EZEQUIEL 47

1Re' winaq xiruk'am b'ila' wo' chik reje chi chii' i rupaat i Dios. Eh xwilow chi jinaj i ha' inaasjik chaloq chi ri'sil i puerta xb'ehik chik reje rooq chi korkiil ireelb'aalq'iij, re' inilwik reje wii' i rupaat i Dios. Ar xqajik reje pansak'aaj reh i rupaat i Dios, pansak'aaj reje reh i artaal. 2Eh xiresaj chaloq i wilik wii' i rupaat i Dios, ar xiresaj cho chi chii' i puerta inilwik reje pansak'aaj reh i rookb'aal i q'iij. Ko ar xponik qakotej imb'aan wii' okik chi riij wilik reje parelb'aal q'iij. Eh inwilow jinaj wo' chik i k'isa ha' inaasjik chaloq pantz'eet reh i rookb'aal i q'iij. 3Re' i winaq xooj b'ila' chik reje chi korkiil ireelb'aali q'iij jinaj i pajb'al k'ahaam ruyohq'eem, xupaj reje i hoob' siento b'ara, eh xirik'saj reje chupaam i rooq ha', xa ralaq wooq xponik i ruchamiil. 4Eh xupaj wo' chik reje i hoob' siento b'ara, eh xirik'saj reje chupaam i rooq ha' nah nuch'ehk xponik i ruchamiil. Eh xupaj wo' chik reje i hoob' siento b'ara, eh xirik'saj reje chupaam i rooq ha', konah nutuuq xponik i ruchamiil. 5Eh xupaj wo' chik reje i hoob' siento b'ara. Eh inwilow i rooq ha' xsutinik chi qaman nim ha' xiik' naah chamiil, ma' xnub'an ta chik ik'ik chupaam, xa pamux chik neemb'aan ik'ik chupaam. 6Eh re' winaq je' b'ila' wili i xuq'or weh: Chakoj rehtaal chi korik aha' wilik taqe i xawilow, inki. Eh xirusutej wo' chik chaloq chi chii' i rooq ha'. 7Eh xwilow wo' hoq chi k'ultar chi chii' i rooq ha' re' re' ma' k'isiin taqe i chee' wilkeeb' ar. 8Re' winaq je' b'ila' wili i xuq'or weh: Re' rooq ha' wili ar ojik i rub'an parelb'aal q'iij inik'ik taqe ponoq paruyuq'ul Arabá, imponik chupaam i kamnaq palaw. Eh noq re' ha' wili inokik ar inkahnik chi holohik xasaq chik wach i ruha'iil. 9Chu'nchel i chikop naa kiwihiik chupaam i nim ha' wili naa ruwihiik kik'achariik, eh ma' k'isiin i kar naa kiwihiik chupaam i palaw naa rokiik wii' i rooq ha' wili. Naa ruwihiik kik'achariik chu'nchel i chikop naa kiwihiik chupaam i nim ha' wili. 10Eh chi chii' i palaw re' re' naa kiwihiik i aj karineel ar naa kitoq'aam reje En-gadi naakiponiik En-eglaim, ar naakichiqsam wach i kiya'l chopb'al kar. Eh ma' k'isiin i kar naa kiwihiik ar xata wo' jar b'uhr kiwach je' rukab' i wilkeeb' chupaam i palaw Mediterráneo. 11Re' taqe i tuhqel ha', eh re' taqe i ch'uwa' paam ye'aab' ma' naa ta rusaqb'iik kiwach naa la' kikahnik chi ehteesb'al aatz'aam. 12K'ul chi chii' chi ju'juntar i nim ha' wili naakik'iik taqe i chee' ink'uxarik i wach, ma' naa ta ruq'ehb'iik i kixaq, ma' naa ta kimayam wachinik chi jumpech rajlaal poh naa kiwachiniik. Ruum re' i naa rut'aqsanik keh re' i rooq ha' naa resjiik cho parupaat i Dios. Eh re' i naakiwachum naa rukamaniik chi k'uxumb'al, eh re' i kixaq naa rukahniik chi iq'oom, inki. 13Re' i QaJaaw Dios je' wili i xuq'or: Re' taqe i wili i k'ula't reh i tinamit naakik'ulum chi kikooch i kab'laj chuq chi aj Israel. Re' taqe i riih rumaam i José ka'seht i naakik'ulum. 14Re' hin xnuq'or chee xti korik keh taq aamaam awati't chi naa nuye'em keh i ye'aab' wili. Je' re' noq naa ach'aqam keh eliik wach ninqaal i naa aye'em keh i ju'jun ch'uq. Re' wili naa rukahniik chi kikooch. 15Je' wili nimaal rooq pantz'eet reh i rookb'aal i q'iij ar naa rutoq'aam reje chi chii' i palaw Mediterráneo, naa rik'iik ponoq chi chii' i tinamit Hetlón, je' wo' chi chii' taqe i tinamit Sedad. 16Naa rik'iik reje chi chii' i Hamat, eh chi chii' i Berota, chi chii' Sibraim, re' taqe i ye'aab' wilkeeb' pank'ula't ruuk' Damasco, re' i Hamat, je' wo' hoq i Hazar-haticon, wilkeeb' pank'ula't ruuk' i Haurán. 17Je' re' nimaal rooq pantz'eet reh i rookb'aal i q'iij ar naa rutohq'iik reje chi chii' i palaw Mediterráneo, eh naa ruponiik kopan k'ula't ruuk' Hazar-enán. Ar naa rukahniik pantz'eet reh i rookb'aal q'iij reh i tinamit Damasco, i tinamit Hamat. 18Eh re' ye'aab' parelb'aal i q'iij naa rutohq'iik reje pank'ula't ruuk' i ye'aab' Haurán, ruuk' i Damasco, konaa ruponiik chi chii' i tinamit Tamar chi chii' i kamnaq palaw, i runimaal rooq i nim ha' Jordán. Eh naa rukahniik chi k'ula't ruuk' i tinamiit Galaad, ruuk' i tinamit Israel. 19Eh re' i runimaal rooq i ye'aab' pantz'eet reh i rookb'aal q'iij, naa rutohq'iik reje chi chii' i ye'aab' Tamar, naa rik'iik ponoq chi chii' i nim ha' Meriba-cades, inchalik Egipto, naa ruponiik chi chii' i palaw Mediterráneo. Je' re' nimaal i naa rub'anam reje pantz'eet reh i rookb'aal q'iij. 20Eh re' i runimaal i ye'aab' parookb'aal reje i q'iij ar nareliik chaloq chi chii' i nimlaj palaw Mediterráneo, naa ruponiik pank'ula't reh i Egipto, eh panookb'al reh i Hamat i runimaal. 21Re' aj re' i ye'aab' wili naakich'aqam chikiwach i kab'laj ch'uq chi aj Israel. 22Re' i ye'aab' wili naa rukahniik taq chi akooch, eh noq naa taq ach'aqam chawach i ye'aab' re' re' naa wo' aye'em taq keh i tokoom tinamit wilkeeb' taq chaxilak i wilik chik kak'uun kixq'uun. Naa taq akojom chi je' cho panatinamiit Israel xi-aasjik, eh naa wo' kikahnik chi awuch aj Israel taqe. 23Eh aha' pa' taq naa awihiik i hat chach'uhqal, wila' wilik taqe i tokoom tinamit taq chaxilak ar wo' naa taq aye'em kiye'aab', inki i QaJaaw Dios.

will be added

X\