EZEQUIEL 43

1Re' i winaq xiruk'am b'ila' wo' chik reje chi chii' i puerta wilik reje pareelb'aal q'iij. 2Eh xwilow i ruloq'il i qaDios i hoj, i hoj aj Israel chalik i rub'an parelb'aal i q'iij. Xan choqik chik, xa je' chik rukab' i choqik i rub'an i ma' k'isa ha', eh xan saquminik chik wach aak'al i rub'an i ruloq'il. 3Re' xwilow panusaq wiriik wili je' rukab' xwilow panusaq wiriik noq xwilow chi re' i QaJaaw xchalik chi rusachariik wach i Jerusaleem. Eh je' wo' rukab' xwilow wach panusaq wiriik chi chii' i nim ha' Kebar, re' i hin xnupach'aa' qohoq wiib' wach ak'al. 4Eh re' i ruloq'il i QaJaaw Dios chi chii' i puerta inilwik reje parelb'aal q'iij xokik, noq xokik chupaam i rupaat i QaJaaw Dios. 5Re' i Dios xiruk'am reje i Ruxlab'al ko chupaam i ye'aab' wilik i koq ar, ruuk' i ruloq'il xunujisaj paam chu'nchel i rupaat noq xwil. 6Eh re' i winaq xpa'lojik b'ila' chik chi nucheel, eh xb'iraj chi xiruq'o'reej chee QaJaaw Dios ko parupaat. 7Je' b'ila' wili i xuq'or weh: Hat rak'uun winaq re' wili naa rukahniik chi nuye'aab', noq naa nuwihiik chi kixilak i aj Israel, chi juneliik. Re' keh ma' naa ta chik kich'uwa'risam wach i nuSantolaj b'ihnaal ayu' ruuk' i kilooq'jiik taqe i tiyoox, ni xata re' taqe i kireey naakib'aniik taqe i yiib' wach na'ojb'al re' re'. Eh ma' naa ta chik ruchaliik kimuq'aam i ruti'jolal i kireey chinaah taqe yuuq' wilkeeb' ma' najt ta ayu'. 8Ma' naa ta kiyejaam i rupaat i reey chuk'ulwaach i nupaat i hin, ma' naa ta rukahniik chuk'ulwaach i nupuerta i hin i ru puertahiil i paat re' re'. Ma' nee ta rub'an chi xa jumpehr chi tz'aq i neenq'atwik paam i paat re' re' ruuk' i wee hin. Re' keh i xkich'uwa'risaj wach i nuSantolaj b'ihnaal ruuk' kiyiib' wach na'ojb'al. Ruum i re' xnusach kiwach ruum i nujosq'iil. 9Yu'naak i ruk'ul chi naa kiq'eb'em reje wulu' i kiyiib' wach na'ojb'al, eh chi najt chik naa rojiik kimuq'aam i kiti'jolal i kireey. Eh re' chik i hin naa nuwihiik pankiyejaal pan kixilak chi jumpech. 10Re' hat rak'uun winaq hiy cha k'uhtaaj keh i aj Israel i ruwii' i rehtalil i runimaal i nupaat xawilow wach panasaq wiriik, reh chi neenchalik kik'ixiik ruum i yiib' wach na'ojb'al inki a'n 11Wila' xik'ixiik ruum i yiib' wach na'ojb'al. Neenach'ob' rub'ehel i rehtalil i nupaat, eh chib'ih jariik i wilkeeb' chupaam nik' wach noq wilkeeb' i ookb'al, i elb'aal. Eh neena ch'ob' rub'ehel i k'uhb'aal naa runimjiik ayu', eh neenatz'ihb'aaj rehtalil keh reh chi neenkireq chi riij, eh neenkian rub'aan. Eh chatz'ihb'aaj keh taqe i ruq'or i k'uhb'aal reh chi neenkinimaj. 12Re' i wili i k'uhb'aal chi riij i nupaat, chu'nchel i ye'aab' wilik chinaah inajt naah yuuq', chu'nchel i wilik chi junsuut xti wilik rusantohiil, eh xiik' naah loq'il, inki Dios. 13Aha' wilik i xpajarik wii' i rupaat i Dios re' wo' chik i re' xpajarik wii' i artaal, eh chi junsuut i artaal wilik jinaj i jul paam tz'aq, yejal i b'ara runimaal wach, yejal wo' b'ara ruchamiil paam. Eh chi chii' i jul re' re' wilik jinaj i q'atb'al jinaj nimlaj k'itub' runajtiil naah. 14Re' i rehtalil i artaal ixib' ch'iht noq wilik: Re' peet ch'iht jinaj b'ara runatiil naah, yejaal i b'ara i rumeetz' elinaq chaloq. Eh re' i rukab' ch'iht jinaj b'ara wo' runajtiil naah yejaal i b'ara wo' elinaq chaloq i rumeetz'. Eh re' i roxch'iht kiib' b'ara runajtiil naah yejaal b'ara elinaq chaloq i rumeetz'. 15Eh paroox ch'iht i artaal kiib' b'ara runajtiil naah, eh pantaq rutz'u'kaal i artaal pa'alkeeb' johtoq i ju'jun chi ruk'aa'. 16Re' i runimaal i roxch'iiht i artaal kajtz'u'k noq wilik waqiib' b'ara wilik reh i chi ju'juntar. 17Re' i ch'ilik wii' i raa' kajtz'u'k wo' noq wilik wuquub' b'ara i wilik reh chi ju'juntar, re' i jul wilik chi rujunsuut yejaal i b'ara i runimaal wach, re' i q'atb'al jinaj mama' k'itub' i runajtiil naah. Eh re' i ixkaleria johtb'al ar wilik reje parelb'aal q'iij. 18Eh re' i winaq je' wili i xuq'or weh: Re' i QaJaaw Dios je' wili i xuq'or: Noq naa rukuxiik rukorb'eesjiik i artaal, naa rusulariik, naa kik'atam i chikop chi kimayiij chinaah, eh naa kikihraam i kik' chinaah. 19Eh naakiye'em jinaj i komanlik laj imas wakax chi kimayiij chinaah i artaal pahqb'al kuyb'al kimahk. Re' naa kib'aniik reh i nukamaj re' re', re' taqe i k'amal kib'eeh i aj tiij re' ruuk' taqe i aj LevĂ­ta, re' ruuk' taqe i riih rumaam i Sadoc, inki i QaJaaw Dios. 20Eh re' hat naa akihraam i kik' chinaah i kijib' chi ruk'aa' i artaal, je' wo' pantaq rutz'u'kaal, eh naa wo' akihraam i kik', chinaah i q'atb'al johtinaq naah i sutimaj wii' riij. Chi je' re' naa kikanaam chi saq wach i artaal. 21Chi riij i re' neenawesaj chaloq imas wakax xye'arik chi mayiij chi riij i mahk neenooj ak'at chi riij i rupaat i Dios. Re' wo' hoq i ye'aab' korjinaq chi k'atb'al reh. 22Eh chi junwar jinaj imas kaprax manlik wach i ruti'jolal naa aye'em chi mayiij reh i chi riij mahk. Re' taqe i k'amal kib'eeh aj tiij ruuk' i re' naakisaqb'isam wach i artaal, je' wo' rukab' i naa kianam ruuk' i k'isa imas wakax. 23Eh noq naa akohlaam i ye'ej mayiij saqb'eesb'al wach i artaal, neenachop jino'q i k'isa imas wakax. Eh nee wo' nachop jino'q imas tentzun re' ruuk' i manlik wach i kiti'jolal. 24Neenayeew chi mayiij, eh re' taqe i k'amal kib'eeh aj tiij neenkitileej aatz'aam chinaah neenkik'at chi kimayiij chi ye'b'al nuloq'il. 25Eh eqal eqal chuwach i wuquub' q'iij naa aq'asam chi mayiij jinaj imas kaprax pahqb'al kuyb'al mahk. Jinaj imas wakax, jinaj i imas tentzun chi mayiij, re' ruuk' taqe i manlik wach kiti'jolal. 26Eh re' taqe i k'amal kib'eeh aj tiij i iqal i iqal chuwach i wuquub' q'iij naakiye'em i mayiij chinaah i artaal ruuk' i re' naa rukahniik chi saq wach, eh naa kikuxisam. 27Eh noq ik'inaq chik i wuquub' q'iij re' re', eh chupaam i ruwahxaaq q'iij, re' taqe i k'amal kib'eeh aj tiij naa rutohq'iik kiye'em i mayiij chinaah i artaal, je' wo' taqe i k'atoj chikop chi mayiij. K'amb'al taq awiib' panotob'il wuuk' Eh re' hin nee taq ti nuk'ul wuuk' chi suq nuk'ux, inki i QaJaaw Dios.

will be added

X\