ISAIAS 62

1Ruum chi q'e' nuk'ax taqe i aj Sión, taqe i aj Jerusaleem ma' naa ta nukanaam kitoob'jiik, korehtaal i nelik wach saqum i korik, je' rukab' noq insaq'ik. Eh korehtaal kielik korik chi je' rukab' q'aaq' ju' chee'. 2Eh re' i tinamit naakilom chi korik taq wach ak'ux. Chu'nchel i reey wach ak'al naakilom chi wilik taq aloq'il. Re' QaJaaw Dios jinaj i ak' b'ihnaal naa rukojom taq aweh. 3Chi je' re' ma' k'isiin taq naa ruwihiik aloq'il chuwach i QaJaaw Dios, naa taq akahniik chi je' jinaj corona chi reh. 4Eh ma' jaruuj chik naa ruq'orariik taq aweh chi hat taq q'eb'ooj, eh chi sachooj taq wach aaye'aab', naa la' ruq'orariik reh taq aa ye'aab' chi ruye'em i rotob'il i Dios chinaah. Re' taq i hat naa taq akahniik chi je' taq hat ehk'eenb'ees chi ree reh. 5Re' taqe awak'uun awixq'uun naa rusuuqb'iik kik'ux chi riij i kiye'aab', je' rukab' noq insuuqb'ik ruk'ux i k'ijool chi riij i rehk'een, je' wo' re' noq insuuqb'ik ruk'ux taq awuuk' i QaJaaw Dios i hat taq rutinamiit. 6Eh re' wo' hin xinkojwik taqe i aj cha'joom chinaah i tz'aq kotimaj wii' riij i tinamit Jerusaleem. Chi q'iij chi aq'ab' naa kipahqaam taq atoob'jiik chuwach i QaJaaw Dios. 7Eh mat hi'lik taq chub'aan korehtaal inkorjik wo' chik i Jerusaleem. Reh chi naa wo' chik kiloq'em i Dios ar chu'nchel i tinamit. 8Re' i QaJaaw Dios ruuk' i rajaawriik xuq'or chi ma' naa ta chik ruye'em q'ab' chi naa kik'uxum i wach taq atrigo i ki-ixowanik taq awach, chi ma' tokoom tinamit ta chik naa kuk'iniik reh i riis taq aa-uuva akamaneem taq wach. 9Re' la' wo' taq i hat naa amolwiik, naa ab'aniik rusuqkiil i wach taq atik, ruum i re' naa taq kiin aloq'em i hin. Re' taq i hat naa aasik'wiik reh i wach taq aa-uuva naa taq awuk'em i riis chupaam i nuSantolaj paat. 10Eleen taq cho chi chii' i puerta, cha yejaa' taq i kib'eeh i nutinamiit, chawesaj taq inq'atwik keh. Chajosaj taq i rehtalil chi yuq'umb'al keh i tinamit. 11Re' i QaJaaw Dios je' wili i xuq'or keh i wilkeeb' chi junsuut i wach ak'al: Chaq'or keh i nutinamiit wilkeeb' Sión chi xk'uloq chik i ko'len keh, eh chi xnuk'am chik chaloq i nutinamiit, xwesaj taqe chaloq panti' k'axik. 12Re' taq i hat santo laj tinamit taq i naa ab'ihnaam. Eh re' Jerusaleem loq'laj tinamit, ma' kanamaj ta chik chi rutkeel i naa rubíhnaam, inki Dios.

will be added

X\