ISAIAS 46

1Re' tiyoox Bel rub'ihnaal impachlojik wach ak'al, je' wo' hoq i Nebo rub'ihnaal. Re' taqe i tiyoox re' re' kik'amarik reje rij kawáyu, xa jinaj ahl laj ihq chi keh i kawáyu q'uhtinaq taqe chi ihq. 2Re' taqe i tiyoox re' re' kiq'ehb'ik wach ak'al, ma' inki a'n ta ruko'ljiik kiib'. Eh ma' xkiko'leej ta wo' taqe inloq'inik keh junk'amariik la' taqe xib'aan reje pan tokoom tinamit. 3Re' Dios je' wili xuq'or: Re' taq i hat, aj Israel i hat taq riih rumaam i Jacob, kinab'iraj taq. Re' taq i hat i koxat kahnik taq, chanab'eej taq chi noq komajaa' taq ti aasjik chaloq xa hat wo' taq nucha'jeem. 4Eh je' re' i naa nub'anam taq awuuk' korehtaal taq tirijb'iik, insaaqb'ik taq i rismaal aanaah. Re' hin xintz'ukrisanik taq chaaweh, ruum aj re' xama' naa ta wo' nukanaam taq awilariik, atoob'jiik, ako'ljiik. 5Eh raaj taq i hat ¿Awach taq aj uuk' nee kinajalwachej? ¿Awach taq i nakapaaj i hat chi nee rureq chi je' rukab' i hin? 6Wilik taqe inkesaj chaloq i oro pan kibolso, eh inkipaj i plata chupaam i pexu. Eh inkiq'asaj reh i aj ch'eyool reh chi ruuk' taqe re' inkorb'eesjik kitiyoox, eh inkixuk'aa' kiib' chulooq'jiik. 7Eh inkitehlaaj reje nah kitileb' imponik kikanaa' chupaam jinaj i ye'aab' ar inkahnik chi xama' ink'uyu'jik ta wo' hoq. Eh noq inkik'er kichii' chupahqaljiik chib'ih inkaaj xama' ruyeew ta wo' hoq, xama' kiehteesjik ta wo' panti' k'axik ruum. 8Chakoj taq rehtaal taqe i wili i hat taq aj mahk, cha kapaaj taq riij chi korik i k'achi' nuq'orom. 9Eh k'oloq taq panak'ux chib'ih jariik i k'uluuj taqe chaloq najtir q'iij, xa re' wo' hin i jinaj chi Dios, ma' xta chik jino'q chi nuwach i hin. Ma' awach taj inerureq chi je' rukab' i hin. 10Re' hin xinq'orik chaloq chib'ih taqe imb'aan i rutihk'ik chee k'acharik. Eh re' hin kinq'orik i k'uluuj chik, je' wo' hoq i komajaa' ink'ularik. Naa nub'anam chu'nchel i nuyejaam wach. 11Re' hin xnusik' wach i reey Ciro wilik najt tinamit wilik reje chi korkiil ireelb'aalq'iij. Re' reh je' rukab' i k'uch, re' reh naa rub'aniik i nuyejaam wach, nik' wach i nuq'orom, je' wo' re' i naa nub'anam. Re' i nuyejaam cho wach naa wo' nub'anam. 12Kinab'iraj taq i hat inakowb'isaj taq awánima, re' taq ti kapeb'inik reh chi ma' jaruuj taq naa ako'ljiik. 13Re' hin naa taq kaat wesam panti' k'axik, eh naa taq kaat nuko'leem, re' wili naa nub'anam chi jumehq'iil. Eh naa nuko'leem taqe i aj Sión, eh naa nuye'em runimaal kiwach i aj Israel, inki Dios.

will be added

X\