EZEQUIEL 8

1Hoob' q'iij-oq chik ruk'amam rub'eeh i ruwaaq' poh reh i ruwaaq' haab' qak'amariik reje Babilonia. Eh noq wilkiin panupaat wuch'ihil taqe i aj Judá nimaq wach kikamaj xwik'raaj noq xuyeew i q'ab' i QaJaaw Dios chi nunaah. 2Eh jinaj b'ila' chik xwilow wach je' ruwii' winaq, eh xwilow chinaah rutuuq xutik'aa' qohoq i xa je' chik xaq q'aaq'. Eh nah rutuuq xutik'aa' johtoq i xanrob'rotik chik xa je' chik rukab' i q'an ch'ihch' inreprotik wach. 3Re' i je' ruwii' winaq re' re' xuyub' b'ila' chik chaloq i q'aaq' xuchop chi rismaal nunaah, eh xiruksaj johtoq i Dios ruuk' i rajaawriik, xiruk'am reje chi chii' i puerta Jerusaleem noq xwilow panusaq wiriik. Ximponik chik rupab'aa' chi chii' i puerta wilik reje panookb'al reh i tinamit pantz'eet reje reh i rookb'aal i q'iij. Re' wilik wii' i tiyoox i nuksanik wach i rujosq'iil i Dios. 4Eh ar xwilow wo' chik wach i ruloq'il i QaJaaw i qaDios i hoj, hoj aj Israel. Je' rukab' i rujosq'iil xwilow wach panusaq wiriik wach k'ixkaab'. 5Re' i je' ruwii' winaq je' wili i xuq'or weh: Hat rak'uun winaq ti tz'ehtanoq reje pantz'eet reh i rookb'aal i q'iij, inki. Re' hin xintz'ehtanik wo' reje ar. Eh panookb'al i koq ma' najt ta ruuk' i puerta wilik wii' i artaal ar wilik i tiyoox i nuksanik wach i rujosq'iil i Dios. 6Eh je' wo' chik wili i xuq'or weh i je' ruwii' winaq: Hat rak'uun winaq ¿Mi nawil i xiik' naah yib'kiil wach inki a'n ayu' i aj Israel? Ruum inki a'n re' re' k'ahchi' kiin kesam reje pan nuSantolaj paat. Re' hin i nuq'or aweh chi ko wilik i xiik' naah yib'kiil wach naa awilom, inki. 7Eh xiruk'am b'ila' chik i koq panookb'al chi chii' i rupaat i Dios, eh chuwach i tz'aq xwilow wach jinaj i hoop. 8Eh je' wo' chik wili i xuq'or weh: Hat rak'uun winaq chanimb'isaj i hoop re' re', inki. Eh re' hin xnunimb'isaj wo' hoq i hoop, eh xnureq jinaj i ookb'al. 9Je' wo' chik wili i xuq'or weh: Okeen i koq ar neenawilow i xiik' naah yib'kiil wach inki a'n inki. 10Eh noq xinokik i koq xwilow chi chuwach tz'aq tz'ihb'amaj i kehtalil i chikop xa kijukem kiib' noq kib'ehik, i kehtalil i chikop xiik' naah yib'kiil kiwach. Eh je' wo' i kehtalil i tiyoox inkiloq'ej i aj Israel. 11Eh chikiwach taqe i ehtalil re' re' wilkeeb' i koq i lajeeb' ru kajwinaq chi winaq, re' taqe i k'amal kib'eeh i aj Israel, eh pankiyejaal wilik i Jaazanias rak'uun i Safán. Eh k'ahchi' keeb' i koq chi loq'inik chi kiju'junaal kiyohq'eem kisansario xaq'eq chik paam i rusib'eel i insensia injohtik taxaaj inki a'n 12Re' i je' ruwii' winaq je' wili i xuq'or weh: ¿Mi nawil inki a'n taqe i k'amal kib'eeh i aj Israel, k'ahchi' kiloq'em i tiyoox chi q'eeqmaal? Re' keh inkikapaaj chi ma' k'ahchi' ta wilow taqe, chi ma' wilkiin ta chupaam i tinamit wili. 13Re' i hat ma' xata re' re' naa awilom ko wilik la' i xiik' naah yib'kiil wach naa kia'nam, inki. 14Eh xiruk'am reje chi chii' i ru puertahiil i rupaat i QaJaaw Dios, re' i puerta wilik reje pantz'eet reh i rookb'aal q'iij. Eh wilik taqe i ixoq xwilow kiwach ar xasuq chik kioq'ik chi riij i tiyoox Tamuz rub'ihnaal. 15Je' wo' chik wili i xuq'or weh: ¿Mi nawil inki a'n ixoq re' re'? Eh ma' xata re' re' naa awilom ko wilik i xiik' naah yib'kiil wach naa awilom, inki. 16Eh xiruk'am i koq chupaam i rupaat i QaJaaw Dios, eh ruuk' i koq i artaal xwilow chi ar wilkeeb' i ho'oob' ru ka'winaq chi winaq, re' i kiij kiye'em reje reh i wilik wii' i rupaat i QaJaaw Dios. Ar kika'yik reje parelb'aal i q'iij kipach'aam kiib' korehtaal inkireq wach ak'al ruuk' i yejal kiwach chi looq'jiik reje i q'iij. 17Eh re' QaJaaw je' wo' chik wili i xuq'or weh: ¿Mi nawil taqe re'? Re' taqe i aj Judá ma' xata re' i panupaat inki a'n i yiib' wach na'ojb'al, inkinujisaj la' wo' paam i tinamit ruuk' i yiib' wach na'ojb'al. Re' keh k'ahchi' kijosam wach i nujosq'iil, imponik ruchuhkiil panuju' i loq'inik inki a'n 18Re' hin yohb'aal wach i nujosq'iil naa nuye'em chikinaah, ma' naa ta nuketelaam kiwach. Atoob' ta kik'er kichii' chi tiij, re' hin xama' naa ta wo' b'iram taqe, inki weh panusaq wiriik.

will be added

X\