ISAIAS 7

1Je' wili xk'ularik noq wilik chi reyil Judá i Acaz rak'uun i Jotam, riih i Uzías. Eh re' i Rezín wilik chi reyil Siria, ruch'ihil i rak'uun i Remalías, Peka i b'ih wilik chi reyil Israel, xiooj naq chi kipletohjiik i aj Jerusaleem, xa re' la' xama' xkian ta wo' okik. 2Eh xponik rib'iral kuuk' i riih rumaam i reey David, je' wili xkiq'or reh i reey Acaz: Re' taqe i aj Siria, i aj Efraín, naa ruchaliik kipletoheem aatinamiit, inki taqe. Eh re' keh xchalik kib'arb'otiik ruum kiyo'jiik. Xa je' chik rukab' noq kik'uyu'jik i nimaq chee' ruum i kowlaj teew. 3Eh re' i QaJaaw Dios je' wili i xuq'or reh i Isaías: Yu'naak i hat awuch'ihil awak'uun Sear-jasub i b'ih, hiy taxaaj inik'ik wii' i rooq ha' tuqlik, ar taq neenareq i reey Acaz chupaam i b'eeh inooj wii' i ha' imb'aan wii' i tz'ajooj. 4Je' wili i neenaq'or reh: Chawik'raaj awiib' maa rub'an kiib' ak'ux, mat yo'jik chuwach i Rezín kireey i aj Siria ruch'ihil i rak'uun Remalias Peka i b'ih, kireey i aj Israel. Re' taqe i yohb'aal wach kijosq'iil re' re' xama' xtaj i naa kianam, xa je' kikab' i ki'ib' chi ju' sii' intzub'ik rusib'eel. 5Re' i kireey i aj Siria ruch'ihil taqe i aj Efraín, ruch'ihil i rak'uun Remalias, xkiyejaa' wach nik' wach noq naa kichaliik chi peleto awuuk', je' wili i xkiq'or: 6Yu'naak taq taq chi peleto kuuk' i aj Judá, neenqachop naah i kiye'aab', neenqakoj ar chi reey i rak'uun i Tabeel, inki taqe. 7Eh re' i QaJaaw Dios je' wili i xuq'or: Re' inkiq'or re' re', ma' jaruuj naa kianam rub'aan, ma' jaruuj taq naa ak'ulum i re'. 8Ruum re' i Siria, re' i tinamit Damasco inchopwik naah. Eh re' i Damasco, re' i tinamit Resín inchopwik naah. Eh re' taqe i riih rumaam i Efraín xa pan ho'oob' rukajwinaq haab' insacharik wach, 9Eh re' i aj Efraín, re' i tinamit Samaria inchopwik naah. Eh re' i wilik chi reyil ar re' rak'uun Remalias Peka b'ih. Eh wila' ma' xat nimanik taq i hat, naa taq ak'ulum aweh je' rukab' i ti' naakik'ulum i aj Efraín, inki. 10Re' i QaJaaw Dios xuq'oreej wo' chik chaloq i Acaz i kireey i aj Judá je' wili i xuq'or reh: 11Re' hin, hin aaDios cha pahqaaj jino'q i ma' ilooj taj nim wach, reh chi neenk'utinik ko paruchamiil i ak'al, oon ko chupaam i runajtiil paam i taxaaj, inki. 12Eh re' i reey Acaz je' wili i xuq'or: Re' hin ma' nee ta nupahqaaj aweh i re' ruum ma' ruk'ul taj chi nee tinupaj inki. 13Eh re' i Isaías je' wili i xuq'or: Chab'iraj taq i hat, i hat taq riih rumaam i reey David: ¿Mi ma' ch'iklojik taq ak'ux re' ruuk' i kijot'ariik i jalal ruq'oral i Dios taq i na a'n, ruum konawaaj wo' taq rujot'ariik i nuDios? 14Eh re' i QaJaaw Dios wilik i rehtalil naa ruk'uhtaam taq chaawach. Re' chi jinaj k'isa q'ahxoq ma' reht'al ta wach q'orinik winaq naa rasjiik jinaj k'isa rak'uun. Emanuel i rub'ihnaal naa rukojom, inki (re' iraaj ruq'orom chi re' Dios wilik quuk') 15Eh xa riis kaab', xa sas la' lecha naa ruk'uxlaam wii' riib' noq naa ruk'ih korehtaal i rureq chi riij i ma' holohik taj, i holohik. 16Eh re' i k'isa k'un noq komajaa' ta rusik' wach i holohik chi xilak i ma' holohik taj. Re' taqe i ki'ib' chi reey inayohleej taq kiwach naa rukahniik chi ma' jino'q chik i i k'achareel naa ruwihiik pan kiye'aab'. 17Eh re' i QaJaaw Dios naa ruye'em i ti' k'axik taq cha naah i hat, chikinaah taq aatinamiit ma' jank'al ta nk'ularik, i rutohq'iik cho ruch'aqam riib' i tinamit Efraín ruuk' i tinamit Judá. Re' i ti' k'axik wili re' i kireey i aj Siria naa ruk'uliik b'anoq. 18Re' QaJaaw Dios naa ruyuq'eem taqe reje i aj Egipto wilkeeb' chi' taq nim ha'. Eh naa ruyuq'eem taqe reje i aj Asiria, eh re' keh je' kichalik nimaq utz', winaq kaab' noq naa kichaliik. 19Re' taqe re' xa je' chik kikab' i nimaq utz', i winaq kaab' noq naakipuhkaam kiib'. Eh naa kojiik pantaq jul, pantaq paat ab'aj, pantaq k'iix, wataq k'im chub'anariik keh i aj Judá. 20Eh re' i QaJaaw Dios chupaam i q'iij re' re' naa ruye'em q'ab' reh i kireey i aj Asiria chi naa ruchaliik rub'anam i ti' k'axik keh, je' na naa rujotzom i rismaal kinaah, i kusinchii', i rismaal pan kisekan. 21Eh chupaam i q'iij re' re', xa jinaj chik chi ixoq wakax, eh xa ki'ib' chik chi ixoq tentzun i naa ruk'isam i jinaj chi winaq. 22Eh nik' chik kik'ihaal i naa kikahniik chi k'achalkeeb', ruuk' chik sas paam lecha, ruuk' riis winaq kaab' naa kik'uxlaam kiib'. 23Eh chupaam i q'iij re' re', re' i ye'aab' i nelik naq wii' i ma' k'isa uuva jinaj miil naq chi tumiin re' ruuk' i plata i tz'aaq, naa rukahniik chi xa kaq k'iix, xa k'iixmoq'ool chik i naa rupoq'iik cho ar. 24Eh konaa chik kik'amam kiflecha noq naa kokiik chupaam i ye'aab' re' re' ruum xa i kaq k'iix, xa k'iixmoq'ool naa rupoq'iik chuwach. 25Eh ma' naa ta chik rub'anam chi naa kab'ixeem wach i ye'aab' re' re', inkab'ixeej naq wach. Ruum re' i ye'aab' re' re', xa ch'ahn chik i naa rupoq'iik chuwach. Xa wakax, xa tentzun chik i naa kianam kiwa' chuwach.

will be added

X\