ISAIAS 32

1Naa ruwihiik jinaj i reey parub'ehel naa rutaaq'aniik. Eh naa kiwihiik i ajaab'ees parub'ehel naakiq'atwiik q'orik 2Re' reey re' re' naa rukamaniik chi je' rukab' i ye'aab' inkiko'leej wii' kiib' i tinamit chuwach i kowlaj jab', chuwach i kowlaj teew. Eh chi je' rukab' i rooq ha' chupaam i ye'aab' chiq yuuq', eh chi je' rukab' i paat ab'aj muujb'al pantz'a' laj yuuq'. 3Re' taqe i jalal ruq'oral i Dios naa chik kireqem chi riij inaakilom. Eh re' i tinamit naa chik kiye'em kik'ux chi rib'irjiik i kik'uhb'aljiik. 4Re' taqe i xateheh naq kiwach ruuk' i chib'ih inki a'n pan q'unil chik naa kianam. Eh re' taqe i ma' q'e' ta kichol q'orik, naak chik kicholiik q'orik chi korik. 5Eh re' i yiib' wach runa'ojb'al, ma' naa ta chik ruq'orariik chi holohik imb'anik. Re' i jot'ool i ma' naa ta chik ruye'ariik runimaal wach. 6Re' i yiib' wach runa'ojb'al xa re' wo' re' naa rub'anam, eh xa re' i ma' holohik taj wilik parukapeb'aal. Eh xa re' kaansanik ras ruchaaq' iraaj, i ruchuk q'orik chi riij i Dios. Eh ma' rusiij ta ruwa' ruhaa' i kuyuj ruwa' ruhaa' i rub'an. 7Re' yiib' wach runa'ojb'al, re' i ma' holohik taj i rub'an, i rusik' chi riij nik' wach rujot'ariik i neb'aa' naa rub'anam ruuk' taqe i chukuj q'orik. Eh i rusik' chi riij nik' wach noq naa rukojariik ru mahk i neb'aa'. 8Eh re' i atoob' wach ruk'ux, xa re' atoob' chi b'anarik i rub'an, ruum i re' naa ruye'ariik runimaal wach. 9Re' taq i hat ixoq aj Jerusaleem, ch'iklik taq ak'ux chi ma' xta taq i naa ak'ulum chab'iraj taq chi korik i naa nuq'orom taq aweh: 10Chanab'eej taq chi pan wilik rukab' haab' naa taq ruchaliik ayo'jiik, ruum ma' naa ta chik kiwachiniik i tik. Eh ma' xta chik i wach i uuva taq naa amolom. 11Re' taq i hat ixoq i ch'iklik taq ak'ux chi ma' xta taq i naa ak'ulum ti yo'joq, tiib'oq taq ak'ux. Eh chawesaj taq aholohaq so', re' chik aq'as wach so' chakoj taq chawiij. 12Naa taq atuyum i koq i chi' ak'ux ruum i ruti'kiil taq ak'ux chi riij taq aa ye'aab' ruum ma' naa ta chik rub'anam i tik, ni xata naq chik re' uuva naa ruwachiniik. 13Ch'ahn, k'iix la' chik i naa rupoq'iik chupaam i kiye'aab' i nutinamiit, je' wo' chupaam taqe i paat, eh chupaam taqe i tinamit wilik naq wii' i suq kiil k'uxliis. 14Re' i paat imb'aan wii' i taaq'anik naa rukahniik chi ma' xta chik i wilik chupaam. Eh re' wilkeeb' wii' i patineel naa rukahniik chi xa ntz'irik chik paam. Re' chik taqe i b'uurux naa kiwihiik ar chi suq kik'ux, eh re' chik taqe i wakax naa kianam kiwa' ar. 15Eh re' i QaJaaw Dios naa wo' chik ruye'em i ruk'axb'al chi qanaah i hoj, naa wo' chik rub'anam i tik chuwach i ye'aab' chiq yuuq'. Eh re' i ye'aab' xa rub'an wo' hoq i tik chuwach ma' k'isiin chik naa rub'anam i tik chuwach. 16Eh chupaam taqe q'iij re' re', re' chik i korik, re' chik i rub'ehel naa rub'aan chupaam i qatinamiit. 17Re' i korik naa rub'aan re' re' naa ruk'amwiik cho reh i rusuqkiil k'uxliis. Eh i ruk'am wo' chaloq i suq laj wihik ch'iklik wii' qak'ux chi juneliik. 18Re' nutinamiit ma' xta chik i peleto naa rub'aan chupaam i kiye'aab', eh ma' xta naa kuuchjiik pankipaat, xasuq chik naa kiwihiik. 19Re' taqe i ki-ixowanik taq awach ruuk' saqb'och jab' naa rusachariik wach i kitinamiit. 20Eh re' taq i hat xasuq wo' taq ak'ux ruum xa tz'aqik wo' paam ak'al taq naa atikim wii' atik. Eh xanaa wo' ruwihiik kiwa' taq aab'oyaax, i aab'uuruux.

will be added

X\