EZEQUIEL 6

1Re' i QaJaaw Dios je' wili i xuq'or weh: 2Re' hat rak'uun winaq ti tz'ehtanoq reje chikinaah i yuuq' wilkeeb' Israel, cha q'oreej taqe panub'ihnaal. 3Je' wili i neenaq'or keh: Hat taq najt anaah yuuq', hat taq rub'ohl yuuq', hat taq nim ha', i hat taq k'ixkaab', je' wili i ruq'or taq aweh i QaJaaw Dios: Re' hin naa nuk'amam chee q'aq'inik taq cha naah naa nusacham taq awach i hat najt taq anaah yuuq' re' kiloq'jik wii' i tiyoox. 4Re' hin naa nusacham kiwach ar taqe aa artaal, re' i nayeew taq wii' aamayiij i hat taq aj Israel, naa nupaxem i tiyoox rujalwaach i q'iij re' inakoj taq chi aadios, eh naa nukansam taqe i koq chuwach i kitiyoox. 5Naa nukutum i kiti'jolal i aj Israel chuwach taq aatiyoox. Eh re' i kib'aqil ar naa nukutum chi junsuut taq aa artaal. 6Xa aha' pa' i tinamit naa apatiniik taq wii' naa rusachariik wach. Eh re' taqe inajt kinaah yuuq' wilik taq wii' aa artaal, inaloq'ej taq wii' tiyoox naa wo' rusachariik kiwach. Re' taq aatiyoox rujalwaach i q'iij naakixerariik, re' taq aa artaal i naakituhb'jiik wach ak'al. Chu'nchel i ayejaam taq i hat naa rusachariik kiwach. 7Noq naa taq awilom chi ma' k'isiin taqe i kamnaq naakikahnik chi kutlik taq chaxilak, naa taq anab'eem chi xa re' wo' hin i k'achlik Dios. 8Xa re' la' re' hin ma' naa ta nuye'em q'ab' chi naa taq akimiik chawunchelaal i hat taq aj Israel i tukimaj taq awach pantaq tokoom tinamit. 9Eh re' taqe i naa kikahniik chi kok'achalkeeb' taq panaxilak, naa ruk'uliik cho pankik'ux chupaam taqe i tokoom tinamit nik' wach noq xwik'saj taqe chi ti' k'axik, ruum ma' xinkinimaj taj. Eh ruum chi xinkiq'eb' chi riij kik'ux i hin, re' chik i tiyoox xkiloq'ej. Re' keh ma' k'isiin ta naa ruchaliik kik'ixiik, ruum i ch'uwa' wach na'ojb'al inki a'n 10Eh naa kinab'eem chi re' hin i k'achlik Dios ma' kinchukwik ta q'orik noq xnuq'or chi naa nuye'em ti' k'axik chikinaah naa wo' nuye'em tiko'q keh, inki Dios. 11Eh re' i QaJaaw Dios je' wili i xuq'or weh: Re' hat chapohq'aaj paam aq'ab' chatohyaaj aawooq wach ak'al, ti oq'oq, cha k'er aachii' chi riij i kiyiib' wach na'ojb'al i aj Israel. Ruum re' keh wilik i naa kikimiik ruum q'aq'inik, wilik i naa kikimiik ruum wi'jaleel, wilik i naa kikimiik ruum yab'ilaal. 12Re' taqe i wilkeeb' poo chi najt, naa kikimiik ruum yab'ilaal, re' taqe i ma' najt ta wilkeeb' naa kikimiik ruum q'aq'inik. Eh re' taqe i naa kikahniik chi k'achalkeeb' naa kikimiik ruum wi'jaleel. Je' re' noq naa wik'sam i nujosq'iil, chikinaah. 13Eh noq naakilom i kiti'jolal i kitinamiit chi kutlik chi kixilak taqe i tiyoox, chi kijunsuut taqe artaal, chupaam taqe i ye'aab' najt kinaah, chinaah taqe inajt kinaah yuuq', chi ki'sil taqe chee' tz'inuj, chupaam i ye'aab' inkiyeew wii' inkohnik laj mayiij chuwach i tiyoox, naa kinab'eem chi re' hin i k'achlik Dios. 14Re' hin naa nukanaam i kiye'aab' chi xan tz'irik chik paam, chi xa je' chik chiq yuuq', ar naa rutohq'iik reje pantz'eet reh i rookb'aal q'iij naa ruponiik chupaam i ye'aab' Diblat. Ruuk' i re' naa kinab'eem i aj Israel chi re' hin i k'achlik Dios, inki.

will be added

X\