EZEQUIEL 46

1Re' i QaJaaw Dios je' wili i xuq'or: Re' i puerta wilik i koq chupaam inilwik reje parelb'aal q'iij naa rutz'ahpiik chuwach i waqiib' q'iij paruq'ijil kamanik. Xa re' wo' naa rutehiik chupaam i hi'limb'al q'iij, eh noq naa runinq'ijiik i ak' poh. 2Re' ajaab'ees naa rokiik i koq chi chii' puerta wilik reje chi' paat. Ar naa rupab'aam riib' wach i ruche'el i puerta noq re' taqe i k'amal kib'eeh aj tiij naa kiq'asam i k'atoj mayiij, eh i mayiij k'amb'al keh panotob'il wuuk' i hin, hin Dios. Eh chii' puerta naa kinkiloq'em pankomonil, eh naa wo' chik keliik cho ar xa re' la' koxq'eq naakitz'apam i puerta. 3Eh chu'nchel i tinamit naa kinkiloq'em chi chii' i puerta re' re' chupaam i hi'limb'al q'iij, eh noq naakininq'ijeem i ak' poh. 4Eh panhi'limb'al q'iij i ajaab'ees waqiib' rak'uun tentzun naa ruk'atam chi rumayiij, eh jinaj imas tentzun re' ruuk' taqe i manlik wach kiti'jolal. 5Eh chi ruk'uliil i ju'jun chi imas tentzun juninaq nimaq lemeta chi naq'wach i tik naa ruye'em. Eh chi k'uliil i rak'uun tentzun xanik' pa' nimaal i neenchalik paruk'ux. Eh chi k'uliil i juninaq chi nimaq lemeta i wach i tik naa ruye'em i k'isiin ma' kijib' nimaq lemeta chi aseite. 6Noq naa taq aninq'ijeem i ak' poh re' ajaab'ees naa ruq'asam chi mayiij i k'isa imas wakax, waqiib' i kok' tentzun, jinaj imas tentzun, manlik wach i kiti'jolal. 7Eh noq naa ruye'em chi rumayiij i k'isa imas wakax, naa ruye'em haa' i juninaq lemeta chi naq wach i tik, je' wo' re' k'ihaal i naa ruye'em haa' ruuk' taqe i ju'jun chi imas tentzun. Eh re' i naa ruye'em haa' ruuk' taqe i kok' tentzun nik' pa' k'ihaal i neenb'aan ruye'ariik, naa ruye'em haa' i k'isiin ma' kijib' nimaq lemeta chi aseite. 8Eh re' i ajab'ees ar naa rokiik i koq chupaam i b'eeh wilik chucheel i puerta, eh ar wo' chik nareliik chaloq. 9Eh noq naa rub'aan i ninq'iij, re' i tinamit naa kokiik chi chii' i puerta inilwik reje pantz'eet reh i rookb'aal q'iij, ar chik naakeliik reje chi chii' i puerta inilwik reje pansak'aaj reh i rookb'aal i q'iij. Re' taqe i naa kokiik i koq chi chii' i puerta inilwik reje pansak'aaj reh i rookb'aal i q'iij, ar chik naakeliik reje chi chii' i puerta inilwik reje pantz'eet reh i rookb'aal i q'iij. Ma' ar ta chik naakeliik chaloq aha' naa kokiik i koq. 10Eh re' i ajaab'ees ar wo' naa rokiik i naa kokiik wii' tinamit, ar wo' naa reliik naakeliik wii' i tinamit. 11Chupaam taqe i chi ninq'iij naa ruye'ariik chi mayiij i juninaq nimaq lemeta chi naq'wach i tik, chi kik'uliil i ju'jun chi imas wakax, eh je' wo' re' k'ihaal i naa ruye'ariik chi ruk'uliil i ju'jun chi imas tentzun. Eh re' i ju'jun chi kok' tentzun xanik' pa' k'ihaal i neenb'aan ruye'ariik. Eh re' i juninaq nimaq lemeta chi naq'wach i tik, naa ruye'ariik chi ruk'uliil i k'isiin ma' kijib' nimaq lemeta i aseite. 12Eh noq re' ajaab'ees xanaa ruchaliik paruk'ux chi naa ruye'em jino'q i k'atoj chikop chi mayiij, oon jino'q i mayiij k'amb'al taq aweh panotob'il wuuk' i hin, hin Dios, neenteh i puerta inilwik reje parelb'aal q'iij, neeruq'asaj i rumayiij chi je' rukab' i rub'an pan hi'limb'al q'iij. Eh noq elinaq chik ar naa wo' chik rutz'ahpiik i puerta. 13Re' ajaab'ees re' re' rajlaal q'iij naa ruq'asam chi rumayiij i ju'jun chi kok' tentzun ju'jun haab' i wilik keh manlik wach i kiti'jolal, reh chi neenk'atarik chi mayiij chi nuwach i hin. 14Raaj laal wahq'eq wuquub' nimaq lemeta chi naq'wach tik naa taq aye'em chi amayiij chi nuwach i hin. Eh jinaj lemeta chi aseite taq i naa ajalk'iim chinaah i ke'emaj trigo, re' taqe i mayiij re' re' xti koruman chi naa rub'aan. 15Noq naa taq aq'asam chi k'atoj mayiij i tentzun komanaan, je' wo' taq i amayiij chi naq'wach taq atik, ruch'ihil i aseite pantaq wahq'eq taq naa aq'asam. 16Eh wila' re' i ajaab'ees xusiij rak'aal i rak'uun, eh re' i rak'uun, reh wo' chik taqe i rak'uun rixq'uun nee rukanaa' i reh. 17Eh wila' re' ajaab'ees xuyeew rak'aal jino'q i rumoso, xa re' wo' reh noq k'ahchi' chi kamanik ruuk', eh noq naa wo' chik rumayam i kamanik ruuk' naa wo' chik ruq'asam reh i ajaab'ees. Xa re' wo' ak'al naa ruye'em keh i rak'uun rixq'uun naa rukahniik chi keh chi jumpech. 18Re' reey i ruk'ul chi naa ruye'em kak'aal i rak'uun rixq'uun, xa re' la' re' ruuk' i rak'aal i reh naa ruye'em keh ma' naa ta ruq'uchum i kak'aal i nutinamiit. Reh chi ma' naa ta chik kielik reje pan kiye'aab' i nutinamiit, inki. 19Re' winaq xwil wach xiruk'am b'ila' reje chupaam i ookb'al wilik chucheel i puerta, eh xiruk'am i koq chupaam i kok' paat wilkeeb' reje pantz'eet reh i rookb'aal i q'iij re' i kuxisamaj chi kiye'aab' i k'amal kib'eeh aj tiij. Eh xuk'uhtaaj weh jinaj i ye'aab' wilik reje parookb'aal i q'iij chi riij i paat. 20Je' wili i xuq'or weh: Re' taqe i k'amal kib'eeh aj tiij chupaam i paat wili naakichaq'sam i chikop naa kiq'asam chi mayiij, pahqb'al kuyb'al mahk. Ayu' wo' naakik'ilem inaq'wach i tik reh chi ma' nee ta nelik cho riij paat taqe i mayiij re' re'. Eh ma' naa ta kitz'a'am i tinamit ruum wilik rusantohiil, inki. 21Eh xiresaj wo' chik reje riij paat, eh xiruk'am reje chupaam i kajtz'u'k reh i tehlik chii' paat. Eh chupaam taqe i ju'jun chi rutz'ukaal wilik i ju'jun chi tehlik, je' rukab' i chi' paat. 22Eh re' taqe i tehlik reje chii' paat eliik wach kininqaal kikajcheel i juninaq b'ara runimaal kooq ho'lajuuj b'ara runimaal kiwach. 23Eh kotimaj kiij chi tz'aq chi kiju'junaal, eh paraa' taqe i ju'jun chi tz'aq wilik taqe i luk'b'al q'aaq'. 24Eh re' winaq je' wili i xuq'or weh: Re' taqe i k'amal b'eeh aj tiij chupaam taqe i ye'aab' wili naa kiq'asam i naa kik'amam cho chi kimayiij i tinamit, inki.

will be added

X\