutem lom chi ak'al? 10 ¿Mi ma' re' hat xatyej-anik weh re' chi je' rukab' noq inkorjik i kexu ruuk' lecha? 11 Eh re' wo' hat xatkojwik inuti'jolal, je' wo' inutz'uhumal, hat xatiqwik wach taqe i nub'aqil, taqe i wib'otz'aal. 12 Eh re' hat xat ye'wik nuk'achariik xaketelaaj nuwach. Re' wo' hat ticha'jinik weh ruum aj re' ko wilik nuk'achariik. 13 Xa re' la' re' hin i nukoj rehtaal chi wilik i ke'lik cho panawánima chi wiij i hin. 14 Re' hat xak'ahchi' akojom wehtaal mi nkimahkunik, reh naq chi nee kinayeew chi tojariik i numahk. 15 Eh wila' wilik numahk xa hin wo' q'ehb'eel. Wila' ma' xta numahk xa k'isiin wo' neensuuqb'ik nuk'ux. Ruum yohb'aal wach i ti' k'axik inuk'ul. 16 Eh wila' xnunimb'isaj wiib' re' hat neetisachwik nuwach, je' rukab' i rub'an i kaq b'ahlam. Eh neena a'n jino'q i ma' ilooj taj i sachb'al nuwach. 17 Wilik taqe i xikojwik numahk, ruum aj re' xjohtik wach aajosq'iil chi nunaah, i na a'n wuuk' je' rukab' noq kiokik chi q'aq'inik i soldado. 18 ¿Chib'ih reet noq xayeew q'ab' chi xin-aasjik? q'e' naq chihooj chi weh wita xin kimik noq komajaa' kin-aasjik. Chi je' re' ma' awach ta naq xnab'inik nuwach. 19 Q'e' naq chihooj chi weh chi xata re' manlik xin-aasjik, eh xinooj ta kimuq'aa', chi je' re' ma' xinwihik ta naq chi jumpech. 20 Re' nuk'achariik xama' najt ta chik rooq, eh i nupahqaaj aweh chi chayeew q'ab' weh chi nee kink'acharik k'isinoq pansuqkiil k'uxliis. 21 Ruum ilook' kinkimik reje ma' jaruuj chik naa nusutiniik chaloq, chupaam i ye'aab' q'equm paam reh ti'kiil k'uxliis. 22 Re' ye'aab' re' re' q'equm paam, xama' paruwii' ta wilik, re' ma' xta wii' saqum, xa juneliik q'equm paam, inki Job.
