ISAIAS 54

1Re' QaJaaw Dios je' wili xuq'or: Chak'er aachii' chi tz'uuy i hat Jerusaleem, i je' naq akab' ixoq ma' naak'unanik taj. Eh yu'naak cha k'er aachii' chi tz'uuy, ruum ma' k'isiin chik k'ihaal aatinamiit chuwach i xwihik cho pampeet, naa aponiik chi je' rukab' ixoq k'ih i rak'uun rixq'uun. 2Ruum aj re' chayub' reje aa itz'ihy naah paat reh aab'iyajo, eh chayub' rooq i k'ahaam b'ak'lik wii' itz'ihy re' re'. Eh kow chalahmaaj i chee' ab'ak'am wii' i ruk'ahamil i itz'ihy. 3Eh naa ayub'um reje aaye'aab', je' pantz'eet, je' pansak'aaj. Eh re' awiih aamaam naa wo' chik kehchaam i ye'aab' wilkeeb' wii' i tokoom tinamit, eh naakipatiniik chupaam i ye'aab' ma' xta wii' patineel. 4Re' hat maayohb'isaj awiib', ma' naa ta chik kaat kikaqse'laam. Ma' naa ta chik kaat kib'ajam, eh ma' naa ta chik kik'uhtaam ak'ixb'ilaal. Ma' naa ta chik ruk'uliik panak'ux i ti' xak'ul noq xat kahnik chi je' rukab' ixoq kamnaq rub'ahiil. 5Re' hin i Dios, nim rajaawriik i nub'ihnaal, re' hin xin tz'uhkrisanik chaaweh, hin ab'ahiil noq wilkiin. Re' hin kinesanik cha weh panti' k'axik, hin kiSantolaj Dios taqe i aj Israel, je' wo' chu'nchel i wach ak'al. 6Re' hat je' naq akab' i k'isa q'ahxoq ti' ruk'ux koxub'an wo' naq kaxáro xkanab'jik wo' chik. Xa re' la' re' hin, hin aaDios xnusik' wo' chik chawach, je' wili i xnuq'or aweh: 7Re' hin xama' najt ta wo' xat nukanaa', eh yu'naak naa wo' chik nuketelaam awach, naa wo' chik kaat nuk'amam wuuk' pan jinaj wach k'uxliis. 8Re' hin xa ruum i nujosq'iil ma' xnuyeew ta chik i wotob'il cha naah chuwach i ma' najt ta laj q'iij. Xa re' la' ruum chi wilik i k'axooj wuuk' chi juneliik naa wo' chik nuketelaam awach, inki aaDios x-esanik taq cha weh panti' k'axik. 9Eh nik' wach noq xnuq'or i xti korik reh i Noé chi ma' naa ta chik nutz'apam naah i wach ak'al ruuk' elal ha', je' wo' re' noq i nuq'or aweh i korik yu'naak chi ma' jaruuj chik naa ruchaliik nujosq'iil cha naah. Ma' naa ta chik kaat nuye'em panti' k'axik. 10Atoob' ta neerujal ruye'aab' i yuuq', atoob' ta neenq'ehb'ik chaloq i yuuq' re' hin ma' jaruuj naa nukanaam ruketeljiik awach. Eh ma' jaruuj naa ruyojiik wach i suq kiil k'uxliis nuyejaam wach, je' wili i nuq'or i hin i kin keteleniik awach, inki. 11Re' hat Jerusaleem ketel awach q'e' ti' xak'ul ma' xta naq rusuqkiil ak'ux. Re' hin naa wo' chik nuyejaam aatinamiit ruuk' ab'aj karbunklo, eh naa wo' nuyejaam i tz'aq paraa' ruuk' i ab'aj zafiro. 12Eh re' taqe i ru ventanahiil i paat naa nuyejaam taqe ruuk' i holohaq ab'aj, re' taqe i ru puertahiil naa nuyejaam taqe ruuk' i holohaq ab'aj, chu'nchel i tz'aq naa nuyejaam ruuk' taqe i ab'aj q'e' k'ih tz'aaq. 13Re' hin naa nutijiniik keh taqe i aawak'uun i aawixq'uun, re' wo' hin naa nuye'wiik aweh i runimaal suq kiil k'uxliis. 14Eh ruum chi naa ruwihiik i rukorkiil wach k'uxliis awuuk' naa ruwihiik awajaawriik chupaam aatinamiit. Ma' naa ta chik ayo'jiik kuum i ki-ixowanik awach, eh ma' xta chik naa kaat ruchem. 15Wila' awach i xutoq'aa' peleto awuuk', wila' ma' re' hin xin ye'wik rajaawriik, xama' xta wo' naa kaat ruchem. Re' la' hat naa ab'aniik reh. 16Eh re' hin xinyej-anik reh i aj ch'eyel ch'ihch' re' reh i ruqop i q'aaq' i ruhab'isaj i ch'ihch', ruuk' i re' i ruyejaa' i ch'ihch' inkamanik reh q'aq'inik. Eh re' wo' hin xinyej-anik reh i winaq inkansanik ruuk' q'aq'inik. 17Eh re' hat ma' jino'q i ch'ihch' korjinaq chi reh q'aq'inik neensachwik awach. Eh naa aq'atam kiwach chu'nchel i naakitz'aqam amahk, re' wili naa nuye'em chi kikooch i waj kamanoom, re' chi ma' xta naa kuuchjiik ruum inixowanik kiwach, inki i Dios.

will be added

X\