ISAIAS 6

1Chupaam i haab' noq xkimik i Uzías, kireey i aj Judá, xwilow wach panusaq wiriik i QaJaaw Dios, chi tzunlik chinaah i runajt naah ye'aab', eh re' i runimaal i ruso' xunujisaj paam i rupaat. 2Eh chinaah i QaJaaw Dios, wilkeeb' i ki'ib' chi k'achareel je' kiwii' ánjel, eh chi kiju'junaal waq taq i kixiik'. Ki'ib' i kixiik' imb'urwik reh i kiwach, ki'ib' imb'urwik reh i kooq, ki'ib' kirupinik reje wii'. 3Eh kow k'ahchi' kiq'orom chikiwach chi je' wili: Santo, Santo, Santo i qaDios, wilik rajaawriik, eh xnujik i ruloq'il chinaah chu'nchel i wach ak'al, inki taqe. 4Eh noq k'achi' kiq'orom chi je' wili, re' taqe i ru puertahiil i rupaat xanoq wo' xik'uyu'jik, eh re' i rupaat i Dios xnujik chi sib'. 5Eh re' hin je' b'ila' wili i xnuq'or: Re' hin naa nukimiik, ruum xwilow wach ruuk' naq'nuwach i Reey, re' Ajaab'ees Dios xti nim rajaawriik, xanaah re' ch'uwa' wach kinq'orik, eh ayu' wilkiin chi kixilak i tinamit ch'uwa' wach kiq'orik, kinki. 6Eh xrupinik cho chi nunaah, jinaj keh i k'achareel ruchopom chi lach' ch'ihch' jinaj i nah wach q'aaq' xuchop cho wach artaal, 7eh xrik'saj xaq nuchii'. Eh je' wili i xuq'or weh: Ruum chi xwik'saj xaq aachii' i naah wach q'aaq' wili xelik chu'nchel i ma' holohik taj i na a'n. Eh kuyuuj chik chu'nchel amahk, inki. 8Eh xb'iraj i ruq'oral i QaJaaw Dios je' wili i xuq'or: ¿Awach i naa nutaq'aam, awach i naa rojiik taqareel? inki. Eh re' i hin je' wili i xnuq'or reh: Jaaw ayu' wilkiin i hin, kinataq'aaj i hin, kinki reh. 9Eh je' wili i xuq'or weh: Ma' xta reet hiy cha q'or keh chi je' wili i tinamit: Inab'iraj wo' naq taq xama' areq ta wo' taq chi riij, inawil wo' naq taq, xama' nakoj ta wo' taq rehtaal, tiko'q keh. 10Chakoowb'isaj i kánima i tinamit re' re', chatz'ap i kixikin, chamutz' inaq' kiwach reh chi ma' nee ta nkib'iraj, eh ma' nee ta inkikoj rehtaal. En ni xata neenkireq chi riij, reh chi ma' nee ta inkiyot' i kik'ux. Eh re' hin ma' nee ta wo' nukuy kimahk, inki weh. 11Re' hin je' wili xnuq'or: ¿Nik' najtiil naa ruk'ulariik i re' Jaaw? kinki reh. Eh je' wili i xuq'or weh: Korehtaal inkuxik rusachariik wach i kitinamiit, ma' jino'q chik i naa rupatiniik pankipaat, korehtaal kiehteesjik reje pan i kiye'aab', inki. 12Je' re' noq re' i QaJaaw Dios korehtaal i resaj taqe reje chu'nchel i tinamit ar. Eh xan tz'irtz'otik chik paam i kitinamiit naa rukahniik. 13Eh wila' kox kahnik chik k'isinoq ruqox i tinamit, naa wo' rusachariik kiwach. Noq re' chee' tuhq, eh re' i tz'inuj inyok'arik naah neenkahnik i raa', reh chi nee wo' chik intoxlinik. Je' wo' chik re' na' kikahnoq kiib' ixib'-oq i loq'laj rak'uun rixq'uun i Dios.

will be added

X\