ESDRAS 9

1Chi riij chik taqe re', re' taqe i k'amal kib'eeh i aj Israel xi chalik wuuk' je' wili xkiq'or weh: Wilik taqe i quch aj Israel, wilik taqe i k'amal kib'eeh aj tiij, wilik taqe i aj Levíta, k'ahchi' kianam keh i yiib' wach na'ojb'al inki a'n i aj cananeo, aj heteo, aj ferezeo, aj jebuseo, aj amonita, taqe aj moabita, taqe aj Egipto, taqe aj amorreo, eh xkian jinaj wach kik'ux kuuk'. 2Re' keh, eh re' kak'uun xkian kaxáro kuuk' i kixq'uun taqe tinamit re' re'. Je' re' noq re' rusantolaj tinamiit i Dios, xkian jinaj wach kik'ux kuuk' i tokoom tinamit. Re' taqe i peet xib'anik reh taqe mahk wili re' taqe i k'amal b'eeh, re' taqe i wilkeeb' chi taaq'anik, inki taqe. 3Eh noq xb'iraj taqe i q'orik wili xnuxih i nuso' chi wiij, xnuchuq i rismaal nunaah, xnuchuq wo' wusinchii'. Eh xnutzunaa' wiib' wach ak'al chi xiik' naah ti'kiil nuk'ux. 4Eh chu'nchel i re' xkimol kiib' wuuk' xchalik kiyo'jiik chi re' Dios naa ruye'em chee ti' k'axik chikinaah ruum i mahk k'ahchi' keeb' taqe i kuch aj Israel xi sutinik wo' chik cho Jerusaleem. Re' hin ma' k'isiin ti'kiil nuk'ux xa xin kahnik wo' ar chi tzunulkiin, korehtaal xureq i ora reh i ruye'ariik i mayiij ree xq'eq. 5Eh chupaam i ru orahiil i ruye'ariik i mayiij ree xq'eq xin wuktik johtoq aha' naq tzunulkiin wii' chi ti' nuk'ux, xa koxiheel wo' nuso' chi wiij xnuxuk'aa' wiib' xnujosaj johtoq i nuq'ab' chub'aan i nutiij chuwach i QaJaaw Dios, 6je' wili i xnuq'or: WaJaaw nuDios, re' hin insahchik nuk'ux yohb'aal wach i nuk'ixiik noq i nujosaj johtoq i nuwach chaq'orob'jiik, ruum xiik' naah i mahk inqa'an chawach. Eh xiik' naah i yiib' wach na'ojb'al inqa'an, imponik kopan taxaaj. 7Xa je' wo' re' i mahk xkian chee qamaam qati't, eh xa ko je' wo' re' i k'ahchi'kooj i hoj yu'naak. Eh ruum chi xiik' naah i qamahk i hoj, je' wo' taqe i k'amal qab'eeh, taqe i k'amal kib'eeh aj tiij, taqe i qareey, xoj q'ahtesjik pan kiq'ab' i kireey i tokoom tinamit, xoj kichop xoj kik'am reje pan tokoom tinamit. Wilik qeh i xi kanteesjik ruuk' i q'aslaj ch'ihch', xkelq'aaj chee chib'ih qeh, xkik'uhtaaj qak'ixb'ilaal, eh xa ko je' wo' re' i k'ahchi' qak'ulum yu'naak. 8Xa re' la' yu'naak waJaaw nuDios xaketelaaj qawach ruum xoj ako'leej i hoj, hoj awak'uun awixq'uun nik' chik qak'ihaal i koxoj kahnik chi k'achalkooj. Eh xayeew wo' chik qa ye'aab' chupaam i santo laj ye'aab' aha' ma' xta naa qak'ulum, inak'uhtaaj chi qawach i qab'eeh, xoj ayeew chi hi'lik junk'aam-oq. 9Atoob' ta wilkooj wo' naq chi ri'sil i rajaawriik i kireey i aj Persia, re' hat xama' xoj akanaa' ta wo' chi qutkeel. Eh chikiwach i reey xak'uhtaaj qeh awotob'il, xayeew qak'achariik reh chi naa wo' chik qayejaam aapaat, re' i yojoj cho najtir. Re' hat xat ko'linik qeh ayu' Judá, je' wo' Jerusaleem. 10Xa re' la' yu'naak waJaaw nuDios ¿Chib'ih jariik i neenqaq'or chi riij i xa a'n cho quuk' re' re'? Re' hoj ma' xqa'an ta taqe i ruq'or aak'uhb'aal. 11Re' i xaq'or keh taqe i jalal aq'oral, re' taqe awaj kamanoom. Re' keh xkiq'or qeh chib'ih i ruq'or chupaam aak'uhb'aal, xaq'or keh i qamaam qati't chi re' ye'aab' naa kojiik wii' chi wihik nujinaq chi ch'uwa' wach na'ojb'al ruum i yiib' wach na'ojb'al inki a'n i tinamit wilkeeb' ar. 12Eh xaq'or chi re' taqe i qixq'uun i hoj ma' naa ta kianam kaxáro kuuk' kak'uun i tokoom tinamit re' re'. Eh chi ma' naa ta kianam kaxáro i qak'uun i hoj kuuk' i kixq'uun i keh. Eh chi ma' naa ta qawihiik pansuqkiil k'uxliis kuuk' ni xata naa qatoob'eem taqe reh chi nee kielik korik. Reh chi re' hoj naa ruwihiik qakowiil, eh chi naaqanam rusuqkiil i suq atoob' wilik chupaam i ye'aab' re' re', chi naa qakanaam kahnoq keh chi juneliik i qiih qamaam. 13Re' ti k'axik xqak'ul ruum i ma' holohik taj, ruum i runimaal mahk xqa'an. Xa re' la' re' hat QaJaaw Dios ma' xoj ayeew ta chutojariik i qamahk je' naq rukab' i ruk'ul chi qeh, ma' xkuxik ta asacham qawach. 14¿Mi neerub'an yu'naak re' chi neenqaq'et wachej taqe aak'uhb'aal neeqa a'n qeh je' rukab' i xkian i tinamit re' re' yiib' wach i kina'ojb'al? ¿Mi ma' nee naq inchalik re' aajosq'iil ruum i qamahk mi ma' nee naq inkuxik asacham qawach re'? 15QaJaaw Dios, qaDios i hoj, hoj aj Israel, re' hat korik wach ak'ux quuk' ruum juntzuhb' qeh i hoj i xoj akanaa' chi k'achalkooj yu'naak xoj ako'leej. Xti korik wo' hoq chi wilik qamahk chawach, je' re' noq ma' ruk'ul taj chi tiqaq'o'reej johtoq, inki parutiij i Esdras.

will be added

X\