ISAIAS 63

1¿Awach i kaq ruso' chalik i rub'an ar Bosra, re' wilik cho Edom? ¿Awach i chalik i rub'an chi jumehq'iil xiik' naah holwochiil i ruso' ruuk' i rajaawriik ruuk' i ruloq'il? Re' hin i Dios kink'utjanik parukorkiil, wilik wajaawriik chi ko'linik. 2Wilik kiq'orik weh chi je' wili: ¿Chib'ih reet noq kaq aaso' je' cho xayeq' cho paam i uuva chawooq chi yitz'b'al reh? inki taqe 3Korik re' hin je' wo' naa yitz'ij uuva i nub'an ruum xnuyeq' taqe pan wooq ruum nujosq'iil i ki-ixowanik nuwach, Eh re' i kikik'eel je' naa xt'ahxanik chuwach i nuso', ma' wach ta xtoob'inik weh chub'aan keh. 4Re' hin xanuyejaam naq chik wach chi naa nuq'ajam wach keh i ki-ixowanik nuwach inki a'n Eh chi naa nuko'leem taqe i nutinamiit. 5Eh xwil chi ma' awach ta xtoob'inik weh, chi ma' awach taj i xuk'ul ruk'ux i xnub'an xsahchik nuk'ux. Ruum i nujosq'iil nu kowej wiib', xawutkeel xnub'an keh i aj ixowaal. 6Ruum i nujosq'iil xnub'an keh, xnusach kiwach i tinamit, eh xnuchihkaaj i kikik'eel chinaah i wach ak'al. 7Re' hin inwaaj nuq'orom rib'iral i ruk'axb'al i QaJaaw Dios. Inwaaj nutz'uyem wach ruum i xub'an cho quuk' ruum i ruketeljiik qawach xub'an i hoj, hoj aj Israel. Eh ruum i rotob'il, ruum i runimaal i ruk'axb'al xub'an cho quuk'. 8Re' reh je' wili i xuq'or: Re' re' nutinamiit, wak'uun wixq'uun taqe, ma' ruk'ul ta chi neenkian i ma' imponik ta chi nuwach i hin, inki. Eh re' wo' reh xko'linik keh. 9Re' i QaJaaw Dios inyot'ik i ruk'ux ruum i ti' k'axik xkik'ul aj Israel. Eh re' reh ma' aj taqareel taj i xutaq'aaj chaloq chi kiko'ljiik, re' la' wo' reh xko'linik keh ruum xuketelaaj kiwach, je' rukab' i rub'an cho najtir q'iij. 10Xa re' la' re' keh ma' xkinimaj taj i QaJaaw Dios, xkich'uwa'risaj wach i ruSantohiil. Ruum aj re' ma' x-ajawjik ta chik kiwach ruum i Dios, ruum i re' xb'aan keh ruuk' q'aq'inik. 11Re' keh xk'ulik cho pankik'ux noq xuko'leej chaloq i rutinamiit i Moisés najtir, eh je' wili ixkiq'or: ¿Mi ma' re' re' i Dios xtoob'inik keh i tinamit ruch'ihil i Moisés k'amwik cho kib'eeh noq xi q'ahxik chi juntar i palaw? ¿Mi ma' re' wo' re' reh xuyeew i rusantolaj Uxlab'al keh? 12Re' reh xtoob'inik reh i Moisés ruuk' i loq'laj rajaawriik, re' reh xch'aqwik pan yejaal i palaw noq xik'ik ar i rutinamiit, reh chi xkahnik rib'iral chi juneliik. 13Re' wo' reh xtoob'inik keh i rutinamiit chi ma' xiq'ehb'ik taj noq xik'ik pan palaw. Eh xa je' chik kowiil kib'ehik i kawáyu chupaam i ye'aab' chiq yuuq' noq xik'ik ar. 14Eh i ruSantolaj Uxlab'al i QaJaaw Dios xtoob'inik keh noq xa je' chik kiqajik qohoq wakax wach k'ixkaab'. Je' re' i xub'an reh chi xkahnik rib'iral i ruloq'il chi juneliik i rub'ihnaal. 15QaJaaw Dios kopan taxaaj pan aSantolaj ye'aab', qoh awilow chaloq. ¿Mi ma' intiib'ik chak'ux chi qilariik? ¿Chib'ih reet noq ma' qoh atoob'eej ruuk' awajaawriik? ¿Mi ma' rub'an chik re' chi nee naketelaaj qawach? 16QaJaaw Dios, re' hat manlik QaJaaw atoob' ta re' i Abraham, i Israel ma' xkinab'eej ta cho qawach. Re' hoj qeht'al chi re' hat manlik ehchan qeh, eh re' wo' hat ti ko'linik cho qeh najtir q'iij. 17QaJaaw Dios ¿Chib'ih reet noq i nayeew q'ab' chi naa qakanaam ab'eeh, eh chinkoowjiik i qanima reh chi ma' nee ta chik ti ponik pan naq'qawach? QaJaaw Dios qoh atoob'eej chaketelaaj kiwach amoso, je' wo' taqe i jar ch'uq chi aj Israel. 18Re' taqe asantolaj tinamiit xama' najt ta wo' hoq xi wihik pan kitinamiit. Eh re' chik taqe ki-ixowanik qawach k'ahchi' keeb' chub'anariik i re' ma' re' chupaam i loq'laj apaat. 19Re' hoj xoj kahnik chi xa je' qakab' i tinamit ma' jank'al ta na a'n i taaq'anik chinaah, xoj kahnik chi xa je' ma' jank'al ta i nq'orarik aab'ihnaal chi qaxilak.

will be added

X\