ISAIAS 45

1Re' QaJaaw Dios xukuxisaj i Ciro chi xkahnik chi reey, xuyeew rajaawriik chi naa rub'anam keh i tinamit, chi nee ruq'uch i kitz'a'amb'aal i reey. Eh chi re' Ciro naa rutehwiik i b'eeh chi naa rub'aan okik pantaq tinamit, ma' awach ta chik naa rutz'apwiik reh, je' wili xuq'or reh: 2Re' hin naa wojiik chi peet b'eeh chawach, naa nuyejaam chi korik i b'eeh. Eh naa nuxerem i puerta q'an ch'ihch' ruyej-aal, eh naa nutoqom i ch'ihch' tz'apb'al riij i puerta. 3Re' hin wilik taqe i k'ih taq tz'aaq naa nuq'asam aweh re' i ke'lik naq. Reh chi nee nanaab'eej chi re' hin Dios. Eh hin ki Dios i aj Israel, re' hin xin sik'wik awach ruuk' ab'ihnaal. 4Re' hin pankib'ihnaal i aj Israel re' taqe i riih rumaam i Jacob nusik'im cho kiwach, xnusik' chaawach ruuk' aab'ihnaal. Eh xnuyeew aaloq'il, atoob' ta re' hat ma' nayeew ta runimaal nuwach. 5Re' i hin i Dios, ma' jino'q chik Dios chi nuwach i hin. Re' hin naa nuye'wiik awajaawriik reh chi naa rojiik a'nam i nukamaj, atoob' ta re' hat ma' nayeew runimaal nuwach i hin. 6Re' hin naa kaat nutaq'aam reje reh chi neenkinab'eej i tinamit chi junsuut i wach ak'al chi xa re' wo' hin i jinaj chi Dios ma' xta chik jino'q tokoom Dios chi nuwach i hin. 7Re' hin xintz'ukrisanik reh i saqum, i q'equm, eh hin kinye'wik i wihik pansuqkiil, i wihik pan k'axkiil. Re' hin i Dios hin kinb'anik reh chu'nchel i re'. 8Re' hin pan taxaaj naa nuye'em chaloq i korik laj k'acharik xa aha' yuuq' je' rukab' noq inqajik chee jab'. Eh re' kolemb'al iib', re' korik naa ruwihiik je' rukab' noq i nelik i wach i tik. Re' hin naa nuye'wiik reh, inki Dios. 9Q'e' ti' i naa ruk'ulum i neeruwech'uj riij awach xyej-anik reh. Re' i xun ma' nee ta ruq'or reh chi je' wili i xyej-anik reh: ¿Chib'ih reet noq xinayejaa' chi je' wili? ¿Chib'ih i k'achi' kaat weh? Re' hat ma' tichol ta kamanik ma' inko'q ta reh. 10Eh ma' nee ta wo' ruyeew riib' chi re' jino'q ak'uunb'ees nee rixow wach i rutuut rajaaw xye' wik reh chinaah i wach ak'al wili. 11Eh re' QaJaaw i qaDios i hoj, hoj aj Israel ixtz'uhkrisanik cho qeh je' wili i xuq'or: ¿Mi neerub'an re' chi nee taq i nawech'uj riij nik' wach noq wilkeeb' taqe i wak'uun wixq'uun? ¿Mi konee taq inakoj nuna'ojb'al re' ruuk' taqe i naa nub'anam? 12Re' hin xiyej-anik reh i wach ak'al, i tinamit wilkeeb' chuwach. Re' hin xinhe'wik wach i taxaaj paruye'aab'. Re' hin xinyej-anik reh i q'iij, i poh, chu'nchel taqe i ch'umiil. 13Re' hin xinpab'anik reh i Ciro, chi naa rehchaam i nimaq tinamit. Eh naa nutehem i rub'eeh reh i chi naa wo' chik ruyejaam i nutinamiit. Naa koq'taam chaloq i nutinamiit k'amooj taqe reje pan tokoom tinamit, eh ma' naa ta kitojoom riij, inki QaJaaw Dios nim rajaawriik. 14Re' QaJaaw Dios je' wili i xuq'or: Re' i wach i kitik i aj Egipto, i kik'aay i aj Etiopía naa taq awehchaam. Re' taqe i nimaq kooq winaq aj Sabá, b'ak'lik kiwach chi karena noq naa kojiik taq chawiij, naa kixuk'aam kiib' taq chawach, je' wili i naa kiq'orom: Xti korik chi re' Dios wilik taq awuuk', ma' xta chik jino'q Dios chuwach i reh, inko'q taqe inki. 15Re' QaJaaw qaDios i hoj aj Israel, re' wo' re' inko'linik taq aweh, atoob' ta ma' nilarik wach. 16Eh chu'nchel i kiyej-anik reh taqe i tiyoox, naakik'utaam kik'ixb'ilaal. Naa rehtesjiik i runimaal kiwach, xa se'lb'al chik taqe naakikahnik wii'. 17Re' taqe i aj Israel keh, re' i QaJaaw Dios naa ruko'liniik keh chi junelik, eh ma' jaruuj naa kik'uhtaam kik'ixb'ilaal ma' naa ta rehtesjiik i runimaal kiwach. 18Re' QaJaaw Dios, ixyej-anik reh i taxaaj, i wach ak'al manlik Dios, eh xuyeew paruye'aab'. Eh ma' xuyejaa' ta chee wach ak'al chi xama' xta naa rukamaniik wii'. Xuyejaa' la' chi naa rub'aan i patinik chupaam, eh je' wili i xuq'or: Re' hin i Dios, ma' xta chik jino'q tokoom Dios chi nuwach i hin. 19Re' hin ma' chi q'eeqmaal ta kinq'orik, ma' chupaam taqe i q'equm paam ye'aab' kinq'orik. Eh ma' nik' ta xnuq'or keh i riih rumaam i Jacob aha' i ma' nee ta taq kinareq wii'. Re' hin i Dios parukorkiil kinq'orik, juneliik i nuq'or i korik, inki. 20Re' QaJaaw Dios je' wili xuq'or: Chamol taq awiib' i hat taq tinamit. Kim taq chawunchelaal, i koxat kahnik taq chi k'achalkaat. Re' taq i hat ma' xta taq ana'ojb'al inab'esaj taq pantaq b'eeh atiyoox chee' ruyej-aal, eh i na a'n taq atiij chuwach. 21Tiq'oroq taq chako'leej taq riij aatiyoox. Eh cha pahqaaj taq chawach chi je' wili: ¿Awach xq'orik cho reh najtir q'iij chi naa qak'ulum i wili? ¿Mi ma' re' re' hin i Dios xinq'orik chaloq reh pampeet? Xa re' wo' hin i Dios, ma' xta chik jino'q Dios chi nuwach i hin chi nee ta nelik korik, chi nee tanko'linik. 22Kim taq wuuk' i hin i wilkaat taq chi junsuut i wach ak'al, re' hin nee taq tinuko'leej, ruum xa re' wo' hin, i Dios ma' xta chik jino'q tokoom Dios chi nuwach hin. 23Re' hin nuq'or i korik chi wiij. Eh nuq'or chi naa rub'aan elik korik, korehtaal inooj eloq wach, korehtaal inkixuk'aa' kiib' chi nuwach chu'nchel i tinamit. Eh naa kiq'orom chi re' hin i Dios. 24Je' wili i naa kiq'orom chi wiij, xa ruum wo' i QaJaaw Dios imb'aanelik korik xa re' wo' reh wilik rajaawriik, naa wo' chik kinkinimam chi kunchelaal. Re' i xchalik kik'aah wuuk' naakik'uhtaam kik'ixb'ilaal. 25Xa ruum i wotob'il i hin naakeliik korik chu'nchel i aj Israel, eh naa ruwihiik runimaal kiwach wuum, inki i Dios.

will be added

X\