EZEQUIEL 41

1Chi riij i re', re' i winaq xiruk'am i koq chupaam i rupaat Dios xupaj wo' taqe i rooq i paat ox ox b'ara paam i ju'jun, je' nimaal santo laj itz'ihy naah paat. 2Re' i puerta xupaj wo' hoq i k'isiin ma' ho'oob' b'ara xelik chuwach. Re' taqe i chee' ch'ilik wii' i puerta ki'ib' b'ara ruuk' yejaal runimaal wach chi ju'jun tar xupaj wo' ye'aab' wilik panyejaal juninaq b'ara rooq, lajeeb' b'ara wach xelik chuwach. 3Re' i winaq xiruk'am i koq ko chupaam i ye'aab' xupaj taqe rooq i paat wilkeeb' ar suut chi ju'jun b'ara i runinqaal paam i ju'jun. Re' i runimaal wach i puerta ixib' b'ara, re' ookb'al ixib' b'ara ruuk' yejaal runimaal wach. 4Eh re' i winaq xupaj wo' hoq i ye'aab' wilik i koq ko chupaam, eh suut chi lajeeb' b'ara xelik chuwach. Je' b'ila' chik wili i xuq'or weh: Re' i ye'aab' wili xti wilik rusantohiil, inki. 5Eh re' winaq xupaj wo' hoq i tz'aq wilik chi junsuut i rupaat i Dios, ixib' b'ara rupimiil. Eh chuwach i tz'aq re' re' yej-amaj taqe i kok' paat tasooj paam. Ki'ib' b'ara runimaal paam i ju'jun xelik chuwach. 6Re' taqe kok' paat re' re' oxch'iht chik noq wilkeeb' i ju'jun. Re' i peet ch'iht lajeeb' ru ka'winaq chi kok' paat i wilkeeb' chupaam i ju'jun ch'iht. Re' i koraal tz'aq wilik chi riij i rupaat i Dios xti najt naah ar ch'ikilkeeb' i rib'ojal kok' paat, ma' re' ta wach tz'aq reh i rupaat i Dios ch'ililkeeb'. 7Eh chuwach taqe i kok' paat wilkeeb' chi junsuut i rupaat i Dios wilik i johtb'al reh reh runimb'iik wach intohq'ik johtoq ruuk' i peet ch'iht korehtaal xponik paroxch'iht. 8Re' hin xwilow panusaq wiriik chi junsuut i rupaat i Dios wilik taqe i tz'aq korjinaq ixib' b'ara runajtiil naah, chinaah i re' ch'iklik taqe kok' paat. 9Re' i tz'aq wilik chikiij i kok' paat ki'ib' b'ara ruuk' yejaal runimaal wach, je' wo' re' nimaal i tehlik inkahnik ruuk' i paat. 10Re' xilak i tz'aq ruuk' i kok' paat re' re' lajeeb' b'ara i tehlik chikiij i kok' paat, eh je' wo' chi junsuut i rupaat i Dios ruuk' i paat jinaj chik. 11Re' i ookb'al reh taqe i kok' paat re' re' ar wilik reje i tehlik wii' ki'ib' b'ara ruuk' yejal i runimaal wach. Re' taqe i kok' paat ka'kab' i ru puertahiil jinaj i wilik reje pantz'eet reh i rookb'aal i q'iij, eh jinaj i wilik reje pansak'aaj reh i rookb'aal q'iij. 12Eh chi' paat reje wilik wo' chik jinaj i paat ho'lajuuj ru ka'winaq b'ara runimaal wach, ki'ib' b'ara ruuk' yejaal rupimiil i tz'aq, ka'winaq ruuk' ho'oob' b'ara rooq. 13Eh xupaj b'ila' i rupaat i Dios lajeeb' roxk'ahl b'ara runimaal rooq xelik chuwach. Re' i wach haa' i paat, haa' reje i chi' paat re' i tz'aq lajeeb' roxk'ahl b'ara xelik chuwach. 14Re' i runimaal wach i rupaat i Dios haa' reje i chii' paat wilik reje parelb'aal q'iij lajeeb' roxk'ahl b'ara wo' xelik chuwach. 15Eh xupaj wo' hoq i paat wilik reje chi riij i rupaat i Dios, haa' reje i chii' paat, haa' taqe i tz'aq, lajeeb' roxk'ahl b'ara rooq xelik chuwach. 16Re' i tz'aq wilik i koq ko chupaam, haa' taqe i ventana, haa' taqe i kok' paat ixib' ch'iht noq wilkeeb' kojooj taqe tz'ilom chuwach. Ar xtohq'ik johtoq ko wach ak'al koxponik i wilik taqe i wii' i ventana, je' wo' taqe i ventana kojooj wo' tz'ilom chikiwach. 17Re' i winaq xupaj wo' hoq i naah i puerta, je' wo' hoq i chupaam i chi riij i paat, eh je' wo' hoq chu'nchel i tz'aq wilik chi junsuut, chi je' chi riij chi je' chupaam xupaj. 18Eh och'imaj kiwach ruuk' i je' ruwii' ánjel, eh pankiyejaal wilik rehtalil i ju'jun chi xaq ipak'. Eh re' i je' kiwii' ánjel k'ultar wilik kiwach. 19Re' i kiwach juntar je' inka'yik winaq, k'ahchi' rilom reje i xaq ipak', eh re' i kiwach juntar je' inka'yik kaq b'ahlam, k'achi' rilom reje i rehtalil i xaq ipak'. Je' re' i och'imaj wii' wach i rupaat i Dios. 20Eh chu'nchel i tz'aq reh i rupaat i Dios och'imaj wach ruuk' i je' kiwii' ánjel, je' wo' ruuk' i xaq ipak'. Ar xtohq'ik johtoq wach ak'al koxponik kochinaah i puerta. 21Re' i ju'jun chi rooq i rupaat i Dios kajtz'u'k noq wilik. Eh chuwach i ookb'al reh i santo laj ye'aab' kajtz'u'k wo' noq wilik, ar wilik jinaj i artaal. 22Eh re' i artaal tz'ilom korjinaq wii' ki'ib' b'ara ruuk' yejaal runajtiil naah, eh jinaj b'ara runimaal rooq je' wo' hoq i runimaal wach. Re' i rutz'u'kaal re' wach, re' rooq tz'ilom wo' ruyej-aal. Re' i winaq je' wili i xuq'or weh: Re' i mexa wili i wilik i koq chuwach i QaJaaw Dios, inki. 23Re' i rupaat i Dios ruch'ihil i santo laj ye'aab', ju'jun i ru puertahiil. 24Re' taqe i puerta ka'kab' pehr noq wilkeeb' k'ul kiteh reje wataq tz'aq. 25Eh re' i puerta wilik panyejaal och'imaj wach ruuk' i je' kiwii' ánjel, eh ruuk' xaq ipak'. Je' wo' rukab' i och'imaj wii' wach i koraal tz'aq. Eh re' i rumuuj i paat tz'aplik ruuk' tz'ilom. 26Eh k'ul tar i rumuuj i paat wilkeeb' i kok' ventana, eh och'imaj kiwach ruuk' xaq ipak'.

will be added

X\