ISAIAS 56

1Re' i QaJaaw Dios je' wili i xuq'or: Re' taq i hat, re' korik, re' holohik taq cha a'n, ruum re' hin naa taq kaat nuko'leem chi jumehq'iil. Eh naa nuk'uhtaam i rukorkiil wach nuk'ux. 2Atoob' reh awach i ruk'am naah taqe i ruq'or i nuk'uhb'aal, eh i rub'an chi korik i ruq'or. Eh rumol i hi'limb'al q'iij i ruyeew ruloq'il, eh ma' xtaj i yiib' wach i rub'an, inki. 3Wila' re' i tokoom tinamit neerusik' i QaJaaw Dios maa ruq'or chi je' wili: Re' hin ma' nee ta kiruk'ul chi xilak i rutinamiit i QaJaaw Dios. Eh re' kapuun maa ruq'or chi je' wili: Re' hin xa je' nukab' i chiq chee'. 4Ruum re' i QaJaaw Dios je' wili i ruq'or: Wila' re' taqe i kapuun, inkiyeew ruloq'il i hi'limb'al q'iij, eh wila' inki a'n inwaaj i hin, wila' inki a'n taqe i nuyejaam wach. 5Re' hin naa nukojom taqe chi wak'uun wixq'uun, naa nukanaam rehtalil i kib'ihnaal chupaam i nupaat, eh chuwach taqe i tz'aq. Eh jinaj i b'ihnaal naa nukojom keh, ma' jaruuj chik naa rusahchiik wach. 6Re' taqe i tokoom tinamit inkiq'asaj kiib' weh reh chi naa kikahniik chi waj kamanoom, eh chi nee kinkik'ax. Eh wila' xkimol i hi'limb'al q'iij, wila' xkiyeew ruloq'il i nuk'uhb'aal. 7Re' hin naa taqe nuk'amam chaloq pan nuSantolaj ye'aab', naa nuye'em rusuqkiil kik'ux panupaat imb'aan wii' tiij. Eh naa nuk'ulum i kimayiij, je' wo' i k'atoj chikop inkiyeew wach artaal, ruum re' i nupaat naa rukahniik chi b'amb'al kitiij i tinamit, inki Dios. 8Eh re' i QaJaaw Dios i molwik kiwach i aj Israel tukimaj kiwach, je' wili i ruq'or: Ko wilik i tokoom tinamit naa nuk'amam chaloq chi kixilak i aj Israel, inki. 9Kim taq i hat tokoom tinamit chasach taq kiwach i nutinamiit, je' rukab' inki a'n i josq'laj chikop reh i kitiib'. 10Ruum re' taqe incha'jinik keh i nutinamiit, i moywach taqe, ma' xta kina'ojb'al. Eh xa je' kikab' i tz'i' ma' kiwohwanik taj, xa re' wirik inki a'n xa re' i xohk'risanik inki a'n 11Xa je' kikab' i tz'i' xa kinuhmik chik noq inki a'n kiwa', xama' kinujik ta wo' hoq. Eh k'amal b'eeh wo' naq taqe xa re' la' xama' holohik ta wo' kib'anik chi kiju'junaal, xa re' i k'axb'al kiib' i keh inkisik'. 12Eh je' wili inkiq'or chikiwach: Kim taq quk'ej taq qak'ah laj haa', reh chi nee qohxohk'rik, eh i iqal xti k'ih chik inaaquk'em, inki taqe.

will be added

X\