ISAIAS 35

1Re' i xkahnik chi chiq yuuq' naa wo' chik rusuuqb'iik ruk'ux. Re' chiq ak'al naa chik reliik i uhtz'ub' chuwach. 2Eh xa holohik chik i uhtz'ub' naa reliik chuwach, naa rusuuqb'iik ruk'ux. Naa ruye'ariik ruloq'il i ye'aab' re' re', naa rukahniik chi je' kiholwochiil i ye'aab' Líbano, i ye'aab' Carmelo, i ye'aab' Sarón. Eh re' i naa kiwihiik ar naakilom wach i runimaal wach, i ruloq'il i QaJaaw Dios. 3Chatoob'eej taqe i ma' kow ta kik'ux, eh chayeew taq kikowiil taqe i q'uhtinaq. 4Eh re' i kiyo'jik je' wili taq i cha q'or keh: Chakowej taq ak'ux maayohb'isaj taq awiib', ruum re' aaDios naa ruko'liniik taq aweh, eh naa ruye'em taqe chutojariik i kimahk i ki-ixowanik taq awach, tiko'q taq keh. 5Eh chupaam taqe i q'iij re' re', re' taqe i moywach naa chik kilwiik, re' taqe i tz'aplik i kixikin naa chik kib'irinik. 6Re' taqe i chelej riib' kib'ehik naakipisk'aniik pankooq je' kikab' i keej. Re' taqe i meem naa chik kitz'uyinik. Eh chupaam i ye'aab' chiq yuuq' naa raasjiik chaloq i ma' k'isa ha'. 7Eh chupaam i ye'aab' chiq yuuq' naa rukahniik chi ye'aab' ha', xa aha' chik naa raasjiik chaloq i ha'. Re' ye'aab' wilkeeb' naq wii' i xojb' kaxlan-aaj, kalaab' chik i naa kiwihiik ar. 8Eh chupaam i ye'aab' re' re' naa ruwihiik jinaj i b'eeh, Santolaj b'eeh i naa kiq'orom reh. Re' taqe i ma' saq ta wach i kánima ma' naa ta ruye'em riib' chi naa kik'iik chupaam i b'eeh re' re', je' wo' taqe i ma' kinimanik taj ma' naa ta wo' kik'iik ar. 9Eh ma' naa ta chik kiwihiik ar i josq'laj chikop, taqe i kaq b'ahlam. Eh re' i naa kianam okik ar xa re' wo' taqe i esamaj chik taqe chaloq chupaam i ti' k'axik. 10Xa re' wo' taqe iresam chaloq panti' k'axik i QaJaaw Dios, tz'uuy inki a'n noq naakokiik chupaam i ye'aab' Sión. Eh juneliik suq kik'ux noq naa kik'achariik ar, naa kireqem i suq laj wihik, ma' naa ta chik koq'iim ruum i ruti'kiil kik'ux.

will be added

X\