EZEQUIEL 31

1Eh chupaam i peet q'iij reh i roox poh reh i rujunlaaj haab' qak'amariik reje Babilonia, je' wili i xuq'or weh i QaJaaw Dios: 2Re' hat rak'uun winaq cha q'or reh i kireey i aj Egipto, je' wo' keh i rutinamiit chi je' wili: Re' i Dios je' wili i xuq'or: ¿Chib'ih aj uuk' naa nupajam i runimaal wach? 3Re' i runimaal wach i kireey i aj Egipto je' rukab' i chakaltee' wilik Líbano xa holohik chik taqe i q'ab' i rumujej taqe cho naah i ch'ahn imponik kopan taxaaj i ju'. 4Re' jab' inqajik chaloq xtowik reh chi xk'ihik, eh wilik taqe i rooq i ha' chi junsuut. Re' ha' re' re' int'aqsanik reh chu'nchel i chee' wilkeeb' chupaam i ye'aab' re' re'. 5Ruum chi ma' k'isiin i ruha'iil wilik q'e' xk'ihik chikiwach i chee' wilkeeb' panch'ahn. Eh ma' k'isiin i q'ab' xwihik nimaq xi ponik. 6Eh k'ih b'uhr wach i chikop inkiyejaa' i kisuuq' nah taq q'ab'. Eh k'ih b'uhr kiwach i josq'laj chikop inasjik i kak'uun chi ri'sil. Re' taqe i nimaq tinamit kihi'lik chi ri'sil i rumuuj. 7Re' chee' re' re' rujalwaach i kireey i aj Egipto, xanajt chik naah, xa nimaq chik rooq taqe i q'ab', eh ha' taqe paam ak'al wilik wii' i raa'. 8Eh re' i chakaltee' wilik chupaam i ye'aab' xuyeew wii' i peet winaq i Dios ma' xureq ta chi je' rukab' i chee' re' re'. Ma' jino'q i chee' xureq chi je' k'ihaal i q'ab', chi je' re' i xaq, wilik chupaam, i ye'aab' Edén xureq chi je' holwochiil i chee' re' re'. 9Re' hin q'e' holohik xnukanaa', ma' k'isiin i q'ab', ruum chi q'e' naq holohik, re' taqe i chee' wilkeeb' panye'aab' Edén xtohq'ik kikaqwachem. 10Eh je' wo' chik wili i xuq'or i Dios re' chee' re' re' xiik' naah najtiil naah, xponik ko taxaaj i ju' ma' k'isiin ta xk'ihik ruum i re' q'e' xunimb'isaj riib'. 11Re' chee' re' re' rujalwaach i kireey i aj Egipto, ruum aj re' naa nukanaam pan q'ab' i k'amal b'eeh inchalik pan tokoom tinamit. Eh naa nuye'em panti' k'axik je' rukab' i ruk'ul chi reh. 12Re' taqe i tokoom tinamit xiik' naah kijosq'iil naa kiyok'wiik reh, i naakiq'eb'em chi rutkeel. Noq naa ruq'ehb'iik naa rutoqib'iik chinaah taqe i rax chee', chinaah taqe i yuuq' pan rooq yuuq' wilkeeb' panruyuq'ul i tinamit. Eh chu'nchel i tinamit wilkeeb' chi ri'sil i rumuuj naakimolom chi elik, naa kikanaam chi rutkeel. 13Noq q'eb'lik chik wach ak'al naa kichaliik wih-oq chinaah taqe i chikop kirupinik pan taxaaj, je' wo' chu'nchel i chikop wilkeeb' pantaq ch'ahn. 14Eh yu'naak reje chi qawach ma' jino'q chik i chee' naa ruk'ihiik chi je' rukab' noq xk'ihik i chee' re' re' atoob' ta wilik ruha'il, atoob' ta kojooj ruha'iil chi korik, ma' jaruuj chik naa ruponiik ko taxaaj i ju'. Naa la' rusachariik kiwach naakik'ulum keh je' rukab' inkik'ul i winaq noq kikimik kimuhqik panjul, inooj kireq taqe i kamnaq. 15Re' hin i Dios i nuq'or noq re' chee' re' re' naa nutaq'aam reje pan kiye'aab' i kamnaq. Eh naa nuchiqsam i palaw, ruum ruti'kiil k'uxliis, eh naa wo' nupab'aam i nim ha', ma' naa ta chik rub'eeh rooq. Ruuk' taqe wili naa nuye'em ruti'kiil kik'ux i aj Líbano, eh chu'nchel i chee' naa rukuxiik kichiqiik. 16Eh noq naa ruqehb'iik i nimlaj chee' wili naa kiyo'jiik i nimaq tinamit. Chu'nchel i chee' sik'ooj wach wilkeeb' chupaam i ye'aab' Edén naa rusuuqb'iik kik'ux noq naa rojiik pan kiye'aab' kamnaq. Eh naa wo' rusuuqb'iik kik'ux i chee' wilkeeb' Líbano re' taqe i kojooj kiha'iil chi korik. 17Je' wo' taqe i keh naa wo' kimuhqik naa rojiik kireqem taqe i kamnaq panq'aq'inik. Re' taqe i tinamit wilkeeb' chi ri'sil i rajaawriik naa kitukem kiib' chupaam i ju'jun chi tinamit. 18Ma' jino'q i chee' xwihik panye'aab' Edén xureq i ruholwochiil, i rajaawriik i chee' re' re'. Xa re' la' naa wo' ruq'ehb'iik wach ak'al je' rukab' noq xq'ehb'ik wach ak'al i chee' xwihik panye'aab' Edén. Eh naa ruwihiik chi kixilak i ma' kinimanik ta ree Dios, chi kixilak i xikimik panq'aq'inik. Re' i chee' re' re' rujalwaach i kireey i aj Egipto, ruch'ihil i rutinamiit, inki i QaJaaw Dios.

will be added

X\