EZEQUIEL 5

1Re' i QaJaaw Dios je' wili i xuq'or weh: Re' hat rak'uun winaq cha sik' jino'q i q'aslaj kuchilo, re' ruuk' i johyb'al, ruuk' i re' neenajoy i rismaal aanaah i awisinchii'. Eh oxb'ohr neenawisaj aawismaal noq neenapaj pan pexu. 2Eh jumb'ohr aawismaal neenak'at panyejaal i tinamit noq neenkuxik i q'aq'inik, nee wo' chik nayok' jumb'ohr-oq aawismaal neenakut chi junsuut i tinamit. Eh re' chik i jumb'ohr chi aawismaal neenakut pan taxaaj xa aha' neenk'amarik reje ruum i teew, re' re' rehtalil chi xailook' chik i nuyeew nujosq'iil chikinaah je' rukab' i q'aslaj ch'ihch'. 3Eh naa wo' achopom cho k'isinoq aawismaal reh chi nee natus chi rooq aso'. 4Chi riij i re' naa wo' chik achopom cho kiib' ixib'-oq chi naq'awach aawismaal neenakut yejal q'aaq' re' re' naruk'atwiik keh chu'nchel i tinamit Israel. 5Re' i QaJaaw Dios je' wili xuq'or: Je' aj wili i naa ruk'ulum i tinamit Jerusaleem, ruum re' wo' naq i hin xin ye'wik kajaawriik, chikiwach i kok' tinamit i nimaq tinamit. 6Eh re' keh ma' xkaaj ta chik kinimam taqe i nuk'uhb'aal, eh ma' xkaaj ta wo' kianam i xnuq'or keh. Xti ma' kinimanik ta wo' chik k'isinoq i keh xkiq'at wo' chik wach i wilkeeb' pankok' tinamit, eh i wilkeeb' pan nimaq tinamit wilik chi kijunsuut. 7Eh re' hin i Dios je' wili xnuq'or keh: Re' taq i hat xti q'e' wo' chik ma' xat nimanik ta taq ma' xata je' rukab' i xkian tinamit wilkeeb' taq cha junsuut. Ma' xanimaj ta taq i nuk'uhb'aal, eh ma' xanimaj ta wo' taq i k'uhb'aal inkinimaj i tinamit wilkeeb' taq cha junsuut. 8Eh ruum i re', re' hin i Dios xchalik nujosq'iil cha naah taq i hat aj Jerusaleem. Naa taq kaat nuye'em chutojariik aamahk reh chi naakilom i wilkeeb' panimaq tinamit. 9Ruum chi ma' nakanaa' ta taq rub'aan ach'uwa' wach na'ojb'al, re' hin naa nuye'em ti' k'axik taq cha naah, re' ruuk' i ma' jank'al ta nuyeew chaloq, eh ma' naa ta wo' chik nuye'em. 10Eh chaxilak taq i hat wilik taqe i ajaab'ees naa kik'uxum i kak'uun, eh wilik taqe ak'uunb'ees naa kik'uxum i kajaaw. Naa taq kaat nuye'em chutojariik amahk, eh re' i konaakikahniik chi k'achalkeeb' naa nutukem reje kiwach xa aha' yuuq'. 11Re' hin i k'achlik Dios xti korik i nuq'or chi naa taq nusacham awach, ma' naa ta nuketelaam taq k'isinoq awach. Ruum xach'uwa'risaj taq paam i nuSantolaj paat ruuk' i kilooq'jiik i tiyoox, ruuk' taq i ayiib' wach ana'ojb'al. 12Eh achk'isiin ma' yejaal taq aatinamiit naa kikimiik ruum yab'ilaal, ruum wi'jaleel, eh re' k'isiin chik ma' yejaal naa kikanteesjiik kuum i aj ixowaal. Eh re' chik i ruqox naa nutukem kiwach xa aha', re' i nujosq'iil naa nuye'em chikinaah, xa je' chik rukab' i q'aslaj ch'ihch'. 13Korehtaal inwik'saj i nujosq'iil chikinaah, ruuk' i re' naa ruch'iklojiik nuk'ux. Eh noq wik'sam chik i nujosq'iil chikinaah naa kinab'eem chi re' hin i Dios aha' wilik i nuq'or i nub'an wo' hoq. 14Re' hin naa nusacham taq awach, naa taq nuk'uhtaam ak'ixb'ilaal chikiwach i tinamit wilkeeb' taq cha junsuut. Eh re' i naakik'iik ar naakilom taq i naa ak'ulum. 15Eh noq naa nuye'em i nujosq'iil taq cha naah, tojb'al taq riij aamahk chu'nchel taq naa kikaqse'lanik aweh. Naa taq kaat kib'ajam i wilkeeb' taq cha junsuut, eh naa kiyo'jiik noq naakilom taq i naa ak'ulum. Re' wili re' hin kin q'orik, inki i Dios. 16Re' hin naa nuye'em i runimaal wi'jaleel taq cha naah re' i naa rusachwiik taq awach. Korik wo' hoq chi naa nuye'em wi'jaleel taq cha naah, sachb'al taq awach, korehtaal i nukanaa' chi ma' xta chik k'uxumb'al taq aweh. 17Re' hin naa nuye'em i wi'jaleel, i yab'ilaal taq cha naah. Naa nutaq'aam taqe chaloq i josq'laj chikop, chi sachb'al taq awach, eh naa ta kaat kikanaam chi ma' xta chik taq awak'uun awixq'uun. Eh wilik taq aweh i hat i naa kikimiik panq'aq'inik, inki i Dios.

will be added

X\