EZEQUIEL 30

1Re' i QaJaaw Dios je' wili i xuq'or weh: 2Hat rak'uun winaq cha q'or rib'iral keh i aj Egipto i naakik'ulum je' wili i cha q'or keh: Re' i QaJaaw Dios je' wili i ruq'or taq chawiij: 3Kik'er kichii' ruum ruti'kiil kik'ux chi riij i q'iij k'ulik iloq reh noq naa nuye'em i runimaal ti' k'axik chikinaah i tinamit. 4Naa ruchaliik i q'aq'inik chikinaah i aj Egipto, naa rusachariik kiwach chi jumpech, eh naa relq'jiik kib'ehomal, Eh re' taqe i aj Etiopía ma' k'isiin ta naa kiyo'jiik. 5Eh chu'nchel i tinamit naa ruko'liniik keh i aj Egipto, naa wo' kikanteesjiik panq'aq'inik. Naa wo' rub'aan keh i aj Etiopía i aj Fut, i aj Lud, taqe i aj Arabia, i aj Lidia. 6Je' wili i xuq'or i QaJaaw: chu'nchel i tinamit naakitowiik keh i aj Egipto naa kikanteesjiik panq'aq'inik. Re' i runimaal wach tinamit Egipto naakiye'em panak'al, ar naa rutohq'iik cho Migdol, eh naa ruponiik ko ar Sevene, inki. 7Eh re' i Egipto xa re' wo' reh naa rukahniik chi xan tz'irik chik paam. Re' taqe i tinamit ruchopom naah naa wo' rukahniik chi xan tz'irik chik kipaam. 8Re' hin naa nukojom ruq'aq'a i tinamit Egipto, eh naa wo' nusacham kiwach chu'nchel i naa ruko'liniik reh. Ruuk' i re' naa kinab'eem chi re' hin i k'achlik Dios. 9Noq naa ruk'ulariik taqe re' naa nutaq'aam reje i taqareel pan barco, chi ruyohb'eesjiik i tinamit Etiopía, re' i ma' rukapaaj taj chi naa ruk'ulariik taqe re'. Noq naa rib'iram rib'iral ma' k'isiin ta naa ruyo'jiik. Re' taqe re' xailook' chik ink'ularik. 10Re' hin i Dios i nuq'or chi re' i Nabucodonosor i kireey i aj Babilonia naa nukojom chi rusachariik wach i rub'ehomal i tinamit Egipto. 11Re' i reey re' re' naa ruk'amam taqe reje chi riij i ru soldado xiik' nah kijosq'iil noq naa rojiik kisacham wach i tinamit Egipto. Eh naa kia'nam reh i tinamit re' re' naakinujisam paam chi kamnaq. 12Eh re' hin naa nuchiqsam taqe i nim ha' ar Egipto. Eh naa nuq'asam pan kiq'ab' i yiib' wach kina'ojb'al. Pan kiq'ab' i tokoom tinamit chi rusachariik kiwach i keh je' wo' i kiye'aab'. Re' wili re' hin i Dios kinq'orik reh. 13Re' hin naa nusacham wach i kitiyoox i aj Egipto, je' wo' i kitiyoox i aj Menfis. Eh re' i tinamit Egipto ma' naa ta chik ruwihiik jino'q i aj taaq'oom chinaah, ma' k'isiin ta naa kiyo'jiik ruum i naa ruk'ulariik. 14Eh naa nusacham kiwach i aj pansak'aaj reh i rookb'aal q'iij reh Egipto. Eh naa nuk'atam i tinamit Zoán, naa nuye'em taqe chutojariik i kimahk i aj Tebas. 15Re' hin naa wik'sam i nujosq'iil chikinaah i aj Sin, re' inye'wik rukowiil kik'ux i aj Egipto. Naa wo' nusacham wach i kib'ehomal i aj Tebas. 16Naa nukojom ruq'aq'al i tinamit Egipto, eh ma' k'isiin i ti' naakik'ulum i aj Sin. Eh naa rusachariik kiwach aj Tebas, eh re' taqe i aj Menfis juneliik naa kiwihiik panti' k'axik. 17Re' taqe i k'ijolaq aj Avén, taqe i aj Pibeset ar naa kikanteesjiik ruuk' q'aslaj ch'ihch'. Eh re' taqe i ixoq naa kik'amariik reje pan tokoom tinamit. 18Eh noq naa wesam i kajaawriik i aj Egipto naa ruqequmriik wach i q'iij chi keh i aj Tefnes. Re' i tinamit Egipto ma' naa ta chik rub'anam i taaq'anik je' na naa nutz'apam naah chi suutz'. Re' taqe i tinamit kichopom naah naa kik'amariik reje pan tokoom tinamit. 19Re' hin naa nuq'atam i q'orik chikinaah i aj Egipto reh i kiye'ariik panti' k'axik. Ruuk' i re' naa kinab'eem chi re' hin i k'achlik Dios. 20Eh noq wuquub' q'iij chik ruk'amam rub'eeh i peet poh reh i ru lajeeb' haab' qak'amariik reje Babilonia, re' i QaJaaw Dios, je' wili i xuq'or weh: 21Hat rak'uun winaq, re' hin xwesaj chik i rajaawriik kireey i aj Egipto je' naa xtoq i q'ab' ma' awach ta naa ruq'omaniik reh, ma' awach ta wo' chik imb'ak'wik wach reh, reh chi nee wo' chik inchol ruchopariik i ruq'aslaj ch'ihch' reh i q'aq'inik. 22Re' hin i Dios i nuq'or chi yohb'aal wach i nujosq'iil chinaah i kireey i aj Egipto. Naa wesam i rajaawriik chi jumpech je' naa nutoqom kab'chel i q'ab' reh chi ma' nee ta chik i rub'an ruchopariik i ruq'aslaj ch'ihch'. 23Re' hin xa aha' naa nutukem kiwach i aj Egipto chupaam taqe i tinamit wilkeeb' sut i wach ak'al. 24Re' chik i kireey i aj Babilonia naa nuye'em rajaawriik. Je' naa nuye'em q'aslaj ch'ihch' pan q'ab', reh chi naa rukansam i kireey i aj Egipto. Korehtaal i ruk'er chii' chikiwach i nixowanik wach. 25Re' hin korik i nuq'or chi re' chik i kireey i aj Babilonia naa nuye'em rajaawriik naa wesam i rajaawriik i kireey i aj Egipto. Eh noq naa nuye'em pan q'ab' i q'aslaj ch'ihch' ruuk' i re' naa rub'anam keh i aj Egipto. Ruuk' i re' naa kinab'eem chi re' hin i k'achlik Dios. 26Eh naa nutukem reje kiwach i aj Egipto, chi je' pankok' tinamit, chi je' pan nimaq tinamit. Ruuk' i re' naa kinab'eem chi re' hin i k'achlik Dios, inki.

will be added

X\